Van ons lesers
Heelal Ek het die reeks “Die heelal—Het dit per toeval ontstaan?” (8 Oktober 2000) baie geniet. Dit was baie interessant om te sien hoe Jehovah God alles op so ’n georganiseerde manier geskep het. Die artikel toon duidelik dat ons geskep is en nie geëvolueer het nie.
E. V., Verenigde State
Veilige lugvaart Dankie vir die artikel “Lugvaart word veiliger gemaak” (22 September 2000). Ek het egter opgemerk dat die foto van die vlieënier se kajuit nie dié van die Boeing 747 is soos wat gemeld is nie, maar van ’n Boeing 777.
M. R., Tsjeggië
Ons kon nie foto’s van ’n Boeing 747-vlugnabootser kry nie. Daarom het die artikel gesê dat die 747-vlugnabootser ‘soortgelyk is aan die een in die foto’.—RED.
Aandelemark Dankie vir die gebalanseerde artikel “Is dit verstandig om in die aandelemark te belê?” (8 Oktober 2000). Ek het uit ondervinding geleer om versigtig te wees vir twyfelagtige wenke oor aandele. Dit lei dikwels net tot groter verliese. Voordat ’n mens aandele koop, is dit verstandig om na die algemene marktoestand te kyk.
N. B., Duitsland
Ek stem nie saam met die bewering dat ’n mens nie jou vertroue in “die geluksgod” stel wanneer jy in die aandelemark belê nie (Jesaja 65:11). Om ’n mens se geld in ’n onbestendige stelsel te belê wat heeltemal na willekeur werk, is dobbelary.
P. B., Verenigde State
Daar is weliswaar ’n groot mate van risiko betrokke by ’n belegging in die aandelemark. En soos met enige sakeonderneming is daar faktore by betrokke waaroor ons nie beheer het nie. Maar dit sal nie heeltemal korrek wees om te sê dat dit dobbelary is om aandele te verhandel nie. As ’n mens dobbel, gee jy geld uit sonder om enige handelsware daarvoor te kry. ’n Aandeel verteenwoordig egter ’n werklike deel in die eienaarskap van ’n sakeonderneming. Die verhandeling van aandele kan dus beskou word as die koop en verkoop van wettige goedere.—RED.
Ballingskap in Siberië Ek is deur die getrouheid van Stepan en ander getroue Christenbroers versterk wat in die lewensverhaal van Alexei Dawidjoek genoem is, “My hoofsaak in die lewe—Om lojaal te bly” (8 Oktober 2000). Ek is getref deur die rede waarom een broer dislojaal was—“omdat hy opgehou het om die Bybel te lees en dit te glo”. Hierdie woorde het my aangemoedig om voort te gaan om die Heilige Skrif gereeld te bestudeer.
A. V., Georgië
Waaghalssport Ek het onlangs die geleentheid gekry om te gaan hangsweef. Dit was ’n aanloklik aanbod, maar ek was nuuskierig oor wat die Bybel hieroor sê. ’n Paar dae later het ek die antwoord gekry in julle artikel “‘Waaghalssport’—Moet jy jou lewe in gevaar stel?” (8 Oktober 2000). Om te hangsweef, lyk werklik na ’n onvergeetlike ondervinding. Maar my verhouding met Jehovah is te belangrik om my lewe in gevaar te stel deur daaraan deel te neem.
M.M.S., Brasilië
Julle het gesê dat Satan se versoeking van Jesus “waarskynlik in ’n visioen” was. Was die versoekings nie werklike ondervindinge nie?
C.G.H., Verenigde State
Verskeie aspekte van die Bybelverslag skep probleme as dit letterlik opgeneem word. Daar is byvoorbeeld geen berg wat hoog genoeg is sodat Satan vir Jesus “al die koninkryke van die wêreld en hulle heerlikheid” kon wys nie. Dit is ook onwaarskynlik dat Jesus Satan sou toelaat om hom letterlik ‘saam in die heilige stad in te neem’ of hom “op die kanteel van die tempel” te laat staan (Matteus 4:5-8). Dit moes gevolglik die een of ander soort visioen gewees het. Hoe dit ook al plaasgevind het, Satan se versoeking van Christus was ’n werklikheid. Omdat Jesus geweier het om aan hierdie versoekings toe te gee, het hy sy onkreukbaarheid gehandhaaf.—RED.