Die Bybel se beskouing

Fêng sjoei—Is dit vir Christene?

IN ASIË word grafte daarvolgens gekies. Geboue word daarvolgens ontwerp en versier. Eiendom word op grond daarvan gekoop en verkoop. In Chinees word dit fêng sjoei genoem, ’n vorm van geomansie of waarsêery. Hoewel fêng sjoei al eeue lank in Asië gewild is, het dit in onlangse jare na Westerse lande versprei. Sommige argitekte gebruik dit om wolkekrabbers, kantore en huise te ontwerp. Party huisvroue gebruik dit om hulle huis te versier. Talle boeke en webwerwe op die Internet bevorder en leer dit.

Waarom het dit so gewild geword? Volgens een voorstander kan fêng sjoei “’n mens se lewensgehalte, gesondheid, huwelik of verhoudings verbeter en jou groter rykdom en persoonlike gemoedsrus gee”. Hoewel dit alles aanloklik klink, ontstaan die vrae: Presies wat is hierdie gebruik, en hoe moet Christene dit beskou?

Wat is dit?

Die Chinese woorde fêng sjoei beteken letterlik “windwater”. Die oorsprong van fêng sjoei gaan duisende jare terug na die tyd toe talle Oosterse filosofieë ontstaan het. Hieronder was geloof in die sogenaamde balans van jin en jang (duisternis en lig, warm en koud, negatief en positief). Die konsep van jin en jang is met die idee van chʼi gekombineer, wat letterlik “lug” of “asem” beteken. Jin, jang en chʼi, saam met die sogenaamde vyf elemente hout, aarde, water, vuur en metaal, vorm noodsaaklike dele van die fêng sjoei-teorie. Aanhangers van fêng sjoei glo dat kragtige energielyne deur elke landskap loop. Die doel is om plekke uit te wys waar die energieë, of chʼi, van die land en lug in ewewig gebring word. Dit word gedoen deur die landskap self te verander of deur veranderinge in ’n gebou aan te bring wat op ’n spesifieke terrein staan. As hierdie ewewig teweeggebring word, is dit veronderstel om voorspoed te bring vir diegene wat daar werk of woon.

Fêng sjoei-meesters raadpleeg gewoonlik ’n geomantiese kompas.a Dit is ’n klein magnetiese kompas wat in die middel van ’n soort astrologiese kaart gemonteer is. Die kompas het konsentriese sirkels, wat deur lyne verdeel word. ’n Geomantiese kompas bevat gegewens oor dinge soos sterrebeelde, seisoene en die tydsduur van die sonsiklusse. Wanneer ’n terrein of gebou ontleed word, word verskeie kompaslesings geneem. Die fêng sjoei-meester kyk waar die kompasnaald punte op die buitenste lyne en sirkels sny, en hieruit bepaal hy wat nodig is om ’n terrein te “genees”.

Nabygeleë topografie, waterare, rioolpype en selfs die plasing van vensters en deure in ’n gebou kan alles in aanmerking geneem word om te besluit hoe ’n terrein in ewewig gebring kan word. ’n Winkelier in Kanada het byvoorbeeld ’n spieël aan die agterdeur van haar winkel gehang om die posisie van die deure “reg te stel”. ’n Geomant sal dalk ook aanbeveel dat plante of meubels geskuif, ’n prent vervang, windklokkies aangebring of ’n akwarium aangeskaf word om ’n gebou of ’n vertrek in ewewig te bring.

Die Christelike beskouing

Dit is opmerkenswaardig dat die meeste biblioteke boeke oor fêng sjoei saam met boeke oor astrologie en fortuinvertellery kategoriseer. Trouens, Webster’s Ninth New Collegiate Dictionary beskryf geomansie as “waarsêery deur middel van syfers of lyne of geografiese kenmerke”. (Ons kursiveer.) Daar word dus algemeen aanvaar dat fêng sjoei en ander vorme van geomansie as fortuinvertellery beskou word. Dit behels waarsêery en spiritistiese gebruike, wat niks nuuts vir die mensdom is nie.

Toe die Israeliete in die 15de eeu v.G.J. Egipte verlaat en uiteindelik die land Kanaän binnegegaan het, was allerhande vorme van waarsêery iets algemeens in albei lande. God het die volgende deur middel van Moses gesê, soos in Deuteronomium 18:14 opgeteken is: “Hierdie nasies wat jy uit hulle besitting verdrywe, luister na goëlaars en waarsêers; maar wat jou aangaan, die HERE jou God het jou nie so iets toegelaat nie.” Die talle vorme van waarsêery in Egipte en Kanaän het in eertydse Babilon ontstaan. Toe Jehovah die taal van die Babiloniërs verwar het, het hulle na ander plekke toe versprei en die gebruike in verband met Babiloniese waarsêery en spiritisme saam met hulle geneem.—Genesis 11:1-9.

Jehovah God het Israel ernstig en herhaaldelik gewaarsku om nie die ander nasies se gebruike in verband met waarsêery aan te neem nie en gesê: “Daar mag niemand by jou gevind word wat . . . met waarsêery, goëlery of met verklaring van voortekens . . . omgaan nie. . . . Want elkeen wat hierdie dinge doen, is vir die HERE ’n gruwel; en om hierdie gruwels ontwil verdryf die HERE jou God hulle voor jou uit” (Deuteronomium 18:9-12; Levitikus 19:26, 31). Beoefenaars van waarsêery moes vir seker doodgemaak word.—Exodus 22:18; Levitikus 20:27.

Waarom was waarsêery so uitdruklik veroordeel? Handelinge 16:16-19 vertel van ’n vrou met “’n waarsêende demoon”. Ja, daar is ’n baie noue verband tussen waarsêery en spiritisme. Feitlik enige vorm van waarsêery kan ’n mens dus met Satan en sy demone in aanraking bring! Dit kan tot ’n mens se geestelike ondergang lei.—2 Korintiërs 4:4.

Sekere gewilde style van versiering en tuinaanleg, hetsy Oosters of Westers, is dalk oorspronklik deur valse godsdiensgebruike soos fêng sjoei beïnvloed. Maar sulke style het dikwels hulle godsdienstige betekenis heeltemal verloor. Dit sal nietemin ’n definitiewe skending van God se wet wees om fêng sjoei te gebruik om die toekoms te voorspel of om voorspoed of goeie gesondheid teweeg te bring. As ’n mens dit doen, oortree jy die Bybel se duidelike bevel om niks aan te raak wat “onrein” is nie.—2 Korintiërs 6:14-18.

[Voetnoot]

[Prent op bladsy 23]

’n Geomantiese kompas

[Erkenning]

Bladsye 2 en 23: Hong Kong Tourism Board