Die Bybel se beskouing

Hoe moet ons ons keusevryheid gebruik?

GOD het die eerste mense, Adam en Eva, die vermoë gegee om hulle eie keuses te maak. Hy het Adam toesig oor die tuin van Eden gegee. Adam se werk het ingesluit dat hy name vir die diere kies (Genesis 2:15, 19). Nog belangriker, Adam en Eva kon besluit of hulle God sou gehoorsaam of nie.—Genesis 2:17, 18.

Sedertdien het mense al miljoene der miljoene besluite gemaak—waarvan baie goed, party sleg en ander heeltemal boos was. Van die mens se slegte keuses het rampspoedige gevolge gehad. Nogtans het God nooit ingemeng met ons reg om keuses te maak nie. As ’n liefdevolle Vader help God ons deur die bladsye van die Bybel om goeie besluite te maak. Hy waarsku ons ook teen die gevolge van verkeerde keuses. Die Bybel sê dat ons sal maai wat ons saai.—Galasiërs 6:7.

Besluite oor persoonlike sake

God toon duidelik wat sy wil in sekere sake is en gee ons spesifieke leiding. Maar in die meeste gevalle lê die Bybel nie reëls neer waarvolgens ons al ons persoonlike aangeleenthede moet rig nie. Dit gee eerder algemene riglyne wat ruimte laat vir persoonlike voorkeure en begeertes. Kyk byvoorbeeld wat dit oor ontspanning sê.

Die Skrif noem Jehovah “die gelukkige God” (1 Timoteus 1:11). Sy Woord praat van “’n tyd om te lag” en “’n tyd om rond te huppel” (Prediker 3:1, 4). Die Bybel sê vir ons dat koning Dawid tot ander se voordeel musiek gespeel het (1 Samuel 16:16-18, 23). Jesus het ’n huweliksfees bygewoon, en hy het tot die vreugde van die geleentheid bygedra deur water in wyn te verander.—Johannes 2:1-10.

Maar die Bybel gee hierdie gepaste waarskuwing: “Hy wat met wyses wandel, sal wys word, maar hy wat hom met die sotte inlaat, met hom sal dit sleg gaan” (Spreuke 13:20). “Onwelvoeglike skertsery” en onsedelike dade is vir God aanstootlik en kan ons verhouding met hom vernietig (Efesiërs 5:3-5). Wanneer alkohol vryelik by gesellighede vloei, kan dit ernstige probleme tot gevolg hê (Spreuke 23:29-35; Jesaja 5:11, 12). Jehovah God haat ook geweld.—Psalm 11:5; Spreuke 3:31.

Hierdie Bybelverse help ons om God se beskouing van ontspanning te verkry. Wanneer Christene keuses maak, neem hulle in ag wat die Bybel sê. Ons sal elkeen natuurlik self die goeie of slegte gevolge van ons eie keuses moet dra.—Galasiërs 6:7-10.

Christene word eweneens aangespoor om verstandige besluite in ooreenstemming met Bybelbeginsels te maak oor dinge soos kleredrag, die huwelik, ouerskap en saketransaksies. Ook in sake wat nie spesifiek in die Skrif gemeld word nie, kan die beginsels daarin hulle help om besluite op grond van hulle gewete te maak (Romeine 2:14, 15). Christene moet die volgende beginsel in al hulle persoonlike besluite toepas: “Hetsy julle eet of drink of enigiets anders doen, doen alles tot heerlikheid van God.”—1 Korintiërs 10:31.

Wanneer dit by sulke besluite kom, sal dit ook goed wees as ons die beginsel in gedagte hou dat ons ‘ons met ons eie sake moet bemoei’ (1 Tessalonisense 4:11). Christene kom dikwels te staan voor verskeie keuses wat nie in stryd met God se wil is nie. Daarom verskil een Christen se voorkeur dalk van ’n ander s’n. Dit sal God mishaag as sy knegte mekaar oordeel (Jakobus 4:11, 12). Die Bybel gee hierdie wyse raad: ‘Laat niemand van julle ly as iemand wat hom met ander se sake bemoei nie.’—1 Petrus 4:15.

Die besluit om God te dien

Die Bybel beklemtoon die voordele van gehoorsaamheid aan God. Maar God dwing mense nie om hom te aanbid nie. Hy nooi sy menseskepsele eerder om sy aanbidders te word. Die Bybel sê byvoorbeeld: “Kom tog in, laat ons aanbid en ons neerbuig; laat ons kniel voor Jehovah, ons Maker.”—Psalm 95:6.

So ’n uitnodiging is tot eertydse Israel gerig. Meer as 3 500 jaar gelede het die nasie Israel voor die berg Sinai gestaan, en God het die stelsel van ware godsdiens wat in die Mosaïese Wet vervat is, aan daardie miljoene mense bekend gestel. Hulle het nou voor ’n keuse te staan gekom: Sou hulle God dien of nie? Hoe het hulle gereageer? Hulle het eenstemmig gesê: “Alles wat Jehovah gespreek het, is ons bereid om te doen, en ons sal gehoorsaam wees” (Eksodus 24:7). Hulle het self besluit om Jehovah te aanbid.

In die eerste eeu het Jesus met die verkondiging van die goeie nuus van God se Koninkryk begin (Matteus 4:17; 24:14). Hy het nooit iemand gedwing om hierdie werk saam met hom te doen nie. Hy het ander eerder vriendelik genooi en gesê: “Kom word my volgeling” (Markus 2:14; 10:21). Baie het sy uitnodiging aanvaar en die predikingswerk saam met hom begin doen (Lukas 10:1-9). Na ’n ruk het party gekies om Jesus te verlaat. Judas het gekies om hom te verraai (Johannes 6:66; Handelinge 1:25). Later het nog baie meer mense, onder leiding van die apostels, dissipels geword, nie omdat hulle met die swaard gedreig is nie, maar uit vrye wil. Hulle het “die regte gesindheid” gehad en het “gelowiges geword” (Handelinge 13:48; 17:34). Ware Christene is vandag ook gewillig om God se Woord te gehoorsaam en die leringe van Jesus te volg.

Dit is duidelik dat God wil hê dat ons ons keusevryheid moet gebruik. Hy voorsien ook leiding in die Bybel wat ons help om verstandige besluite te maak (Psalm 25:12). Wanneer dit by persoonlike besluite kom, moet elke Christen Goddelike beginsels sorgvuldig oorweeg. Slegs dan kan ons ‘heilige diens met ons denkvermoë’ aan God verrig.—Romeine 12:1.