Is dit nog veilig om te vlieg?
VIER passasierstralers word gekaap. Die vier vliegtuie sowel as bekende landmerke word verwoes. Beeldmateriaal van ’n 767-passasierstraler wat teen een van die Tweelingtorings vasvlieg, word herhaaldelik oor televisie uitgesaai.
Met die aanvalle van 11 September 2001 het ’n skrikwekkende nuwe era van terroriste-aggressie begin. Lugdienste het die middel tot ’n dodelike doel geword, en vliegtuie is as brandbomme gebruik.
Dit het aanleiding gegee tot ’n nuwe geslag vreesbevange passasiers: Dié wat voorheen veilig gevoel het, maar nou bang is weens die moontlikheid van terreuraanvalle. Daarbenewens het ’n reeks noodlottige vliegongelukke ná 11 September wat nie met terrorisme verband gehou het nie, baie selfs banger gemaak om te vlieg.
Om te vlieg, is weliswaar ’n luuksheid wat miljoene mense regoor die wêreld nie kan bekostig nie. Maar vir ander is dit ’n noodsaaklike deel van hulle lewe. Vir dié wat gereeld op sakereise moet gaan, is dit dalk onvermydelik. Christensendelinge en -bedienaars moet dikwels lang vlugte na en van hulle toewysings onderneem. Selfs vir arm mense is ’n vliegtuig tydens ’n mediese noodgeval soms die enigste geskikte vervoermiddel. En duisende vlieëniers en vlugpersoneellede vlieg om hulle brood te verdien.
Baie van hierdie passasiers, wat moontlik self ontsenu is, moet voordat hulle vertrek angstige huweliksmaats en bang kinders gerusstel. En namate dit al hoe moeiliker word om deur lughawekontrolepunte te kom, wonder reisigers of dit nog so ’n goeie manier is om te reis.
Om lig op hierdie kwessies te werp, het Ontwaak! veiligheidsdeskundiges, lughawepersoneel, lugdiensamptenare en vliegtuiginstandhoudingswerkers geraadpleeg. Hulle almal stem blykbaar oor een ding saam: Hoewel vliegtuie nog een van die veiligste vervoermiddele is, vereis nuwe bedreigings nuwe maatreëls om dit vir die reisende publiek veiliger te maak.
Die volgende artikels sal bespreek watter uitdagings dit bied en wat jy kan doen om dit vir jou veiliger en gemakliker te maak wanneer jy vlieg.