Van ons lesers
Opvoeding Ek skryf om vir julle dankie te sê vir die reeks “Opvoeding wat tot ’n beter lewe lei” (22 Desember 2000). Dit het werklik getoon hoe Jehovah, deur middel van sy organisasie, alle regskapenes probeer bereik. Ek is diep geraak toe ek lees hoe die plaaslike televisiestasie en koerante verslag gelewer het oor die vrystelling van die Ontwaak! in Samoaans. Dit het die vervulling van Jesus se woorde in Handelinge 1:8 toegelig: “Julle sal getuies van my wees . . . tot in die mees afgeleë deel van die aarde.”
J. D., Verenigde State
Pa’s wat die huis verlaat Ek is 15 jaar oud en wil graag vir julle uit die diepte van my hart dankie sê vir die “Jongmense vra . . . ”-artikels oor “Waarom het my pa ons verlaat?” (22 November 2000) en “Hoe kan ek dit verwerk noudat my pa ons verlaat het?” (22 Desember 2000). Ek het al gevoelens van woede, hartseer en wanhoop gehad. Die artikels het getoon dat dit nie net ek is wat in hierdie situasie is nie en dat my gevoelens heeltemal normaal is. Hou asseblief aan om sulke wonderlike artikels te skryf.
S. L., Duitsland
Ek is 10 jaar oud, en dit voel asof ek al my hele lewe lank vir hierdie artikels wag! Dit was vir my baie moeilik toe my pa ons verlaat het. Die artikels het op die regte tyd gekom.
M. D., Duitsland
Lewensverhaal Dankie vir die artikel “’n Hoop wat my onderskraag” (22 Desember 2000). Ek het my pa gehaat omdat ek van kleins af gesien het hoe hy my ma mishandel. Ek het geweet dat dit verkeerd is om te haat, maar dit was baie moeilik om daardie gevoelens te beheers. Maar toe lees ek hoe Tatjana Vileiska probeer om nie meer die man te haat wat haar ma vermoor het nie. Ek sal graag haar voorbeeld wil volg.
A. K., Japan
Ek het begin huil toe ek Tatjana se traumatiese ondervinding lees oor hoe sy haar ouers verloor het. Sulke persoonlike ondervindinge herinner my voortdurend daaraan dat baie mense regoor die wêreld baie moeilike situasies suksesvol verduur en vreugdevol bly ondanks hulle probleme.
J. R., Verenigde State
Ek het so pas die aangrypende verhaal van Tatjana Vileiska klaar gelees. Haar verhaal is een wat ek nie gou sal vergeet nie. Die feit dat sy soveel dinge kon verduur voordat sy Bybelwaarheid geleer het en nog steeds ’n glimlag op haar gesig kan hê, is niks anders as ’n geestelike wonderwerk nie.
S. S., Verenigde State
Huwelike wat gered is Ek wil julle hartlik bedank vir die reeks “Kan ons ons huwelik red?” in die Ontwaak! van 8 Januarie 2001. Ek en my vrou het ’n jaar gelede huweliksprobleme gehad. Ons is albei in ’n huis grootgemaak waar daar gereeld woedeuitbarstings was. Ons het dus dinge gesê wat mekaar werklik seermaak, en die situasie het begin handuit ruk. Maar ons het Bybelbeginsels begin toepas, en ons is nou baie gelukkig.
R. O., Verenigde State
As ’n gemeentelike ouer man het ek gevind een van die grootste uitdagings is om diegene te probeer help wat voel dat hulle in ’n liefdelose huwelik vasgevang is. Ons het deur die jare heen weliswaar al ’n oorvloed skriftuurlike raad deur die publikasies ontvang. Maar toe ek na die voorblad van die tydskrif kyk, kon ek sien dat dit presies sou wees wat ons nodig het om spesiale hulp aan sulke persone te gee. Die artikels het my nie teleurgestel nie!
L. R., Verenigde State