Wees veiligheidsbewus

VIR party kan dit ’n skrikwekkende ondervinding wees om 11 000 meter bo die aarde te vlieg. Dit lyk dalk of dit natuurwette verontagsaam. Namate die veiligheidstandaarde en betroubaarheid van lugvaart nuwe hoogtes bereik het, het die moontlike gevare wat dit inhou om in ’n dun metaalbuis deur die atmosfeer te vlieg, baie verminder. Maar soms herinner die harde werklikheid ons daaraan dat ongelukke kan plaasvind.

Hoe om vrees die hoof te bied

Ondanks daardie werklikheid het die mens van die vroegste tye af die begeerte uitgespreek om te vlieg. Tien eeue voor Christus het koning Dawid geskryf: “Ag, as ek maar vlerke soos ’n duif gehad het! Ek sou wegvlieg” (Psalm 55:6). Soos ons reeds gesien het, het die moderne tegnologie vliegtuie een van die veiligste vervoermiddele gemaak. Nee, dit is nie volmaak nie. Niks in hierdie wêreld is heeltemal veilig of ten volle voorspelbaar nie.

Dit is iets wat ons moet onthou as ons dit moeilik vind om rasioneel op te tree wanneer iemand anders in beheer is. Party mense is dalk geneig om te dink: ‘Hoe meer ek in beheer is van hierdie situasie, hoe minder skrikwekkend sal dit wees.’ As dit die geval is, sal sulke mense dit dalk moeilik vind in situasies waar hulle baie min of geen beheer het nie. Wanneer ’n mens vlieg, bevind jy jou in so ’n situasie.

Ondanks pogings om vlugveiligheid te verbeter, is daar geen ruimte vir oorgerustheid nie. Almal wat by lugvaart betrokke is, kan saamwerk om moontlike veiligheidsgevare tot ’n minimum te beperk. Nogtans waarsku owerhede teen immerteenwoordige gevare. ’n Wyse Bybelspreuk sê: “Die wyse sien die gevaar kom en tref voorsorgmaatreëls” (Spreuke 22:3, New Living Translation). Dit is goed om te besef dat feitlik enigiets wat ons doen, ’n mate van gevaar inhou. Om dinge in perspektief te stel, onthou dat jy gesonde verstand moet gebruik wanneer jy gaan vlieg, dieselfde gesonde verstand wat jou in ander situasies help om voorsorgmaatreëls te tref sodat jy veilig sal wees.

Mense wat gereeld vlieg, is dalk beter toegerus om in hierdie moeilike tye vir hulleself te sorg. Dit is omdat hulle gewoonlik beter ingelig is as ander passasiers wanneer dit by lughawens en vliegtuie kom. Jy kan ook soos hulle ingelig en kalm wees deur die eenvoudige stappe te volg wat in die bygaande vensters uiteengesit word.

Voor jy vlieg

Hoewel sekuriteitskontrolepunte ’n noodsaaklike funksie verrig, is party reisigers—veral dié wat haastig is—geneig om dit as ’n las te beskou. Aangesien sekuriteitsmaatreëls by die meeste lughawens verskerp is, sal jy dalk die volgende wenke wil toepas om makliker deur die kontrolepunte te kom:

◼ Kom vroeg daar aan. As ’n mens beplan om vroegtydig by die lughawe aan te kom, kan jy rustiger wees, ontspan en die spanning vermy wat deur onverwagte of ongeleë situasies veroorsaak word.

◼ Wanneer jy besluit watter lugdiens jy gaan gebruik, kies een wat hoofsaaklik deur sakereisigers gebruik word. Hulle weet wat om te doen, het min bagasie en wil nie tyd mors nie.

◼ Voordat jy deur die metaalverklikker loop, moet jy items verwyder wat jy dink die alarm sal laat afgaan. Dit sluit sleutels, kleingeld, juweliersware en selfone in. Gee dit vir die beampte voordat jy deurstap.

◼ Sit tasse en ander handbagasie so plat moontlik op die vervoerband; as die persoon agter die x-straalskerm nie kan uitmaak wat hy sien nie, sal hy dalk wil hê dat jy jou tas moet uitpak of dit weer deurstuur.

◼ Sê vir die beampte van enige ongewone items wat dalk aandag sal trek, soos daardie ou silwer mandolien wat jou ouma jou gegee het. As jy vir hom ’n redelike verduideliking gee vir die vreemde voorwerp wat hy op die skerm sien, sal die beampte waarskynlik nie vra om dit te ondersoek nie. As jy baie haastig is, kan jy die item vooraf uithaal en vra dat dit met die hand nagegaan word.

◼ As die alarm afgaan, moet jy jou samewerking gee en onmiddellik verduidelik wat die oorsaak is. As die beampte weet dat ’n spesifieke voorwerp die alarm laat afgaan het en daar nog ’n beampte met ’n handaftaster is, sal hy jou na hom toe stuur.

◼ Een manier waarop jy beslis jou vlug sal mis, is deur grappies te maak oor ’n kaping of ’n bom. Behalwe dat lughawesekuriteitsbeamptes jou deeglik sal deursoek, kan ’n klag teen jou gelê word.

Geniet jou vlug!

Is dit moontlik om ’n veilige vlug te kies? Wel, ja. Ongeag watter vlug jy kies, die kanse dat jy jou bestemming veilig gaan bereik, is uitstekend. As jy onseker is, kan jy die veiligheidsrekord nagaan van die lugdiens wat jy wil gebruik. Ondanks vliegongelukke moet jy in gedagte hou dat vliegtuie nog steeds as een van die veiligste vervoermiddele beskou word.

Intussen kan ons almal uitsien na ’n tyd—onder God se heerskappy oor die aarde—wat gekenmerk sal word deur veiligheid, sekuriteit en vertroue. In ’n godvresende, vreedsame mensegesin sal daar geen plek wees vir enigiemand wat mense se lewens in gevaar stel nie. Mense “sal veilig wees en hoef geen ramp te vrees nie”.—Spreuke 1:33, Die Bybel, 1983.a

[Voetnoot]

[Venster/Prent op bladsy 10, 11]

’N PAAR VEILIGHEIDSWENKE

Vlieg op direkte vlugte. Die meeste ongelukke gebeur wanneer vliegtuie opstyg, klim, daal of land. Direkte vlugte verminder blootstelling aan hierdie gevaarliker fases van ’n vlug.

Kies groter vliegtuie. Vliegtuie met meer as 30 passasiersitplekke word gewoonlik volgens strenger regulasies ontwerp en gesertifiseer as kleiner vliegtuie. In die onwaarskynlike geval dat ’n ernstige ongeluk plaasvind, het passasiers op groter vliegtuie ook ’n beter kans om te oorleef.

Skenk aandag aan die voorvluginstruksies. Hoewel dit dalk na ’n blote herhaling van bekende inligting klink, kan die ligging van die naaste nooduitgange dalk verskil na gelang van die soort vliegtuig en waar jy sit.

Moenie swaar voorwerpe in die oorhoofse bagasieruimte sit nie. Baie swaar voorwerpe sal dalk tydens turbulensie uit die oorhoofse bagasieruimte val. As jy dit dus moeilik sal vind om ’n artikel op te lig en in die bagasieruimte te sit, moet jy dit eerder voor die tyd ingee.

Hou jou sitplekgordel aan terwyl jy sit. As jy die gordel aanhou wanneer jy sit, sal dit jou tydens onverwagte turbulensie dalk net die ekstra beskerming gee wat jy nodig het.

Luister na die lugwaardinne. Lugwaardinne is hoofsaaklik om veiligheidsredes op ’n vliegtuig. As een van hulle jou dus vra om iets te doen, moet jy onmiddellik jou samewerking gee.

Moenie enige gevaarlike stowwe saamneem nie. Daar is redelik lang lyste van gevaarlike stowwe wat nie toegelaat word nie, maar gesonde verstand behoort vir jou te sê dat jy nie petrol, bytmiddels, giftige gasse en soortgelyke items aan boord moet neem nie, tensy dit deur die lugdiens toegelaat word en in ’n geskikte houer vervoer word.

Moenie te veel drink nie. Enige alkohol wat jy drink, sal in die lug ’n groter uitwerking op jou hê as by seevlak. Dit is op enige hoogte goed om matigheid voor oë te hou.

Wees gereed vir enigiets. In die onwaarskynlike geval dat daar ’n noodsituasie is, soos ’n ontruiming tydens ’n moontlike noodgeval, moet jy die instruksies van die vlugpersoneel volg en die vliegtuig so gou moontlik verlaat.

[Erkenning]

Bron: AirSafe.com

[Venster/Prent op bladsy 12]

STEL JOU GESIN GERUS

As jy gaan reis, kan jy jou gesin op die volgende maniere help om minder bekommerd te wees.

Praat met jou gesin. Voordat jy vertrek, kan jy tyd neem om jou veiligheid sowel as jou geliefdes s’n te bespreek. Verduidelik watter nuwe veiligheidsmaatreëls getref is en hoe dit jou veiligheid raak terwyl jy reis.

Laat hulle toe om hulle kommer uit te spreek. Laat jou gesin oor hulle vrese praat. Hulle is lief vir jou en wil net hê dat jy veilig moet wees. Luister aandagtig en sonder om te oordeel, en neem al hulle vrese en bekommernisse ernstig op.

Gee eerlike versekering. Praat oor hoe verskillende agentskappe verdere terreuraanvalle probeer voorkom. Hierdie pogings sluit verskerpte sekuriteitsmaatreëls by lughawens en op vliegtuie in. Die moontlikheid dat iets slegs sal gebeur terwyl jy op ’n vliegtuig is, is redelik klein.

Bly in kontak. Belowe dat jy sal bel wanneer jy jou bestemming bereik. Bel gereeld huis toe terwyl jy weg is. Dit is ook belangrik dat jou gesin weet hoe om met jou in aanraking te kom as daar ’n noodgeval is.

[Erkenning]

Bron: United Behavioral Health Web site

[Prente op bladsy 10]

Wees bereid om jou samewerking te gee by sekuriteitskontrolepunte