Die Bybel se beskouing

Pornografie—Is dit net ’n onskadelike tydverdryf?

TOE Victoriaanse argeoloë die puinhope van eertydse Pompeji stelselmatig begin opgrawe het, was hulle geskok oor wat hulle ontdek het. Oral tussen die pragtige muurskilderings en kunswerke kon talle seksueel eksplisiete skilderye en beeldhouwerke gesien word. Die owerheid was geskok oor die afstootlikheid daarvan en het dit in geheime museums weggebêre. Hulle het die term “pornografie” geskep—van die Griekse pornē en graphos, wat “skryf oor prostitute” beteken—om hierdie eksplisiete artefakte te klassifiseer. Vandag word pornografie gedefinieer as die “uitbeelding in skrif, deur die film, ens. van die seksuele . . . met die doel om te prikkel”.

Deesdae kom pornografie oral voor en word dit blykbaar deur die meeste mense in vandag se samelewing aanvaar. Terwyl dit vroeër iets was wat net in berugte bioskope en ongure buurte gevind kon word, is dit nou in baie gemeenskappe heeltemal aanvaarbaar. In die Verenigde State alleen bring pornografie ’n jaarlikse inkomste van meer as tienmiljard dollar (R114 miljard) in!

Party voorstanders van pornografie bevorder dit as ’n manier om lewe te gee aan ’n vervelige huwelik. ’n Skrywer sê: “Dit stimuleer ’n lewendige verbeelding. Dit bied voorligting oor seksuele genot.” Ander beweer dat dit eerlikheid en openhartigheid oor seksuele sake aanmoedig. “Pornografie hou voordele vir vroue in”, beweer die skryfster Wendy McElroy.

Maar nie almal stem hiermee saam nie. Pornografie is al dikwels verbind met ’n wye verskeidenheid skadelike gevolge en gesindhede. Party voer aan dat daar ’n skakel is tussen pornografie en verkragting sowel as ander vorme van geweld teen vroue en kinders. Die berugte reeksmoordenaar Ted Bundy erken dat hy ’n “groot begeerte vir gewelddadige pornografie” gehad het. Hy sê: “Hierdie toestand word nie onmiddellik deur die individu opgemerk of as ’n ernstige probleem geïdentifiseer nie. . . . Maar hierdie belangstelling . . . word mettertyd toegespits op dinge van ’n seksuele aard waarby geweld betrokke is. Ek kan nie genoeg beklemtoon dat dit iets is wat geleidelik ontwikkel nie. Dit gebeur nie binne ’n kort tydjie nie.”

In die lig van die eindelose debatte hieroor en die algemeenheid van pornografiese materiaal in ons dag, wonder jy moontlik: ‘Gee die Bybel enige riglyne oor hierdie saak?’

Die Bybel praat reguit oor seks

In die Bybel word seksuele sake openlik en sonder preutsheid bespreek (Deuteronomium 24:5; 1 Korintiërs 7:3, 4). “Verheug jou met die vrou van jou jeug”, het Salomo gemaan. “Laat haar borste jou te alle tye bedwelm” (Spreuke 5:18, 19). Duidelike raad en leiding word oor geslagsomgang gegee, onder andere die perke waarin dit geniet mag word. Seks buite die huweliksreëling word verbied. So ook alle verdorwe seksuele gebruike.—Levitikus 18:22, 23; 1 Korintiërs 6:9; Galasiërs 5:19.

Selfs binne hierdie grense moet selfbeheersing en respek aan die dag gelê word. “Laat die huwelik onder almal eerbaar wees”, het die apostel Paulus geskryf, “en die huweliksbed sonder verontreiniging” (Hebreërs 13:4). Hierdie raad vorm ’n skerp teenstelling met die doel en boodskap van pornografie.

Pornografie skep ’n verwronge beeld van seks

Pornografie beeld geslagsomgang nie uit as ’n mooi en intieme liefdesblyk tussen ’n man en vrou in ’n eerbare huwelik nie, maar dit skep eerder ’n lae en verwronge beeld van die seksdaad. Losse en verdorwe seks word as opwindend en begeerlik uitgebeeld. Persoonlike bevrediging met min of geen inagneming van die ander persoon kom sterk na vore.

Vroue, mans en kinders word uitgebeeld as voorwerpe wat slegs vir seksuele bevrediging bestaan. “Skoonheid word gemeet aan die proporsie van liggaamsdele, wat tot onrealistiese verwagtinge aanleiding gee”, sê een verslag. “Om vroue uit te beeld as naamlose, leë seksspeelgoed wat altyd beskikbaar/gereed is vir mans, wat hulleself ontklee en hulle liggame ontbloot vir geldelike gewin en vermaak, kan onmoontlik ’n boodskap oordra wat vereenselwig kan word met gelykheid, waardigheid en menslikheid”, is die slotsom waartoe ’n ander verslag kom.

In teenstelling hiermee “gedra [die liefde] hom nie onwelvoeglik nie”, het Paulus geskryf. “[Dit] soek nie sy eie belang nie” (1 Korintiërs 13:5). Die Bybel vermaan mans om “hulle vrouens lief te hê soos hulle eie liggaam” en om “aan hulle eer toe te ken”, om vrouens nie bloot as voorwerpe vir seksuele bevrediging te beskou nie (Efesiërs 5:28; 1 Petrus 3:7). Kan ’n mens sê dat iemand, of dit ’n man of vrou is, hom werklik welvoeglik gedra as hy sy verstand gereeld voed met seksueel eksplisiete beelde van ander mense? En betoon daardie persoon werklik eer en respek aan ander? Pornografie bevorder nie liefde nie, maar eerder egosentriese, selfsugtige begeertes.

Dan is daar nog ’n faktor. Soos met enige ander ongeoorloofde prikkeling, word dit wat aanvanklik opwindend is, gou alledaags en vervelig. “Met verloop van tyd”, sê ’n skrywer, “wil [mense wat na pornografie kyk] meer eksplisiete en verdorwe materiaal hê . . . Die seksuele gebruike wat hulle moontlik van hulle maat verwag, word al hoe vreemder . . . , en hulle [eie] vermoë om werklik liefde te betoon, neem af.” Klink dit soos ’n onskadelike tydverdryf? Daar is egter ’n ander belangrike rede om pornografie te vermy.

Die Bybel en wellus

Hoewel baie mense vandag voel dat dit glad nie verkeerd of gevaarlik is om seksuele fantasieë te voed nie, stem die Bybel nie hiermee saam nie. Dit toon duidelik dat daar ’n wesenlike verband is tussen die dinge waarmee ons ons verstand voed en hoe ons optree. “Elkeen word beproef deurdat hy deur sy eie begeerte meegesleep en verlok word”, sê die Christendissipel Jakobus. “Daarna, wanneer die begeerte vrugbaar geword het, baar dit sonde” (Jakobus 1:14, 15). Jesus het gesê: “Elkeen wat aanhou om na ’n vrou te kyk om hartstog vir haar te hê, [het] reeds in sy hart met haar egbreuk gepleeg.”—Matteus 5:28.

Soos Jakobus en Jesus albei toon, reageer mense op hulle innerlike begeertes. As hierdie begeertes gevoed en gekoester word, kan dit mettertyd kragtige obsessies word. Dit is baie moeilik om obsessies te onderdruk en dit kan iemand uiteindelik daartoe dryf om sekere dinge te doen. Wat ons dus in ons verstand inneem, kan uiteindelik ’n kragtige uitwerking op ons dade hê.

Seksuele fantasieë kan ’n direkte uitwerking hê op ons aanbidding van God. Daarom het Paulus geskryf: “Maak dan dood julle liggaamsdele . . . ten opsigte van hoerery, onreinheid, geslagsdrif, skadelike begeertes en hebsug, wat afgodediens is.”—Kolossense 3:5.

Paulus verbind geslagsdrif hier met hebsug, wat ’n oordrewe begeerte is vir iets wat ’n mens nie het nie.a Hebsug is ’n vorm van afgodediens. Waarom? Omdat hebsug veroorsaak dat dit wat begeer word, bo alle ander dinge gestel word, insluitende God. Pornografie laat ’n wellustige begeerte ontstaan vir iets wat nie joune is nie. “Jy wil iemand anders se sekslewe hê. . . . Die enigste ding waaraan jy kan dink, is daardie begeerte vir iets wat jy nie het nie. . . . Die dinge wat ons wellustig begeer, is die dinge wat ons aanbid”, sê ’n godsdiensskrywer.

Pornografie is verderflik

“Alles wat kuis is, alles wat lieflik is, alles waarvan goed gepraat word, watter deug . . . daar ook al is, hou aan om hierdie dinge te bedink”, maan die Bybel (Filippense 4:8). Iemand wat sy oë en verstand met pornografie voed, verwerp Paulus se vermaning. Pornografie is onwelvoeglik omdat dit die intiemste en persoonlikste dade aan ander vertoon. Dit is verfoeilik, want dit verlaag en verdierlik mense. Dit is liefdeloos, want dit bevorder nie teerheid of besorgdheid nie. Dit bevorder slegs selfsugtige wellus.

Omdat pornografie onsedelike en onbetaamlike dade vryelik uitbeeld, verswak of ondermyn dit ’n Christen se pogings om ’n ‘haat vir wat sleg is’, te ontwikkel (Amos 5:15). Dit beklemtoon die beoefening van sonde en is heeltemal in stryd met Paulus se aansporing aan die Efesiërs: “Laat hoerery en elke soort onreinheid of hebsug nie eens onder julle genoem word nie, net soos dit heilige mense betaam; ook nie skandelike gedrag . . . of onwelvoeglike skertsery nie, dinge wat nie betaamlik is nie.”—Efesiërs 5:3, 4.

Pornografie is geensins onskadelik nie. Dit buit mense uit en is verderflik. Dit kan verhoudings vernietig en verander die natuurlike daad van geslagsomgang in iets waarna mense wil kyk om seksueel geprikkel te word. Dit vergiftig die verstand en geestelikheid van die persoon wat daarna kyk. Dit bevorder selfsugtige, gierige gesindhede en leer mense om ander as voorwerpe te beskou wat slegs daarvoor geskik is om hulle wellus te bevredig. Dit ondermyn pogings om goed te doen en ’n skoon gewete te hê. Bowenal kan dit ’n mens se geestelike verhouding met God skaad of selfs vernietig (Efesiërs 4:17-19). Pornografie is waarlik ’n plaag wat vermy moet word.—Spreuke 4:14, 15.

[Voetnoot]

[Prent op bladsy 20]

Pornografie verdraai ’n mens se beskouing van die teenoorgestelde geslag