Vind vreugde in ’n gejaagde wêreld
DIE MEESTE MENSE BIED DIE DRUK VAN DIE LEWE DIE HOOF, MAAR MIN MENSE DOEN DIT MET VREUGDE. DIT VERG ’N SPESIALE SOORT WYSHEID.
DIE boek The 24-Hour Society erken hierdie feit en sê: “Ons moet die wysheid ontwikkel om die behoeftes en die natuur van die mens te beskerm in die tegnologiese wêreld wat ons geskep het.”
Gelukkig is praktiese wysheid geredelik beskikbaar in die boek met die grootste verspreiding ter wêreld—God se Woord, die Bybel. Die Bybel, wat deur die Een geïnspireer is met ’n volmaakte begrip van die behoeftes en die natuur van die mens, bevat beproefde beginsels. As jy hierdie beginsels toepas, kan dit jou help om groter beheer oor jou lewe te verkry, wat jou ten minste ’n mate van vreugde in vandag se dolle wêreld sal gee.—Jesaja 48:18; 2 Timoteus 3:16.
Hierdie beginsels is op drie hoofgebiede van toepassing. Eerstens wys dit vir ’n mens waar jy oordeelkundig kan snoei. Tweedens kan dit jou help om verstandige prioriteite te stel. Derdens voorsien dit ’n geestelike uitkyk op die lewe wat ver verhewe is bo ’n blote sekulêre uitkyk. Kom ons kyk nou na hierdie drie gebiede.
Hou jou lewe eenvoudig
Stel jou voor dat jy ’n paar dae gaan kamp. Omdat jy gerieflik wil wees, neem jy ’n groot tent en elke denkbare bykomstigheid saam. Jy neem ook ’n sleepwa vol meubels, kookgerei, ’n vrieskas, ’n draagbare kragopwekker, ligte, ’n TV en baie ander dinge, insluitende kos, saam. Maar dit neem jou baie ure om al hierdie dinge op te stel! Dan, aan die einde van jou kort vakansie, neem dit jou net soveel tyd om weer op te pak—om nie eers te praat van die tyd wat dit neem om alles weer by die huis weg te pak nie. Wanneer jy terugkyk, besef jy dat jy nie genoeg tyd gehad het om die kampeerdery te geniet nie! Jy wonder of dit alles die moeite werd was.
Vir miljoene mense vandag is die lewe amper soos daardie kampeervakansie. Hulle bestee ’n buitensporige hoeveelheid tyd daaraan om die eindelose aantal materiële dinge te versamel en in stand te hou wat hierdie wêreld ons wys wil maak ons nodig het om gelukkig te wees. In teenstelling hiermee het Jesus Christus gesê: “Selfs wanneer iemand oorvloed het, spruit sy lewe nie voort uit die dinge wat hy besit nie” (Lukas 12:15). Ja, ’n mens se lewensgehalte word nie in terme van materiële rykdom gemeet nie. Trouens, rykdom dra dikwels by tot die lewe se spanning en sorge. “Die oorvloed wat aan die ryke behoort, laat hom nie toe om te slaap nie”, sê Prediker 5:12.
Kyk dus goed na elkeen van jou besittings en vra jou af: ‘Het ek dit werklik nodig of kompliseer dit net my lewe? Dra dit by tot die gehalte van my lewe of verkwis dit kosbare tyd?’ Die inleiding tot die boek Why Am I So Tired?, deur Leonie McMahon, sê: “Die uitvinding van verskillende toestelle, wat bedoel was om huiswerk minder van ’n gesloer te maak, het daartoe gelei dat die huisvrou sekulêr moes begin werk sodat sy die toestelle kan koop en vir hulle instandhouding kan betaal.”
Wanneer jy jou lewe vereenvoudig, maak jy meer tyd vir familie, vriende en jouself. Sulke tyd is noodsaaklik vir jou geluk. Moenie soos diegene wees wat te laat in hulle lewe uitvind dat vriende en familie baie belangriker—en interessanter—as geld en dinge is nie. Slegs mense kan jou liefhê. Hoewel bankrekeninge, aandeleportefeuljes, rekenaars, televisiestelle en ander toestelle dalk hulle plek in die lewe het, is hierdie dinge beslis nie die belangrikste nie. Diegene wat sulke dinge die voorkeur in hulle lewe gee, maak hulle lewe goedkoop en raak uiteindelik ontevrede en selfs verbitterd.—1 Timoteus 6:6-10.
Bestuur jou tyd en stel prioriteite
Om tyd te bestuur, is in sekere opsigte soos om ’n finansiële begroting te laat klop. As jy te veel dinge in die beperkte aantal ure probeer druk wat aan jou beskikbaar is, lewe jy wat tyd betref bo jou vermoë. So ’n lewenswyse veroorsaak uiteindelik frustrasie, spanning en vermoeidheid. Leer dus om prioriteite te stel.
Bepaal eers wat die belangriker dinge is, en sit genoeg tyd daarvoor opsy. Vir Christene is geestelike strewes altyd die belangrikste (Matteus 6:31-34). As belangrike dinge haastig afgehandel word en nie behoorlik gedoen word nie, ontstaan ernstige probleme dikwels. Gevolglik sal jy dalk enigiets wat tyd in beslag neem, maar nie van veel waarde is nie, moet uitskakel.
Wanneer jy prioriteite stel, moet jy jou behoefte om soms alleen te wees in ag neem—tyd vir opbouende bepeinsing en om jou krag te herwin. “Om kwaliteitstyd alleen deur te bring”, sê die tydskrif Psychology Today, is “’n noodsaaklike lafenis in vandag se gejaagde wêreld. . . . Om tyd alleen deur te bring, is brandstof vir die lewe.” Mense wat te besig is vir bepeinsing, kan oppervlakkig raak in hulle gesindheid teenoor die lewe.
Beskeidenheid en geestelikheid
Beskeidenheid en geestelikheid is twee van die beste bates wat jy kan hê om ’n gelukkige, gebalanseerde lewe te lei. Beskeidenheid is belangrik, want dit help jou om nie onrealistiese werklaste en verantwoordelikhede te aanvaar nie. As jy beskeie is, sal jy weet wanneer om nee te sê vir oortydwerk of ander bedrywighede wat op iets belangrikers sal inbreuk maak. Beskeie mense is nie jaloers op wat ander het en doen nie; gevolglik is hulle gewoonlik meer vergenoeg. Ware beskeidenheid is weer ’n faset van geestelikheid, nog ’n noodsaaklike sleutel om groter beheer oor ons lewe te verkry.—Miga 6:8; 1 Johannes 2:15-17.
Geestelikheid wat op juiste kennis van die Bybel gebaseer is, maak jou iemand met meer onderskeidingsvermoë en insig—iemand wat nie deur oppervlakkige, sekulêre definisies van sukses om die bos gelei word nie. Jy neem die wyse raad van 1 Korintiërs 7:31 ter harte: “[Laat] dié wat van die wêreld gebruik maak, soos dié [wees] wat dit nie ten volle gebruik nie; want die toneel van hierdie wêreld is aan die verander.” Christene ‘maak gebruik van die wêreld’ wanneer hulle materieel vir hulleself en hulle gesin sorg, maar hulle laat nie toe dat hierdie wêreld hulle verswelg nie. Hulle weet dat dit geen ware sekuriteit bied nie, dat dit binnekort heeltemal vernietig sal word en dat ware sukses—sekuriteit en ewige lewe op ’n paradysaarde—van ’n mens se verhouding met God afhang (Psalm 1:1-3; 37:11, 29). Slaan dus ag op Jesus se vermaning en belê wyslik deur “skatte in die hemel op [te gaar], waar nóg mot nóg roes verteer en waar diewe nie inbreek en steel nie”.—Matteus 6:20.
Vermy angs en vind ware vrede
Namate hierdie huidige stelsel al hoe nader aan sy einde kom, sal die druk wat op jou geplaas word en die eise aan jou tyd ongetwyfeld toeneem. Dit is dus uiters belangrik dat jy die Bybel se raad probeer toepas: ‘Moet oor niks besorg wees nie, maar laat jou versoeke in alles deur gebed en smeking tesame met danksegging by God bekend word; en die vrede van God wat alle denke te bowe gaan, sal jou hart en jou verstandelike vermoëns deur middel van Christus Jesus bewaak.’ Sulke vrede is buite die bereik van enigiemand met ’n suiwer sekulêre uitkyk wat geen waarde aan gebed heg nie.—Filippense 4:6, 7.
Maar Jehovah sal jou selfs meer as gemoedsrus gee. Hy sal jou elke dag help om jou vrag van verantwoordelikheid te dra as jy ‘al jou sorge op hom werp’ (1 Petrus 5:7; Psalm 68:19, NW). Dit is dus wys om elke dag na God te luister deur ’n deel van sy Woord te lees. Wie kan jou immers beter raad gee as jou Skepper? (Psalm 119:99, 100, 105). Ja, ondervinding het getoon dat diegene wat God die middelpunt van hulle lewe maak, grootliks gehelp word om vreugde in vandag se dolle wêreld te vind.—Spreuke 1:33; 3:5, 6.
[Lokteks op bladsy 11]
Stel prioriteite, wat insluit dat jy in jou behoefte aan geestelikheid en om alleen te wees, voorsien
[Prent op bladsy 9]
Kan jy jou lewe vereenvoudig?
[Prent op bladsy 10]
Wat is vir jou belangriker, dinge of mense?