Ons verken die skatte van Oaxaca
DEUR ONTWAAK!-MEDEWERKER IN MEXIKO
VOLGENS Mexiko se Nasionale Instituut vir Antropologie en Geskiedenis is tot 4 000 verskillende argeologiese terreine al regdeur die suidoostelike Mexikaanse staat Oaxaca geïdentifiseer. Argeoloë het by hierdie terreine relikte van onskatbare waarde opgegrawe, waarvan baie in die Museum van Oaxaca-kulture gesien kan word. Kom besoek saam met ons hierdie fassinerende museum.
Die Museum van Oaxaca-kulturea is geleë in wat vroeër die klooster van Santo Domingo de Guzmán was, in die stad Oaxaca, ongeveer 430 kilometer suidoos van Mexikostad. Daar word juwele, beeldhouwerk, keramiekware en ander waardevolle kunswerke in 14 vertoonsale uitgestal.
In die eerste vertoonsaal word pylpunte uitgestal. Dit is so te sê die enigste oorblywende aanduiding dat nomadiese jaggroepe duisende jare gelede in Oaxaca rondgeswerf het. Daarna gaan ons na die tweede vertrek waar ons oor Monte Albán leer, ’n heuwelstad in die sentrale Oaxaca-vallei. Dit is al “die eerste groot stad in die Amerikas” genoem. Monte Albán het blykbaar tussen 300 en 900 G.J. gefloreer. Maar dit is moontlik reeds in die agtste eeu v.G.J. gebou.
Die ruïnes van Monte Albán toon dat die mense van die stad ’n uitgebreide kennis van astronomie, goudsmeekuns en beeldskrif gehad het. Die argeologiese skatte daarvan kan nog steeds gesien word. Daar is byvoorbeeld ’n aantal piramides wat baie opvallend is in die omliggende vallei. Daarbenewens is groot plazas, ondergrondse gange, ’n terrein vir ’n rituele balspel wat ollama genoem is, en sowat 170 ondergrondse grafte geïdentifiseer.
Op 9 Januarie 1932 het die argeoloog dr. Alfonso Caso Graf 7, ’n Zapotek-graf, ontdek waarin die oorskot van ’n edelman sowel as ’n groot skat gevind is. Onder die voorwerpe wat in hierdie graf gevind is, was juwele van goud, silwer en koper, asook niersteen, turkoois, kristalklip, pêrels en koraal. Baie van hierdie artikels, onder andere goue voorwerpe wat altesaam byna vier kilogram weeg, word ten toon gestel.
Buiten skitterende juwele en edelstene was daar pragtige klei-artefakte en beeldhouwerk van been in Graf 7. Een besonderse voorwerp was ’n pragtige, veelkleurige fles wat met tekeninge versier is. Met die val van Monte Albán het die tydperk geëindig waartydens daar in reliëf op monumente geskryf is, waarna daar van Mixtek-skrif, veral in kodekse, of boeke met blaaie, gebruik gemaak is.
Teen 900 G.J. was al die groot Mesoamerikaanse stede, insluitende Monte Albán, verlate. Gedurende die volgende 600 jaar het krygers en militêre faksies oor die gebied geheers. Van al die groepe wat gedurende hierdie tydperk in Oaxaca gewoon het, het die Mixteke moontlik die grootste erfenis nagelaat. The Encyclopedia Americana sê: “Die Mixteke was meestervakmanne en -kunstenaars, wat uitsonderlike juwele en prenteboeke gemaak het.”
Ons sal graag weer wil terugkom om meer te leer omtrent Mexiko se stryd om onafhanklikheid van Spanje. Maar intussen kan jy self die skatte van eertydse Mexiko kom verken. Jy sal nie spyt wees dat jy dit gedoen het nie!
[Voetnoot]
a Voorheen bekend as die Streekmuseum.
[Prente op bladsy 24, 25]
Monte Albán het tussen 300 en 900 G.J. gefloreer
Onder: Borsplaat en ander voorwerpe uit Graf 7 en flesse uit dieselfde tydperk
[Erkenning]
Alle foto’s: Reproducción Autorizada por el Instituto Nacional de Antropología e Historia CONACULTA-INAH-MEX