Jongmense vra . . .

Sal God na my gebede luister?

“Ek bid oor alles, want Jehovah is my vriend, en ek weet dat hy my sal help as ek ’n probleem het.”—Andrea.

DIE jong Andrea is seker dat God na haar gebede luister. Maar nie alle jongmense het hierdie selfde vertroue nie. Party voel dat hulle te ver van God verwyderd is om hom te nader. Hulle wonder dalk selfs of God genoeg vir hulle omgee om gebed die moeite werd te maak.

Wat is die geheim van gebed? Eenvoudig gestel, dit behels dat ’n mens ’n ware vriendskap met God moet hê. Die psalmis het gebid: “Hulle wat u Naam ken, sal op U vertrou” (Psalm 9:11). Wat van jou? Ken jy God goed genoeg om die vertroue te hê dat hy na jou gebede sal luister? Voordat jy enigsins verder lees, probeer asseblief die vrae in die venster “Hoe goed ken jy God?” beantwoord. Hoeveel kan jy beantwoord?

HOE GOED KEN JY GOD? Antwoorde op bladsy 27

1. Wat is God se naam, en wat beteken dit?

2. Wat sê die Bybel is God se vier vernaamste eienskappe?

3. Wat was God se grootste blyk van liefde vir die mensdom?

4. Hoe kan ons God se vriend wees?

5. Wat behoort ons gesindheid te wees wanneer ons bid?

Kan jy ten minste van die vrae nou beantwoord, selfs voordat jy die artikel verder lees? Indien wel, weet jy alreeds meer van God as die meeste mense. Maar moontlik toon jou antwoorde dat jy meer kennis omtrent hom moet inneem sodat jy hom beter kan leer ken (Johannes 17:3). Met hierdie doel in gedagte, kyk na net ’n paar van die dinge wat die Bybel ons leer omtrent die “Hoorder van die gebed”.—Psalm 65:3.

God is ’n werklike persoon

Eerstens help die Bybel ons om te besef dat God nie ’n onpersoonlike krag is nie. Hy is ’n persoon met ’n naam, Jehovah (Psalm 83:18, NW). In Hebreeus beteken hierdie naam “Hy laat word”. Hy kan word wat ook al nodig is om sy voorneme uit te voer. ’n Onpersoonlike bondel energie kan dit nie doen nie! Wanneer jy dus bid, kan jy daarvan seker wees dat jy nie met die een of ander abstrakte krag kommunikeer of in die lug praat nie. Jy praat met ’n persoon, iemand wat na jou gebede kan luister en ook daarop kan reageer.—Efesiërs 3:20.

Die jong Diana sê dus: “Ek weet dat Jehovah na my sal luister ongeag waar ek is.” Om daardie vertroue te kan hê, moet God vir jou ’n werklikheid wees! Die Bybel sê: “Hy wat tot God nader, moet glo dat hy is.”—Hebreërs 11:6.

’n Bron van wysheid en krag

God kan ons werklik help omdat sy krag ontsagwekkend is. Daardie krag is onbeperk, soos gesien kan word uit die grootte en kompleksiteit van die stoflike heelal. Die Bybel sê dat Jehovah die naam van elke ster ken—selfs al is daar miljarde der miljarde van hulle! Boonop is hy die bron van al die energie in daardie sterre (Jesaja 40:25, 26). Is dit nie verbasend nie? En tog, al is hierdie feite verbasend, sê die Bybel dat “hierdie maar net ’n greintjie van sy krag is”!—Job 26:14, Today’s English Version.

Dink ook aan Jehovah se eindelose wysheid. Die Bybel sê dat sy gedagtes “baie diep” is (Psalm 92:6). Hy het die mensdom gemaak, en daarom verstaan hy ons beter as wat ons onsself verstaan (Psalm 100:3). Omdat hy “van ewigheid tot ewigheid” bestaan, het hy oneindig baie ondervinding (Psalm 90:1, 2). Daar is niks wat hy nie verstaan nie.—Jesaja 40:13, 14.

Hoe gebruik Jehovah al daardie krag en wysheid? Tweede Kronieke 16:9 (NW) sê: “Jehovah se oë deurloop die hele aarde om sy krag te toon ten behoewe van dié wie se hart volkome teenoor hom is.” Daar is eenvoudig nie ’n probleem wat jy kan hê wat God nie kan oplos of jou nie kan help om te oorkom nie. Die jong Kayla sê: “Onlangs, toe ons gesin deur ’n moeilike tyd gegaan het, het ek tot Jehovah gebid, en ek voel dat hy ons deur omstandighede, probleme en gevoelens gehelp het wat andersins ondraaglik sou gewees het.” Wanneer jy met God praat, gaan jy na die bron van wysheid toe. Jy kan nie beter as dit doen nie!

’n God van geregtigheid en liefde

Maar hoe weet jy of God jou wil help? Omdat Jehovah besluit het om homself te identifiseer, nie deur sy ontsaglike krag of deur sy groot wysheid of selfs deur sy onwrikbare geregtigheid nie. Jehovah is eerder hoofsaaklik bekend vir sy liefde. “God is liefde”, sê 1 Johannes 4:8. En daardie groot liefde gee aan gebed sy krag. Die grootste blyk van sy liefde was toe hy sy Seun as ’n losprysofferande gegee het sodat ons die ewige lewe kan hê.—Johannes 3:16; 1 Johannes 4:9, 10.

Omdat God liefde is, hoef jy nooit te vrees dat hy jou sal ignoreer of onregverdig sal behandel nie. “Al sy weë is geregtigheid”, sê Deuteronomium 32:4 (NW). God se liefde vir jou verseker dat hy na jou sal luister. Dit gee ons die vertroue dat ons ons intiemste gedagtes en gevoelens voor hom kan uitstort.—Filippense 4:6, 7.

Vriendskap met God

Jehovah nooi ons in werklikheid om met hom te praat. Hy wil hê dat ons hom moet ken. Trouens, deur die mensegeskiedenis heen het Jehovah mense genooi om sy vriende te wees. Onder diegene wat God se vriende was, wat hom behaag het, was mans en vroue, oud en jonk. Hulle het mense soos Abraham, koning Dawid en Maria, die moeder van Jesus, ingesluit.—Jesaja 41:8; Lukas 1:26-38; Handelinge 13:22.

Jy kan ook een van Jehovah se vriende wees. So ’n vriendskap beteken natuurlik nie dat jy God as die een of ander gees moet beskou wat jy net aanroep wanneer jy iets wil hê of as jy ’n probleem het nie. Ons gebede kan nie net om ons eie behoeftes draai nie. As ons God se vriend wil wees, moet ons belangstel in wat sy wil is—nie net ons eie nie—en ons moet die wil van God doen (Matteus 7:21). Daarom het Jesus sy dissipels geleer om hoofsaaklik oor die dinge te bid wat vir God belangrik is. Hy het gesê: “Julle moet dan só bid: ‘Ons Vader in die hemele, laat u naam geheilig word. Laat u koninkryk kom. Laat u wil geskied, soos in die hemel, so ook op die aarde’” (Matteus 6:9, 10). Ons gebede moet ook vol lof- en dankbetuigings aan God wees!—Psalm 56:13; 150:6.

Maar ons moet nooit dink dat ons behoeftes of sorge te klein of te onbelangrik is om oor te bid nie. “Selfs al probeer ek openhartig met hom wees”, sê Steve, “voel ek soms dat ek God nie met party alledaagse dinge moet pla nie.” Wanneer jy so begin voel, moet jy probeer onthou wat Jesus sy dissipels geleer het: “Vyf mossies word vir twee muntstukke van geringe waarde verkoop, nie waar nie? Tog word nie een van hulle voor God vergeet nie. . . . Moenie vrees nie; julle is meer werd as baie mossies” (Lukas 12:6, 7). Is dit nie gerusstellend nie?

Dit is dus maklik om te sien dat hoe meer jy van Jehovah weet, des te meer sal jy beweeg word om hom in gebed te nader en des te meer sal jy die vertroue hê dat Jehovah jou kan en sal help. Wat moet dus jou geestesgesindheid wees wanneer jy God in gebed nader? Jy moet eerbiedig, nederig en onselfsugtig wees. Dink jy dat enige hooggeplaaste amptenaar op aarde na jou sal luister as jy iets op ’n trotse of oneerbiedige manier vra? Dan moet jy nie verbaas wees nie dat Jehovah ook van jou verwag om hom en sy standaarde te respekteer voordat hy jou gebede sal verhoor.—Spreuke 15:29.

Duisende godvresende jongmense het geleer om hulle hart voor God uit te stort (Psalm 62:9). “Wanneer Jehovah my gebede verhoor”, sê Brett, “verseker dit my dat hy nog steeds my vriend is.” Wat van jou? Hoe kan jy dieselfde soort vriendskap met God geniet? Twee jong Christene sê die volgende:

Rachel: “Ek voel dat ek Jehovah se Woord deegliker moet bestudeer om nader aan hom te wees, en ek probeer ’n verlange na sulke studie ontwikkel.”—1 Petrus 2:2.

Jenny: “Ek voel dat hoe meer ’n mens in Jehovah se diens doen, hoe nader voel jy aan hom.”—Jakobus 4:8.

Het jy al ooit gewonder hoeveel dit werklik kan help om te bid? ’n Jong Christen sê: “Ek sou nader aan God gevoel het as hy met my sou praat of vir my ’n boodskap sou stuur.” Aangesien Jehovah ons nie hardop antwoord wanneer ons bid nie, hoe help gebed ons dan? Dit sal in ’n toekomstige nommer bespreek word.

[Venster op bladsy 27]

Antwoorde op die vrae op bladsy 25

1. Jehovah. Dit beteken “Hy laat word”.

2. Liefde, krag, geregtigheid en wysheid.

3. Hy het sy enigverwekte Seun, Jesus, gestuur om ten behoewe van ons te sterf.

4. Deur nie net oor ons eie behoeftes besorg te wees nie, maar deur in God se wil belang te stel en dit te doen.

5. Ons moet nederig, eerbiedig en onselfsugtig wees.

[Prente op bladsy 26]

As jy die Bybel bestudeer en uit die skepping leer, sal dit jou help om God beter te leer ken