Die Toring van Crest
DEUR ONTWAAK!-MEDEWERKER IN FRANKRYK
GESKIEDKUNDIGE torings kom in allerhande groottes en vorme voor en het baie funksies verrig. Party is gebou om strategiese liggings te bewaak, en ander is as tronke gebruik; maar die meeste is nou toeriste-aantreklikhede. Die toring wat uitkyk oor die klein dorpie Crest op die oewer van die Drôme-rivier in die suidooste van Frankryk het al drie hierdie rolle vervul.
Omdat die Toring van Crest so groot is, kan dit van ver af gesien word. Met die noordoostelike sy wat 52 meter hoog is, is dit een van Frankryk se hoogste torings. Van bo af is die panoramiese uitsig oor die voetheuwels van die Vercors, die berge van die Ardèche en die Rhône-vallei waarlik asemrowend.
Die presiese oorsprong van die toring is onbekend, maar aanvanklik het dit as ’n vesting gedien. Gedurende die Albigensiese kruistog in die 13de eeu het die Katolieke troepe van Simon de Montford, met die hulp van Katolieke biskoppe, daardie kasteel ingeneem. Dit is toe as ’n basis vir die stryd teen die Albigense gebruik.
Gedurende die Godsdiensoorloë (1562-98) is die kasteel verskeie kere deur die Protestante aangeval, maar dit is nooit ingeneem nie. In 1633 is die toring amper vernietig toe alles buiten sy sterkste en veiligste deel op bevel van koning Lodewyk XIII afgebreek is. Van toe af is dit as ’n tronk gebruik vir gewone misdadigers en teenstanders van die monargie, asook vir Hugenote. Die inhegtenisneming van hierdie Franse Protestante het saamgeval met die tydperk toe die Edik van Nantes, wat ’n mate van godsdiensverdraagsaamheid in Frankryk teweeggebring het, geleidelik verwerp is. Op die tronkmure kan die graffiti van party van hierdie godsdiensgevangenes nog gesien word.
Vandag is die Toring van Crest ’n geskiedkundige monument wat elke jaar gemiddeld 30 000 besoekers ontvang. In 1998 is dit ingesluit by gebeure wat die 400-jarige herdenking van die Edik van Nantes gevier het. Sy mure is ’n wrede herinnering aan wat kan gebeur wanneer ’n klimaat van godsdiensonverdraagsaamheid toegelaat word om te ontwikkel.