Die Bybel se beskouing

Wie is die antichris?

‘JULLE HET GEHOOR DAT DIE ANTICHRIS KOM.’—1 JOHANNES 2:18.

WAT sou jy doen as jy gewaarsku is dat ’n gevaarlike misdadiger na julle buurt op pad is? Jy sou waarskynlik akkurate besonderhede oor sy voorkoms en metodes probeer kry. Jy sou op jou hoede wees.

’n Soortgelyke situasie bestaan vandag. Die apostel Johannes se woorde waarsku ons: “Elke geïnspireerde uiting wat Jesus nie bely nie, het nie sy oorsprong by God nie. Wat meer is, dít is die antichris se geïnspireerde uiting wat julle gehoor het sou kom, en dit is nou reeds in die wêreld” (1 Johannes 4:3). Is daar so ’n antichris, ’n vyand van God en bedrieër van mense, wat nou die welsyn van die hele mensdom bedreig?

Johannes het die woord “antichris” vyf keer in twee van sy sendbriewe gebruik. Dit verwys na ’n entiteit wat gekant is teen wat die Bybel oor Jesus Christus leer en sluit bedrieërs in wat voorgee dat hulle Christus is of deur hom gestuur is. Die Bybel gee betroubare inligting oor die antichris. Maar soos soms met misdadigers gebeur, het ongegronde berigte oor hierdie raaiselagtige entiteit meer aandag gekry as die waarheid.

Foutiewe uitkenning

Van die dae van die apostel Johannes af het mense beweer dat Johannes se woorde oor ’n antichris na een spesifieke individu verwys. Mense het al verskeie kandidate voorgestel. Eeue gelede het baie gedink dat die Romeinse keiser Nero die antichris is. Later het die vloed van haat en vrees wat Adolf Hitler ontketen het, baie oortuig dat hy die antichris is. Die woord is selfs in verband met die Duitse filosoof Friedrich Nietzsche gebruik. Daarbenewens glo ander dat die antichris nog moet kom en dat hy as ’n slu, genadelose politikus sal verskyn met wêreldoorheersing as sy doel. Hulle glo dat die wilde dier van Openbaring hoofstuk 13 ’n spesifieke verwysing is na die antichris wat deur Johannes gemeld is. Hulle sê dat sy merk, 666, hierdie toekomstige boosdoener op die een of ander manier sal identifiseer.

Diegene wat hierdie idees bevorder, veronderstel dat Johannes na net een antichris verwys het. Maar wat toon sy woorde? Let op wat 1 Johannes 2:18 sê: “Net soos julle gehoor het dat die antichris kom, het daar nou reeds baie antichriste opgestaan.” Ja, “baie antichriste”, nie net een nie, was verantwoordelik vir die geestelike probleme in die eerste eeu. Vandag is daar nie net een nie, maar baie antichriste wat die antichrisklas vorm. Gesamentlik het hulle die mensdom in geestelike verdorwenheid gedompel (2 Timoteus 3:1-5, 13). Wie maak die antichris uit?

Kom ons ondersoek die wilde dier van Openbaring hoofstuk 13 as ’n moontlikheid. Die apostel Johannes het geskryf: “Die wilde dier wat ek gesien het, was soos ’n luiperd, maar sy pote was soos dié van ’n beer, en sy bek was soos ’n leeu se bek” (Openbaring 13:2). Wat beeld hierdie elemente af?

Bybelgeleerdes het ’n verband opgemerk tussen Openbaring hoofstuk 13 en Daniël hoofstuk 7. God het Daniël ’n visioen van figuurlike diere gegee, waaronder ’n luiperd, ’n beer en ’n leeu (Daniël 7:2-6). Wat het hulle volgens God se profeet afgebeeld? Hy het geskryf dat daardie wilde diere aardse konings, of regerings, gesimboliseer het (Daniël 7:17). Ons kan dus die logiese gevolgtrekking maak dat die wilde dier van Openbaring menseregerings afbeeld. Aangesien hierdie regerings God se Koninkryk teëstaan, maak hulle deel van die antichris uit.

Wie maak nog deel uit van die antichris?

Toe die Christus, die Seun van God, op die aarde was, het hy baie vyande gehad. Hoewel hy nou fisies buite bereik is, het hy hedendaagse teenstanders. Let op wie onder hierdie teenstanders tel.

Die apostel Johannes het gesê: “Wie is die leuenaar anders as die een wat ontken dat Jesus die Christus is? Dít is die antichris, die een wat die Vader en die Seun loën” (1 Johannes 2:22). Afvalliges en leiers van valse aanbidding verdraai die duidelike leringe van Jesus in godsdiensbedrog. Hulle verwerp Bybelwaarheid en versprei leuens in die naam van God en Christus. Hulle ontken die ware verhouding tussen die Vader en die Seun deur hulle leerstelling van die Drie-eenheid. Daarom is hulle ook ’n deel van die antichris.

Jesus het sy dissipels in Lukas 21:12 gewaarsku: “Mense [sal] die hande aan julle slaan en julle vervolg en julle aan die sinagoges en gevangenisse oorlewer . . . ter wille van my naam.” Sedert die eerste eeu het ware Christene wrede vervolging verduur (2 Timoteus 3:12). Mense wat sulke behandeling aanstook, werk teen Christus. Hulle is ook ’n deel van die antichris.

“Hy wat nie aan my kant is nie, is teen my, en hy wat nie saam met my bymekaarmaak nie, verstrooi” (Lukas 11:23). Hier sê Jesus dat almal wat teenstanders is van hom en die Goddelike voornemens wat hy ondersteun, ’n deel van die antichris is. Watter einde wag op hulle?

Wat wag op antichriste?

“[God] sal die leuensprekers laat omkom; van die man van bloed en bedrog het die HERE ’n afsku”, sê Psalm 5:7. Is dit op antichriste van toepassing? Ja. Die apostel Johannes het geskryf: “Baie bedrieërs het in die wêreld uitgegaan, mense wat nie bely dat Jesus Christus in die vlees gekom het nie. Dit is die bedrieër en die antichris” (2 Johannes 7). Weens hulle leuens en bedrog sal die almagtige God die antichriste vernietig.

Aangesien die tyd nader kom om daardie vonnis te voltrek, moet ware Christene nie toelaat dat die bedrog en druk van die antichriste, veral van afvalliges, hulle geloof laat verswak nie. Johannes se waarskuwing is dringend: “Gee ag op julleself, dat julle nie die dinge verloor wat deur ons werk tot stand gebring is nie, maar dat julle ’n volle beloning kan verkry.”—2 Johannes 8.

[Foto-erkenning op bladsy 20]

Nero op bladsye 2 en 20: Courtesy of the Visitors of the Ashmolean Museum, Oxford