Van ons lesers

Chroniese siekte Ons het drie kinders—een ly aan Down-sindroom en ’n ander een aan sekelselanemie. Onlangs het die kind met sekelselanemie ’n kwaai terugslag gehad, en hy moes in die hospitaal opgeneem word, wat vir ons almal baie moeilik was. Dit het gevoel of Jehovah my gebede verhoor het toe ek die Ontwaak! van 22 Mei 2000 ontvang het met die reeks “Chroniese siekte—Hoe ’n gesin daarmee kan saamleef”. Hierdie artikels het my en my vrou die moed gegee om te volhard. Dit het ook ons hoop versterk dat niemand binnekort sal sê: “Ek is siek nie.”—Jesaja 33:24.

E.J.M., Brasilië

Ons het ’n 19-jarige seun wat aan skisofrenie ly. Ons het al baie boeke oor siektes gesien, maar het nog nooit enigiets gelees wat siekte vanuit die gesin se oogpunt bespreek nie, soos hierdie artikels dit gedoen het. Dit het my eie innerlike worsteling en lyding goed beskryf, asof my innige smart op skrif gestel is.

H. T., Japan

Ek ly al die afgelope tien jaar aan ’n progressiewe chroniese siekte, en die wyse waarop julle beskryf het hoe ’n mens voel, het my regtig getref. Dit is soms baie maklik om ’n mens se verstandelike en geestelike balans te verloor, maar die broers in ons gemeente het getoon dat hulle graag wil verstaan wat ek deurmaak. Met taktvolle woorde gee hulle my die krag om te wil lewe.

M. M., Italië

Ons het die artikel as ’n gesin saamgelees. My dogter het nierversaking opgedoen en is al vyf jaar lank op nierdialise. Dit was vir ons baie moeilik om hiermee saam te leef. Sy het al soveel keer by die dood omgedraai dat ons gedurig in vrees lewe en wonder wanneer die volgende probleem gaan opduik. Maar julle raad het baie gehelp. Elke dag moet waardeer word. Gebed is ook noodsaaklik. Dit help my om te weet dat Jehovah my gevoelens verstaan.

S. J., Verenigde State

Dit het my hart geraak toe ek besef dat iemand verstaan hoe moeilik dit is om chronies siek te wees! Ek het gesien hoe my drie dogters een vir een aan epilepsie begin ly, net soos ek. Sulke artikels help ons om insig te hê en om die geestesgesindheid van Christus te weerspieël.

G. L., Verenigde State

Anakondas Ek woon in ’n gebied waar daar anakondas is. Mense vertel dikwels stories oor hierdie slange, maar dit is moeilik om te weet of ’n mens hulle moet glo of nie. Julle artikel “Anakondas—Wat nuwe navorsing aan die lig bring” (22 Mei 2000) het my gehelp om tussen waarheid en verdigsel te onderskei, en dit het al my vrae oor hierdie skeppingswonder beantwoord.

J.S.P., Brasilië

Pa’s wat wegloop Ek lees die Ontwaak! al 25 jaar lank, en ek dink nie hierdie onderwerp is al ooit bespreek nie (“Jongmense vra . . . Pa’s wat wegloop—Kan hulle regtig wegloop?” 22 Mei 2000). Onderwerpe oor enkelmoeders is al wel bespreek, maar nie die verantwoordelikheid van die jong man nie. Ek kon nie verstaan waarom net die ma en kind die gevolge moet dra as twee mense hoerery gepleeg het nie. Ek het swanger geraak toe ek 19 was. Die seun wou niks met my te doen hê nie. Hou asseblief aan om vir jongmense te sê om van ‘hoerery te vlug’.—1 Korintiërs 6:18.

C. C., Spanje

Griekse teater Ek kan nie vir julle vertel hoe baie ek die artikel “Die teater van Epidauros—Eeue later steeds ongeskonde” (8 Junie 2000) geniet het nie. Net soos ek verwag het, was die artikel waarlik gedagteprikkelend. Ek het egter nie gedink dat dit soveel geestelike gedagtes sou bevat nie!

K. S., Verenigde State