Van ons lesers
Bewyse van die skepping Ek het baie jare lank saam met wetenskaplikes gewerk en was altyd geïrriteerd deur hulle bewerings dat geloof in die skepping te eenvoudig is. Die reeks “Sien meer as wat jou oë kan sien” (22 Augustus 2000) is die volmaakte antwoord op sulke bewerings. In net ’n paar bladsye het julle oortuigende bewys van die skepping gelewer. Ontwaak! moet geprys word vir die gehalte van die tydskrif se inhoud en die navorsing daarin.
B. E., Nieu-Seeland
Ek studeer die Bybel saam met Jehovah se Getuies, en my geloof in God se bestaan is beslis versterk toe ek die inligting oor atome, selle en DNS gelees het.
T. K., Japan
Nou kan ek verduidelik waarom ons reënboë het, waarom gras groen is en wat ’n atoom is! Hoewel die Ontwaak! nie ’n wetenskaptydskrif is nie, vestig dit die aandag op wetenskaplike getuienis wat geloof in ’n Skepper ondersteun.
M. F., Verenigde State
Genesing sonder ’n bloedoortapping Die artikel “’n Gewetensaak” (22 Augustus 2000) het my diep geraak. Ek het my in presies dieselfde bootjie bevind toe daar vasgestel is dat ek akute promiëlositiese leukemie het. Wat daarna met my gebeur het, was byna dieselfde as wat met Darlene gebeur het. Daar is vir my gesê dat ek nog net ’n paar dae sou leef. Dit was drie jaar gelede.
A. B., Duitsland
Seksuele teistering Ek wil graag my waardering uitspreek vir die artikel “Jongmense vra . . . Wat kan ek omtrent seksuele teistering doen?” (22 Augustus 2000). Op skool het hulle my gewoonlik allerhande name genoem omdat ek nie aan onsedelike gedrag wou toegee nie. Nadat ek my hoërskoolopleiding voltooi het, het ek gedink dat die teistering sou ophou, maar verskeie meisies het onwelvoeglike voorstelle aan my gemaak. Deur my Christelike oortuiging algemeen bekend te laat word, het dit my gehelp om sulke voorstelle te weerstaan. Dankie dat julle ons van hierdie geestelike voedsel voorsien.
H. C., Zambië
Die artikel het my baie gehelp. ’n Seun in my graaddrieklas wil nie ophou om na my te kyk nie. Nou weet ek presies wat om te doen.
H. K., Verenigde State
Die tydskrif het op presies die regte tyd gekom! Ek word by my werksplek seksueel geteister. Ek het emosioneel uitgeput begin voel. Net toe ek dit nie meer kon verduur nie, het hierdie artikel verskyn. Nou weet ek hoe om die mense by die werk te hanteer.
L. T., Verenigde State
Russiese stad Aangesien ons maatskappy op internasionale vlak sake doen, geniet ek dit om artikels oor verskeie lande te lees. ’n Kollega het ’n seun wat in Rusland woon, en daarom het ek haar van die artikel “’n Besoek aan ‘Rusland se oudste stad’” vertel (22 Augustus 2000). Sy het dit met graagte geneem, en nadat sy dit gelees het, het sy vir nog ’n Ontwaak! gevra. Ek het vir haar die nommer van 22 Mei 2000 met die artikel “’n Unieke klok in Praag” gegee. Dit het daartoe gelei dat sy op die Ontwaak! ingeteken het. Dankie dat julle sulke waardevolle inligting voorsien.
S. O., Verenigde State
Waterige ghoelasj? Ek het gedink dat ek die resep sou volg vir Hongaarse ghoelasj in die artikel “Die spesery wat van halfpad om die wêreld gekom het” (8 September 2000). Alles het goed gegaan, totdat die resep gesê het dat twee liter water bygevoeg moet word. My ghoelasj het soos sop gelyk en nie soos die bredie op die foto nie. Het ek die resep verkeerd verstaan?
L. P., Kanada
Nee, ons het ’n fout gemaak om dit ’n bredie te noem, aangesien die resep eintlik vir ’n Hongaarse ghoelasj-sop bedoel is. Party kookboeke stel voor dat ’n mens minder water moet byvoeg as wat ons aanbeveel het. Interessant genoeg, sommige lesers het die resep probeer en geskryf om te sê hoeveel hulle dit geniet het!—RED.