Wie sal blywende vrede bring?

WAAROM het God nie die gebede om vrede verhoor wat deur die leiers van die wêreld se verskillende godsdienste gedoen is nie? Die Bybel het ’n interessante antwoord. Dit is nie dat God glad nie in vrede belangstel nie—hy het ’n baie sterker verlange na vrede as die geestelikes wat oor die onderwerp bid. Trouens, God het reeds definitiewe reëlings getref om wêreldvrede tot stand te bring. Hy het reeds daadwerklike stappe gedoen om hierdie doel te bereik. Hy het duidelik aan die mensdom bekend gemaak wat hy voornemens is om te doen. Maar ongelukkig ignoreer die wêreld se godsdienste oor die algemeen wat God gesê het.

God het lank gelede ’n “saad”, ’n heerser, belowe, wat die Bybel progressief beskryf deur al hoe meer inligting oor sy identiteit te gee (Genesis 3:15; 22:18; 49:10). Die profeet Jesaja, wat vir sy uitsonderlike Messiaanse profesieë bekend is, het geskryf dat hierdie voorspelde Leier die “Vredevors” oor die aarde sal word en dat daar onder sy heerskappy ‘geen einde aan vrede’ sal wees nie (Jesaja 9:6, 7). As ’n hemelse Heerser sal hy ingryp om goddeloosheid uit die weg te ruim en die aarde in ’n paradys te omskep, waar daar geen ongeregtigheid, siekte, armoede of dood meer sal wees nie. Vrede sal heers en mense sal vir ewig lewe (Psalm 72:3, 7, 16; Jesaja 33:24; 35:5, 6; Daniël 2:44; Openbaring 21:4). Wanneer sal dit gebeur?

Wêreldvrede is op hande

Jesus het vir sy dissipels gesê dat die einde van hierdie goddelose stelsel van dinge en die begin van ’n nuwe mensegemeenskap deur ’n merkwaardige reeks wêreldskokkende gebeure voorafgegaan sou word, wat saam gedurende dieselfde tydperk sou plaasvind (Matteus 24:3, 7-13). Baie van hierdie gebeure—oorloë, voedseltekorte, aardbewings, om net ’n paar te noem—het nog altyd van tyd tot tyd voorgekom. Maar dit het die mensdom nog nooit alles tegelyk geteister en op ’n wêreldskaal soos in ons tyd die geval is nie. En die gevolge van hierdie rampe is baie erger as wat dit vroeër was omdat die aarde digter bevolk is.

Nog ’n gebeurtenis wat in die Bybel voorspel word, is die mens se voortgesette vernietiging van die omgewing (Openbaring 11:18). Wat meer is, voor die voorspelde einde moet ’n wêreldwye waarskuwingswerk gedoen word, die verkondiging van die “goeie nuus van die koninkryk”. Jehovah se Getuies doen vandag hierdie werk wêreldwyd.—Matteus 24:14.

Die vervulling van hierdie profesieë beteken goeie nuus vir getroue mense. ’n Voorspelde nuwe wêreld van algehele vrede is op hande! Dit sal verseker dat haat en terrorisme heeltemal en vir goed sal verdwyn. Die Bybel verduidelik: “Hulle sal geen kwaad doen of enige verderf aanrig op my hele heilige berg nie; want die aarde sal beslis vol wees van die kennis van Jehovah soos die waters die see bedek.”—Jesaja 11:9.

Gebede waarna God luister

Gebed tot God is geensins ’n nuttelose daad of ’n sinlose seremonie nie. Jehovah word in die Bybel die “Hoorder van die gebed” genoem (Psalm 65:2). Hy luister dus op enige bepaalde oomblik na tallose gebede wat deur opregte mense op aarde gedoen word. Maar is daar vereistes waaraan voldoen moet word sodat gebede verhoor sal word? Die Bybel toon dat opregtes van hart wat Bybelwaarhede omtrent God leer, daarop moet reageer en “ware aanbidders” moet word, wat hom “met gees en waarheid” aanbid (Johannes 4:23). Die gebede van diegene wat nie sy wense eerbiedig nie, word nie verhoor nie: “Hy wat sy oor afwend om [God se] wet nie te hoor nie—selfs sy gebed is iets verfoeiliks.”—Spreuke 28:9.

Ongelukkig leer baie godsdiensleiers mense nie vandag van God se voorneme om vrede tot stand te bring nie, en hulle bid ook nie daaroor nie. Hulle bid eerder dat menseregerings sulke probleme sal oplos, hoewel God se Woord duidelik sê dat ‘dit nie aan die mens wat loop, behoort om sy voetstappe te rig nie’.—Jeremia 10:23.

Daar is voorspel dat mense wat vrede liefhet, “aan die einde van die dae”, in ons tyd, na die simboliese “berg van die huis van Jehovah” sal stroom—dit wil sê na ware aanbidding. Hierdie mense sal groot veranderinge in hulle lewe aanbring: “Hulle sal van hulle swaarde ploegskare moet smee en van hulle spiese snoeimesse. Nasie sal nie teen nasie die swaard ophef nie, en ook sal hulle nie meer leer om oorlog te voer nie.”—Jesaja 2:2-4.

Probeer enige groep aanbidders vandag volgens hierdie woorde lewe? Of praat alle godsdienste bloot oor vrede terwyl hulle oorlog steun? Wanneer jy Jehovah se Getuies weer teëkom, kan jy gerus met hulle gesels oor vrede en uitvind watter godsdiens mense leer om vreedsaam teenoor almal te wees.