Die twee kante van ’n ramp

Deur Ontwaak!-medewerker in Mexiko

GODOFREDO en Gisela, ’n egpaar wat Getuies van Jehovah is, en hulle klein kindertjies was in hulle huis van asfaltpersbord toe orkaan Pauline die kus van Oaxaca, Mexiko, getref het. Die stukke persbord is een vir een afgeskeur. Die gesin is uiteindelik heeltemal sonder beskutting gelaat toe net ’n deel van die raamwerk nog oorgebly het.

Met die agt maande oue baba in Gisela se arms en die ander drie kinders wat aan haar en Godofredo vasklou, het hulle meer as twee uur lank teen die sterk wind geworstel. Die geweld van die orkaan het hulle soms omgewaai en hulle op die vloer rondgerol. Hulle almal het dit op die ou end oorleef.

In Acapulco het Nelly, een van Jehovah se Getuies, haar gesin wakker gemaak toe sy sien dat water die huis binnestroom. Die water het ongelooflik vinnig gestyg, en die krag van die stroom het Nelly onder die water ingetrek, maar haar dogter het haar uit die water getrek. Hulle het aan die vensterraam vasgehou en hulpeloos toegekyk hoe die water tot by hulle nekke styg. Toe het hulle ’n man na hulle hoor roep. Dit was hulle buurman; hy het hulle gehelp om uit te kom en hulle na sy huis toe geneem. Van daar af het hulle geskok toegekyk hoe ’n motor die huis heeltemal verpletter waarin hulle nog ’n paar minute tevore was.

Op Woensdagmiddag, 8 Oktober 1997, het orkaan Pauline die kus van die staat Oaxaca met winde van meer as 200 kilometer per uur geteister. Toe, in die vroeë oggendure van Donderdag, 9 Oktober, het die orkaan verwoesting gesaai in die staat Guerrero, veral in die stad Acapulco, en dit het golwe van tien meter veroorsaak, asook vloedwaters wat huise, motors, diere en mense meegesleur het. Teen die tyd dat die storm verby was, was daar dongas van tien meter diep waar daar vroeër strate was. Volgens die koerant The News het die Rooi Kruis in Mexiko geskat dat daar in die twee state altesaam 400 mense dood en 20 000 tot 25 000 dakloos gelaat is. Maar te midde van hierdie ramp was daar hartroerende bewyse van Christelike liefde.

Jehovah se volk reageer

Toe die nuus van orkaan Pauline bekend geword het, het die takkantoor van Jehovah se Getuies in Mexiko oproepe begin ontvang van Getuies regoor die land wat wou weet wat hulle kon doen om te help. Hulp is ook van die buiteland af aangebied. ’n Noodlenigingskomitee is gou op die been gebring, en tonne voedsel, klere en ander artikels is versprei.

Boumateriaal is ook gekoop, en herstelwerk aan die 360 huise en etlike Koninkryksale wat beskadig of vernietig is, het onmiddellik begin. Duisende Christenbroers en -susters was besig om noodlenigingsvoorraad te skenk, te sorteer, te verpak, te vervoer en af te lewer of om skade te herstel.

Party winkeliers was so beïndruk deur die Getuies se bedrywighede dat hulle goedgunstiglik voedsel, boumateriaal en ander goed geskenk het. Ander het artikels teen ’n verlaagde prys aan hulle verkoop. Die Getuies wat deur die orkaan getref is, is diep geraak deur die liefde wat aan hulle betoon is, veral toe hulle die aanmoedigende briewe gelees het wat by die voorraad ingesluit is.

Ongelukkig het José Faustino—’n 18-jarige Getuie—en drie ander mense wat die Bybel saam met die Getuies gestudeer het in die orkaan omgekom. Hulle familielede, José se ouers in die besonder, het die gebede ten behoewe van hulle waardeer sowel as die bemoediging wat hulle van die gemeente ontvang het.

’n Paar positiewe gevolge

Ná orkaan Pauline het baie mense vir ’n Bybelstudie gevra, onder andere ongelowige familielede van die Getuies, en baie bure was gewilliger om na die Getuies se boodskap van hoop te luister. Getuies het ook met die algemene verspreiding van noodlenigingsvoedsel gehelp. In een geval, toe ’n Getuie ’n man gevra het waarom hy Jehovah se Getuies gekies het om die voedsel te versprei wat sy maatskappy geskenk het, het die man geantwoord: “Omdat ek weet dat julle georganiseerd en eerlik is. Daarbenewens weet julle werklik wie hierdie hulp die nodigste het, aangesien julle die mense in julle gebied ken.”

Namate die einde nader kom en daar al hoe meer rampe regoor die wêreld plaasvind, is dit altyd bemoedigend om Bybelbeginsels in werking te sien, selfs ten spyte van rampspoed.

[Prent op bladsy 26]

Kinders help met herbouing

[Prent op bladsy 27]

Getuies besig om ’n nuwe Koninkryksaal ná orkaan Pauline in Oaxaca te bou