Die Vía Crucis-fees in Mexiko

DEUR ONTWAAK!-MEDEWERKER IN MEXIKO

SOWAT 300 godsdiensfeeste word elke jaar in Mexiko gehou om die dood van Jesus te herdenk. Een van die grootstes is die Vía Crucis, met sy optogte en uitbeeldings van die laaste dae van Jesus se lewe. Vía Crucis kom van Latyn en beteken “die Kruisweg”. In die Iztapalapa-streek van Mexikostad verduidelik die direkteur van die plaaslike kultuurvereniging die fees se oorsprong: ‘In 1833 was daar ’n choleraepidemie in Iztapalapa. Om die epidemie stop te sit, het lede van die gemeenskap die Passie opgevoer.’

’n Tipiese Vía Crucis vind soos volg plaas: Skares mense kom byeen om ’n uitbeelding te sien van die Joodse leiers, die hoofmanne oor honderd, Jesus se apostels en die vroue wat hom gevolg het, insluitende Maria. ’n Jong man vertolk die rol van Jesus. Hy het dele uit die Bybel gememoriseer wat hy aanhaal terwyl die gebeure ontvou. Die akteurs dra pruike, baarde en snorre en trek dik mantels aan. “Jesus” word ook deur “Nasareners” gevolg wat kaalvoet is of leersandale dra, met doringkrone op hulle kop om die lyding wat Jesus verduur het, uit te beeld. Soms is daar tot 2 500 van hulle. Gedurende die dag dra hulle kruise tot op Cerro de la Estrella (Sterheuwel), die plek wat gekies is om Jesus te “kruisig”.

Smouse verkoop produkte soos hoede, drinkgoed, godsdiensfigure wat op wange of arms gestensil kan word, ballonne, lekkers vir kinders en baie ander dinge. Daar word selfs pretparkritte vir die geleentheid gereël.

In die stad Querétaro probeer boetvaardiges met kettings aan hulle voete loop. In Taxco dra mans byna vyf uur lank bondels dorings van 40 tot 50 kilogram op hulle rug. Ander neem deel aan die optog terwyl hulle hulle eie liggaam gesel. Dikwels beland sommige van hierdie deelnemers in die hospitaal.

Hierdie soort aanbidding herinner ons dalk aan die apostel Paulus se woorde toe hy hom uitgespreek het teen “’n selfopgelegde vorm van aanbidding en skynnederigheid, ’n streng behandeling van die liggaam” (Kolossense 2:23). Ware Christene herdenk wel Christus se dood, maar hulle vermy tradisies wat op leuens gegrond en in stryd met Bybelbeginsels is.