Die Bybel se beskouing

Hoe verdraagsaam is God?

“HOEWEL HY SY GRAMSKAP WIL TOON EN SY KRAG BEKEND WIL MAAK, [HET GOD] VOORWERPE VAN GRAMSKAP, WAT VIR VERNIETIGING GESKIK GEMAAK IS, MET GROOT LANKMOEDIGHEID GEDULD.”—ROMEINE 9:22.

DEUR die geskiedenis heen het God grootskaalse slegtheid en verskriklike goddeloosheid geduld. Meer as 3 000 jaar gelede het Job gekla: “Waarom bly die goddelose lewe, word hulle oud, ja, neem hulle toe in krag? Hulle nakomelinge bestaan voor hulle, in hul gemeenskap, en hul spruite voor hulle oë. Hul huise het vrede, sonder skrik; en die roede van God is op hulle nie” (Job 21:7-9). Ander liefhebbers van geregtigheid, soos die profeet Jeremia, was ook besorg oor God se skynbare verdraagsaamheid teenoor slegte mense.—Jeremia 12:1, 2.

Wat dink jy? Wonder jy waarom God goddeloosheid toelaat? Voel jy soms dat God gouer moet optree en alle goddelose mense dadelik moet vernietig? Kyk wat sê die Bybel oor die perke van God se verdraagsaamheid en die redes daarvoor.

Waarom is God verdraagsaam?

Ons moet eerstens vra: Waarom laat God, wat die hoogste standaarde van regverdigheid het, slegtheid hoegenaamd toe? (Deuteronomium 32:4; Habakuk 1:13). Beteken dit dat hy slegtheid verskoon? Beslis nie! Beskou byvoorbeeld die volgende illustrasie: Gestel ’n snydokter skend die basiese beginsels van higiëne en besorg sy pasiënte ook verskriklike pyn. Sal hy nie summier afgedank word as hy in ’n hospitaal gewerk het nie? Maar daar is sekere omstandighede waar buitengewone verdraagsaamheid dalk nodig is. Sal dit byvoorbeeld nie in ’n uiterste noodgeval, soos op ’n slagveld, dalk nodig wees om toe te laat dat snydokters in primitiewe en gevaarlike omstandighede werk en miskien selfs toerusting en chirurgiese instrumente gebruik wat normaalweg as ongeskik beskou sou word nie?

Net so laat God vandag weens sy geduld baie dinge toe wat geheel en al onaanvaarbaar vir hom is. Hoewel hy goddeloosheid haat, laat hy dit tydelik toe. Hy doen dit met goeie rede. In die eerste plek laat dit tyd toe sodat die uiters belangrike geskille wat deur Satan se opstand in die tuin van Eden geopper is, eens en vir altyd besleg kan word. Dit is geskille wat verband hou met die regverdigheid van die manier waarop God regeer. Die feit dat hy ongeregtigheid geduldig verdra, gee ook mense wat by verkeerde dinge betrokke is, tyd en geleentheid om te verander.

’n Barmhartige, geduldige God

Ons eerste ouers, Adam en Eva, het by Satan se opstand teen God aangesluit. God kon hulle tereg net daar vernietig het. Maar hy was barmhartig en geduldig en het hulle liefdevol toegelaat om kinders te hê. Maar hierdie kinders, en die hele mensegesin wat van hulle afgestam het, is in ’n sondige toestand gebore.—Romeine 5:12; 8:20-22.

Dit is God se voorneme om die mens uit hierdie droewige toestand te red (Genesis 3:15). Maar intussen is hy baie geduldig en barmhartig omdat hy verstaan hoe die onvolmaaktheid wat ons van Adam geërf het, ons beïnvloed (Psalm 51:7; 103:13). Hy is “groot van goedertierenheid” en is gereed en gewillig om ‘menigvuldiglik te vergeef’.—Psalm 86:5, 15; Jesaja 55:6, 7.

God se verdraagsaamheid het perke

Dit sou egter liefdeloos en onredelik van God wees om toe te laat dat oortreding vir ewig voortbestaan. Geen liefdevolle vader sal onbepaald verdraagsaam wees as een van sy kinders sleg is en ander gesinslede opsetlik bly seermaak nie. God se geduld met sonde sal gevolglik altyd in ewewig gehou word met ander eienskappe soos liefde, wysheid en geregtigheid (Exodus 34:6, 7). Wanneer die doel van sy lankmoedigheid bereik is, sal hy slegtheid nie langer duld nie.—Romeine 9:22.

Die apostel Paulus het dit duidelik getoon. “In die vergange geslagte”, het hy by een geleentheid gesê, “het [God] al die nasies toegelaat om in hulle weë voort te gaan” (Handelinge 14:16). By ’n ander geleentheid het Paulus gesê dat ‘God die tye van sulke onkunde oorgesien het’ in die geval van mense wat nie sy wette en beginsels gehoorsaam het nie. “Nou”, het Paulus voortgegaan, “sê [God] vir die mensdom dat hulle almal oral berou moet hê.” Waarom? “Want hy het ’n dag vasgestel waarop hy voornemens is om die bewoonde aarde in regverdigheid te oordeel.”—Handelinge 17:30, 31.

Vind nou baat by God se verdraagsaamheid

Niemand moet derhalwe veronderstel dat hy God se wette kan verontagsaam en dat hy God dan maar net om vergifnis kan vra wanneer hy die gevolge van sy dade wil vryspring nie (Josua 24:19). Baie in eertydse Israel het gedink dat hulle dit kon doen. Hulle wou nie verander nie. Hulle het die doel van God se verdraagsaamheid en geduld gemis. God het hulle slegtheid nie vir ewig geduld nie.—Jesaja 1:16-20.

Die Bybel sê dat ’n mens ‘berou moet toon’—dit wil sê dat jy jou onvolmaakte, sondige toestand berouvol voor God moet erken en dan werklik moet afwyk van wat sleg is—as jy God se finale oordeel wil oorleef (Handelinge 3:19-21). Dan sal Jehovah God jou op grond van Christus se losprysoffer vergewe (Handelinge 2:38; Efesiërs 1:6, 7). God sal op sy bestemde tyd al die pynlike gevolge van Adam se sonde ongedaan maak. Daar sal “’n nuwe hemel en ’n nuwe aarde” wees waar hy nie meer “die teenwoordigheid . . . van dinge wat uitroep om vernietig te word”, sal duld nie (Openbaring 21:1-5; Romeine 9:22, Phillips). Wat ’n wonderlike uitvloeisel van God se buitengewone verdraagsaamheid, wat nogtans nie onbeperk is nie!

[Prent op bladsy 23]

God het Adam en Eva toegelaat om kinders te hê