Vermy die strik van dobbelary

“Dobbelary het nie my gesondheid aangetas nie, en ek het altyd beheer gehad oor hoeveel geld ek aan dobbelary bestee. Maar wanneer ek aan ’n lotery deelgeneem het, moet ek erken dat ek altyd die nommers gekies het wat ek as my geluksnommers beskou het.”—Linda.

BAIE dobbelaars begin later aan geluksnommers of gelukbringers glo. Hulle meen dalk dat hulle nie baie ernstig is oor hierdie bygelowigheid van hulle nie, maar hulle bly nietemin dikwels daarby.

Party dobbelaars bid selfs tot God om te vra dat hy hulle help om te wen. Die Bybel toon egter dat God diegene veroordeel wat beweer dat hulle hom aanbid, maar “’n tafel vir die Geluksgod dek” (Jesaja 65:11). Ja, God verafsku gebruike wat ’n bygelowige vertroue in geluk bevorder. Die blote aard van dobbelary moedig blinde vertroue in die geluksgodin aan.

Dobbelary bevorder ook ’n liefde vir geld op onbeskaamde wyse. In vandag se toenemend sekulêre samelewing het geld self ’n substituutgod geword en dobbelary ’n gewilde manier om dit te aanbid. Die nuwe katedrale is die spoggerige casino’s, en die nuwe geloofsbelydenis is dat gierigheid goed is. Navorsers het gevind dat die oorgrote meerderheid van mense wat casino’s besoek, sê dat hulle dit doen, nie vir die vermaak of die atmosfeer nie, maar om “hope geld” te wen. Die Bybel waarsku egter: “Die liefde vir geld is ’n wortel van allerhande skadelike dinge, en deur hierdie liefde na te streef, is party van die geloof af op ’n dwaalspoor gebring en het hulle hulleself oral met baie pyne deurboor.”—1 Timoteus 6:10.

In 1 Korintiërs 6:9, 10 sê die Bybel reguit: “Moenie mislei word nie. Geen . . . afgodedienaars . . . of gierigaards . . . sal God se koninkryk beërf nie.” Gierigheid is nie net ’n aftakelende maatskaplike siekte nie; dit is ook ’n dodelike geestelike siekte—maar ’n siekte wat wel genees kan word.

Hulle het die krag gevind om te verander

“Ek het dikwels probeer om op te hou dobbel”, vertel Kazoesjige, wat in die eerste artikel gemeld is. “Ek het besef dat my dobbelary saam met my vriende by die renbaan besig was om my gesin te verwoes. Ek het altyd enige geld wat ek gewen het, weer verloor. Ek het selfs die geld weggedobbel wat my vrou vir die geboorte van ons tweede seun gespaar het, en ek het uiteindelik met my firma se geld begin dobbel. Gevolglik het ek my selfrespek heeltemal verloor. My vrou het dikwels gehuil en my gesmeek om op te hou dobbel, maar ek kon net nie.”

Kazoesjige het toe die Bybel saam met Jehovah se Getuies begin studeer. Hy sê: “Hoe meer ek die Bybel gelees het, hoe sterker het my oortuiging geword dat daar ’n God is en dat ek daarby baat sal vind om na hom te luister. Ek het besluit om met die krag wat God voorsien, op te hou dobbel. Tot my verbasing het ek nie net opgehou dobbel nie, maar ek het dit ook begin haat. Wanneer ek nou terugdink aan die probleme wat my dobbelary my gesin besorg het, voel ek baie hartseer. Hoe dankbaar is ek tog teenoor Jehovah God dat hy my gehelp het om op te hou dobbel en dat hy my help om ’n sinvolle lewe te lei!”—Hebreërs 4:12.

John, wat ook in die eerste artikel gemeld word, het eweneens die Bybel begin studeer. Hy vertel: “My studie van die Bybel het my gehelp om opnuut na my lewe te kyk. My oë het vir die eerste keer werklik oopgegaan, en ek het gesien hoe my dobbelary my en my gesin benadeel. Ek het tot die besef gekom dat dobbelary ’n selfsugtige, gierige gees in mense bevorder—eienskappe wat Jehovah haat. Namate ek met my studie voortgegaan het, het my liefde vir Jehovah my die krag gegee om van dobbelary weg te breek. Ek het begin dobbel omdat ek gedroom het van ’n beter lewe. Noudat ek dobbelary opgegee het en Jehovah gelukkig dien, is daardie droom bewaarheid.”

John se vrou, Linda, het ook besluit om glad nie meer te dobbel nie. “Dit was nie maklik nie”, sê sy. “Maar nadat ek en my man die Bybel saam met Jehovah se Getuies begin studeer het, het ek geleer om te konsentreer op die belangriker dinge in die lewe. Ek het nie net geleer om die dinge lief te hê wat God liefhet nie, maar ook om die dinge te haat wat hy haat, met inbegrip van alle vorme van gierigheid. Ek geniet nie net ’n sinvoller lewe nie, maar ek het ook meer geld in my beursie.”—Psalm 97:10.

Deur ’n verhouding met Jehovah God op te bou, kan jy ook die nodige krag en wysheid kry om die strik van dobbelary te vermy. Dit sal jou finansieel, emosioneel en geestelik tot voordeel strek. Dan sal jy die voorreg geniet om self te ondervind hoe waar die woorde in Spreuke 10:22 is: “Die seën van Jehovah—dit maak ryk, en hy voeg daar geen pyn by nie.”

[Lokteks op bladsy 11]

Gierigheid is nie net ’n aftakelende maatskaplike siekte nie; dit is ook ’n dodelike geestelike siekte

[Venster/Prente op bladsy 9]

Dobbelary en die bonatuurlike

In ’n verslag aan die Nasionale Kommissie van Ondersoek oor die Impak van Dobbelary het navorsers van Duke-universiteit gesinspeel op ’n verband tussen die manier waarop dobbelary geadverteer word en geloof in die bonatuurlike. Die verslag sê: “Baie [lotery]advertensies is deur en deur materialisties . . . En tog is dit nie die materialisme wat met harde werk en uithouvermoë verband hou nie, maar eerder dié wat met goeie geeste en towerlampe verband hou, wat op hoop, drome en bygelowigheid gegrond is. En elke loterybestuurder weet dat baie van sy of haar beste klante hulle weddenskappe plaas volgens persoonlike bygelowe, astrologiese kaarte, sogenaamde sieners en die gewilde ‘droomboeke’ wat nommers aangee wat met name, datums en drome ooreenkom. In plaas daarvan om te beklemtoon dat al die nommers dieselfde kans staan om gekies te word en dat die verwagte uitbetaling in weddenskappe waar die prysgeld gedeel word, kleiner sal wees as gewilde nommers gespeel word, spoor loteryagentskappe spelers eerder aan om nommers wat vir hulle persoonlike betekenis het, te kies (en daarby te bly).”

[Prente op bladsy 10]

‘My liefde vir Jehovah het my die krag gegee om van dobbelary weg te breek.’—John

“Ek geniet nie net ’n sinvoller lewe nie, maar ek het ook meer geld in my beursie.”—Linda

[Prente op bladsy 10]

“Tot my verbasing het ek nie net opgehou dobbel nie, maar ek het dit ook begin haat.”—Kazoesjige