Lomerige tieners—’n Rede tot kommer?
DEUR ONTWAAK!-MEDEWERKER IN KANADA
AS ’N mens te min slaap kry, tas dit jou verstandelike vermoëns en jou geheue aan, en adolessenteleerlinge is onder dié wat die grootste gevaar loop, sê die Kanadese koerant Globe and Mail. “’n Gebrek aan slaap by kinders en adolessente word ook verbind met gedragsprobleme, geïrriteerdheid en hiperaktiwiteit.” Wetenskaplikes het die slaapgewoontes van sowat 2 200 hoërskoolleerlinge bestudeer en gevind dat ongeveer 47 persent minder as die aanbevole agt uur slaap elke nag gekry het.
Hoewel jongmense se lewenswyse hulle dikwels die nodige slaap ontneem, “het van hulle dalk ook ongediagnoseerde mediese probleme”, sê die Globe. “Sowat 4 persent van kinders tussen die ouderdomme van 4 en 18 ly aan slaapapnee.” Tydens slaap word die lugweg aan die agterkant van die keel gedeeltelik of heeltemal afgesluit, wat die vloei van suurstof belemmer. Die brein ontspan dus nie heeltemal nie, en kinders is moeg en nukkerig wanneer hulle wakker word.
Tekens van ’n moontlike versteuring is onder meer ’n gesnork of fluitgeluide gedurende slaap, gereelde hoofpyne in die oggend en geheue- en konsentrasieprobleme sowel as aanhoudende, uitermatige lomerigheid bedags. Ouers word aangespoor om af en toe na hulle kinders te luister wanneer hulle diep slaap. Dr. Robert Brouillette, ’n pediatriese slaapdeskundige by die Montreal-kinderhospitaal, sê dat ’n kind met ’n versteuring kan ophou asemhaal terwyl hy slaap, al beweeg sy bors nog steeds op en af. “Die onderbreking sal eindig wanneer die kind heeltemal of net half wakker word [en] ’n paar keer asemhaal voordat hy weer onmiddellik aan die slaap raak.” Hierdie episodes kan elke nag honderde kere voorkom en veroorsaak dat ’n kind heeltemal uitgeput voel wanneer hy wakker word.
Die Amerikaanse Assosiasie vir Slaapversteurings beveel ’n koel, donker slaapkamer aan, waarin daar niks is wat die aandag sal aflei, soos televisies of rekenaars, nie. Dit sal kinders en tieners ook help om ’n goeie nagrus te kry as hulle gereeld op dieselfde tyd bed toe gaan en opstaan. Party wat slaapapnee het, gebruik ’n toestel wat positiewe druk in die lugweg handhaaf deur lug saggies deur die neus en mond te blaas om die agterkant van die keel tydens slaap oop te hou. Een kinderarts het gesê: “Slaap is belangriker as watter kos ons eet. Dit is belangriker as oefening. Ons hormone, ons emosies en ons immuunstelsel word deur slaap gereguleer.”