Van ons lesers
Maerheid Die artikel “Jongmense vra . . . Waarom is ek so maer?” was vir my baie interessant (22 September 2000). Ek is ’n 32-jarige vrou, maar ek was nog altyd baie maer en vreeslik skaam oor my voorkoms. Ek is my hele lewe lank geterg en name genoem soos ou spykerbeentjies en graatjie. Dit het my dikwels terneergedruk laat voel. Ek hou van julle voorstel dat ons vriende moet soek onder mense wat sal waardeer wat ons innerlik is. Christene moenie ander mense weens hulle fisiese eienskappe verkleineer nie.
W. L., Verenigde State
Genetiese manipulering Gisteraand het ek die reeks “Sal die wetenskap ’n volmaakte samelewing skep?” gelees (22 September 2000). Ek het dit werk toe geneem, en dit het tot ’n baie goeie gesprek gelei met my baas, wat ’n dokter is. Die prente het werklik ’n mens se denkvermoë geprikkel en waardering opgebou. Dankie vir die tyd, moeite en beplanning wat ongetwyfeld aan elke prent bestee word.
N. M., Verenigde State
Dankie dat julle ’n baie ingewikkelde onderwerp op ’n manier verduidelik het wat almal kon verstaan. Ek wonder of wetenskaplikes eienskappe soos liefde, medelye en waardering vir geestelike dinge in ag neem wanneer hulle besluit wie wel mag voortplant en wie ‘ongewens’ is? Meer breinkrag of beter gesondheid waarborg nie noodwendig ’n beter mens nie. Ek het nietemin ’n vraag. Waarom word linkshandigheid ’n afwyking genoem?
J. C., Verenigde State
Die betrokke stelling was ’n aanhaling uit die boek “The Biotech Century”. Die woord ‘afwyking’ het tussen aanhalingstekens verskyn, wat aandui dat die skrywer dit ironies gebruik het. Die stelling beklemtoon van die etiese uitdagings wat genetiese manipulering bied. Die gevaar bestaan dat die mag om die menslike genetiese kode te verander, party na willekeur sal laat besluit dat eienskappe soos velkleur of linkshandigheid iets ongewens is.—RED.
Hoewel die wetenskap nie my geliefkoosde onderwerp is nie, het die artikels my hart geraak. By eugenetika is onvolmaakte mense betrokke wat volmaaktheid nastreef. As hulle ooit bereik wat hulle in gedagte het, sal die siekes en gebreklikes waarskynlik as “ondergeskik” beskou word. Medelye met sulke mense sal verdwyn. In teenstelling hiermee belowe God om mense gedurende die Millennium tot volmaaktheid te lei (Openbaring 20:4, 5). Maar hy sal dit doen sonder om ons wilsvryheid te skend.
S. O., Japan
Die heelal Baie dankie vir die reeks “Die heelal—Het dit per toeval ontstaan?” (8 Oktober 2000). Ek is ’n eerstejaarstudent in biologie, en die artikels het soos ’n handboek gelees—maar dit is geskryf met die tema van ’n intelligente Skepper en nie met dié van die evolusieteorie nie. Hoe verkwikkend is dit tog dat hierdie inligting op ’n betroubare, redelike manier aangebied is!
K. L., Verenigde State
Lewensverhaal Die artikel “Die hoofsaak in my lewe—Om lojaal te bly” (8 Oktober 2000), die verhaal van Alexei Dawidjoek, het my baie aangemoedig. Alexei het verduidelik dat iemand wat hy jare lank vertrou het, sy geestelike broers verraai het. Dieselfde het jare gelede met my gebeur toe ons Christelike werk deur die regering verbied is. Twee “ouer manne” het besonderhede van ons werk aan die geheime polisie gegee. Gevolglik is ons gearresteer en ondervra. Een van hierdie sogenaamde broers is sedertdien oorlede. Die ander een is uit die gemeente gesit. Hy is egter ’n rukkie gelede weer in die gemeente teruggeneem. Hoe dankbaar is ek tog dat ek nou hierdie broer kan groet sonder om enige wrok te koester! Dit is iets wat net Jehovah se gees moontlik kan maak.
D. G., Duitsland