Aansteeklike siektes—Rampspoedige gevolge dog voorkombaar
HOEWEL verwoestende aardbewings en vernietigende vloede voorbladnuus is, trek die onsigbare verspreiding van aansteeklike siektes selde die media se aandag. Nogtans “is die sterftesyfer weens aansteeklike siektes (soos vigs, malaria, asemhalingsiektes en diarree) 160 keer hoër as die aantal mense wat in verlede jaar se natuurrampe gesterf het”, sê ’n Rooi Kruis/Rooi Halfmaan-persverklaring van Junie 2000. “En die situasie is besig om te vererger.”
Twee hooffaktore is blykbaar verantwoordelik vir hierdie skokkende syfer. Een is die volgehoue verspreiding van vigs, wat elke uur 300 lewens eis. Vigs “is nie meer ’n siekte nie, dit is ’n ramp”, sê Peter Walker, die direkteur van die Internasionale Federasie van Rooi Kruis- en Rooi Halfmaan-verenigings se rampbeleid. “So ’n wydverspreide siekte vernietig die arbeidsmag en knak die ekonomie.” Die ander faktor is die agteruitgang van openbare gesondheidstelsels, wat ’n dramatiese terugkeer van ou siektes soos tering, sifilis en malaria tot gevolg het. Een Asiatiese land rapporteer byvoorbeeld tans 40 000 nuwe gevalle van tering elke jaar. In een Oos-Europese land het gevalle van sifilisinfeksies in die laaste dekade veertigvoudig toegeneem.
Dit is egter ironies dat aansteeklike siektes, hoewel dit in rampe ontaard het, eintlik van die mees voorkombare rampe is. Trouens, die verslag sê dat die meeste van die 13 miljoen sterfgevalle in 1999 wat die gevolg van aansteeklike siektes was, “voorkom kon geword het teen ’n koste van $5 (VSA) [R40] per persoon”. Dink net hoeveel onnodige sterftes sou voorkom kon geword het as die wêreld se regerings bereid was om R40 per persoon aan gesondheidsorg—’n totaal van R230 miljard—te bestee!
Hoewel dit ’n aansienlike bedrag is, lyk dit na ’n klein bedraggie in vergelyking met wat die wêreld aan ander dienste bestee. In een onlangse jaar het wêreldwye militêre besteding byvoorbeeld R7 biljoen beloop—R1 120 per persoon. Dink net hoeveel meer bestee word om vir oorlog voor te berei as om die verspreiding van siektes te voorkom! Miskien is dit eenvoudig buite die bereik van die mens om die verspreiding van aansteeklike siektes te keer—nie weens onvoldoende fondse nie, maar om ernstiger redes. Menseregerings kan immers nie eers die regte prioriteite stel nie.
[Foto-erkennings op bladsy 31]
X-straal: New Jersey Medical School—National Tuberculosis Center
Foto van man wat hoes: WHO/Thierry Falise