Van ons lesers

Mishandelde vroue Ek weet nie hoe om my waardering uit te spreek vir die reeks “Hulp vir mishandelde vroue” nie (8 November 2001). Ek is ’n slagoffer van gesinsgeweld, en selfs toe ek gerapporteer het wat met my gebeur, was ek nog steeds oortuig dat niemand begrip gehad het vir die pyn, die angs en die diepe hartseer wat ek op geen manier kon verlig nie. Hierdie artikels beskryf presies hoe ek voel.

N. L., Italië

Toe ek die koevert oopmaak en die voorblad sien, het my oë vol trane geword. Ek het onmiddellik weer die tydskrif toegevou omdat ek gevoel het dit handel oor ’n deel van my verlede wat ek liewer wou vergeet. Ek het vir krag gebid om die tydskrif weer op te tel. Hoe dankbaar is ek tog dat ek dit gedoen het! Hierdie reeks het my help besef dat ek nie alleen ly nie. Toe ek die woorde “vroueslanery is ’n ernstige sonde in God se oë” lees, was dit soos strelende olie op ’n wond. Dankie vir sulke vertroostende artikels wat oor werklike situasies handel.

D.G.M., Verenigde State

Ek het dieselfde ondervinding as die vroue in die artikels gehad. Ek het vir myself gesê dat drank en die omgewing waarin my man grootgeword het, die oorsake was. Al kan hierdie dinge ’n rol speel, was dit vertroostend om te weet dat daar geen verskoning vir geweld is nie. Ek wil bitter graag hê dat my man die Bybel moet lees en Jehovah se liefde moet leer ken.

S. I., Japan

Hierdie reeks het my diep geraak, aangesien ek ’n mishandelde vrou is. Ek het net soos Roxana gevoel. Dit het my baie gehelp om te besef dat daar ander mense is wat weet hoe ’n mishandelde vrou voel. Ek het uit hierdie artikels geleer dat my man se gesindheid nie my skuld is nie. Dit het my ook help besef dat God my as belangrik beskou, al dink my man dat ek onwaardig en niks werd is nie. Dankie vir sulke nuttige inligting. Dit is baie beter as rykdom!

B. L., Filippyne

Julle artikel het al die pyn en frustrasie beskryf wat ek nie in woorde kon uitdruk nie. Hierdie reeks het my help besef dat Jehovah die verstandelike en emosionele angs verstaan wat deur hierdie probleem veroorsaak word. Hou asseblief aan om sulke artikels te skryf, want dit is ’n probleem waaroor mense moet praat en wat begrip nodig het. Ek is seker dat baie net soveel vertroosting uit hierdie artikels sal kry as wat ek daaruit gekry het.

K. E., Australië

Ek is grootgemaak deur ’n pa met ’n vinnige humeur, en ek word dikwels kwaad vir my man. Partykeer—nee, baie keer—slaan ek hom selfs. My man is sterker as ek, en daarom het ek nie gedink dat ek hom eintlik seermaak nie.Toe ek lees wat die artikel sê—dat dit in God se oë ’n ernstige sonde is om jou maat te slaan—was ek geskok. My man is ’n sagmoedige kneg van Jehovah. Ek wil met my hele hart vir hom sê hoe jammer ek is. Ek is dankbaar teenoor Jehovah vir hierdie dissipline.

T. I., Japan

Hierdie tydskrif het trane in my oë laat opwel. Dit was asof ek my eie ondervinding gelees het. Maar onlangs het my man vrae oor die Bybel begin vra. Hy het al van die vergadering by die Koninkryksaal bygewoon, en hy studeer nou die Bybel. Ek kan my vereenselwig met Lourdes se woorde op bladsy 11: “Soms dink ek dat ek droom!”

E. R., Verenigde State