Van ons lesers
Verpleegsters Ek is al byna drie jaar lank ’n verpleegster. Dit is beslis nie maklik om regstreeks by siekte en lyding betrokke te wees nie. Hoe bemoedigend was dit tog om in die reeks “Verpleegsters—Wat sal ons sonder hulle doen?” (8 November 2000) te lees dat ander ons werk waardeer! Wat selfs bemoedigender is, is die Bybel se belofte dat verpleegsters binnekort nie meer nodig sal wees nie.—Jesaja 33:24.
J.S.B., Brasilië
Ek en my man bestuur ’n verpleegdiens vir buitepasiënte, en hierdie reeks was ’n groot aanmoediging vir ons. Dit het ons gesindheid teenoor ons beroep en teenoor ons pasiënte help verbeter. Knap gedaan!
S. S., Duitsland
Ek het altyd gedink dat verpleegsters ’n ondergeskikte rol speel. Maar hierdie artikels het my laat besef dat verpleegsters baie van die sielkundige lyding help verlig, en hulle voorsien die insig en ondersteuning wat besige dokters dikwels nie kan gee nie. Ek het eksemplare van die tydskrif na ’n hele paar van my vorige klasmaats gestuur wat verpleging studeer.
F. G., Italië
Dankie vir die begrip wat hierdie artikels getoon het. Verpleging het my gehelp om in baie opsigte volwasse te word. Dit was een van die dinge wat daartoe bygedra het dat ek oor die doel van die lewe nagedink en die Bybel begin studeer het. Hierdie Ontwaak! is die grootste blyk van waardering wat ek nog ontvang het. Ek sal nog lank hierdeur bemoedig word!
J. D., Tsjeggiese Republiek
Dankie vir hierdie reeks. Ek is al jare lank ’n geregistreerde verpleegster. Ek het soveel empatie met my pasiënte dat ek trane in my eie oë kry wanneer ek vir hulle oogdruppels ingooi. Ek is seker dat verpleegsters in alle wêrelddele positief op hierdie Ontwaak! sal reageer.
L.A.R., Verenigde State
Babatande As deel van my werk by ’n tandarts se spreekkamer leer ek moeders hoe om na hulle babas se tande om te sien. Die artikel “Hoe om delikate tande te beskerm” (22 November 2000) was van groot hulp omdat dit die gevaar van gisting en bakteriese skade verduidelik. Al die moeders wat my raadpleeg, kry nou ’n afskrif hiervan, en die resultate was sover uitstekend!
T.C.S., Brasilië
Rustelose bene Ek het so pas julle artikel “Het jy rustelose bene?” (22 November 2000) gelees. Ek ly al 18 jaar hieraan, en ek het gedink dat ek die enigste een is. Ek het dikwels weens frustrasie en ’n gebrek aan slaap gehuil, en ek het al allerhande medisyne gebruik. Die enigste algehele oplossing is natuurlik Jehovah se Koninkryk.
S. T., Skotland
Toe ek hierdie artikel lees, was ek verbaas omdat dit my simptome presies beskryf het. Hoewel my toestand nie amptelik as “rustelose bene”-sindroom gediagnoseer is nie, is ek verlig om te weet dat ander mense dieselfde toestand moet verduur. Anders as in die verlede leer ek nou om beter met my toestand saam te leef. Omdat ek nou weet hoe om die onaangename sensasies te hanteer, kan ek dit emosioneel baie makliker verwerk.
A. K., Japan
Ek is 43 jaar oud en vind dat ek nog steeds gedurende die nag deur daardie kriewelrige gevoel in my bene en arms wakker gemaak word. Voordat ek hierdie artikel gelees het, het ek gedink dit is net ek wat hierdie toestand het. Ek het geen benul gehad dat ander net so baie soos ek ly nie. Baie dankie dat julle artikels soos dié druk om ander oor hierdie ongewone toestande in te lig.
D. L., Kanada