Van ons lesers

Gespanne kinders Baie dankie vir die reeks artikels “Gespanne kinders—Hoe kan hulle gehelp word?” (22 Julie 1993). Toe ek dit gelees het, het ek nie net van vreugde gehuil nie, maar ook omdat ek hartseer was. Ek was ongeveer vier toe my pa my seksueel aangerand het. Ek het met voortdurende pyn en vrees grootgeword. Ek is nou al 20 jaar lank ’n Christen, en met Jehovah se hulp—en artikels soos dié—het ek verligting begin kry. Hierdie inligting help my ook om my dogter te beskerm.

S. S., Italië

Ek is 17 jaar oud en verkeer onder uiterste emosionele spanning. In ons huis word daar baie geskreeu en geskel. Hoewel my pa nie hierdie artikels gelees het nie, is dit hoogs onwaarskynlik dat elke ouer wat sy kind so mishandel dit kan ignoreer. Ek hoop die artikels sal sulke ouers se oë oopmaak.

T. B., Verenigde State

My driejarige dogtertjie is seksueel misbruik. Hierdie ondervinding het haar baie ontstel; ’n kind is nooit te jonk om seergemaak te word nie. Ek was só kwaad en hartseer dat ek wou hê julle moet ’n artikel skryf wat ouers sal help om te sien hoe sleg dinge vir ons kinders kan wees. Woorde kan nie beskryf watter vreugde ek ondervind het toe ek hierdie artikels gelees het nie. Ek het nog nooit so iets moois gelees nie. Dit toon aan ander dat ons ’n God dien wat die geweldige pyn verstaan wat sommige ervaar.

M. G., Verenigde State

Ek wil julle in die besonder bedank vir die artikel “Ouers wat hulle kinders mishandel—die grootste oorsaak van spanning”. Ek het met dieselfde emosionele en seksuele mishandeling grootgeword. Die artikel het getoon watter nadelige uitwerking dit op die res van jou lewe kan hê. Dis goed om te weet dat iemand werklik verstaan.

B. S., Verenigde State

As ’n slagoffer van seksuele en emosionele mishandeling gedurende my kinderjare kan ek my werklik vereenselwig met die ernstige gevolge wat ongeregverdigde spanning tydens die kinderjare veroorsaak. Tensy jy dit ervaar het, kan jy nie begin verstaan watter verwoestende uitwerking dit op ’n mens se lewe het nie. Die selfhaat, skuldgevoelens, angs en oorweldigende gevoelens van nutteloosheid is by tye ondraaglik. Ek bid dat ouers wat hierdie inligting lees ’n selfondersoek sal doen en hul kinders met empatie en meegevoel sal behandel.

D. I., Verenigde State

Toe ek die buiteblad sien, het ek in trane uitgebars. My sewejarige dogtertjie was so moeilik om te hanteer en ons het nie geweet wat om te doen nie. Ons het haar uiteindelik na ’n hospitaal toe gestuur wat in emosionele en geestesiektes spesialiseer. Die dag nadat sy huis toe gekom het, het ons die nommer oor gespanne kinders gekry. Ons het nog talle onbeantwoorde vrae, maar met behulp van soortgelyke artikels, gebed en die ondersteuning van vriende kry ons ten minste antwoorde op die meeste van ons vrae.

D. G., Verenigde State

Ek is 13 jaar oud en ek het twee jaar gelede baie siek geword. Ek het ook aan seisoensdepressie gely. Ek wens ek het toe hierdie artikels gehad. My ma het my na ’n spesiale kinderhospitaal geneem omdat die plaaslike dokters nie geweet het wat my makeer nie. Die dokters by die hospitaal het uitgevind dat ek ly aan wat julle artikels “psigosomatiese reaksies” noem. Die ouere manne in ons gemeente, sowel as my ouers, het my gehelp om my spanning te oorkom. Ek hoop julle artikels sal ander jongmense ook help om hulle spanning te oorkom.

J. B., Verenigde State

Ek is ook ’n kind wat onder spanning verkeer. Ek is sewe jaar oud en my ma en pa het uitmekaar gegaan. Dít maak my gespanne. Ek het maagprobleme, net soos julle geskryf het. Dankie dat julle omgee.

J. H., Verenigde State