’N Regering wat Goddelike waardes sal handhaaf
STEL jou ’n wêreld voor met net een regering vir mense van elke ras en taal. Stel jou ’n regering voor wat die mees verhewe waardes beskerm en oorlog, haat, misdaad, armoede, besoedeling, siekte en selfs die dood uit die weg ruim!
‘Dit klink wonderlik, maar onmoontlik’, sê jy dalk. Nee, dit is nie onmoontlik nie. Trouens, dit sal beslis gebeur. Jesus Christus het so ’n regering belowe. Hy het sy volgelinge geleer om daarvoor te bid: “Julle moet dan só bid: ‘Ons Vader in die hemele, laat u naam geheilig word. Laat u koninkryk kom. Laat u wil geskied, soos in die hemel, so ook op die aarde.’”—Matteus 6:9, 10.
Miskien is jy vertroud met die woorde van daardie gebed, want miljoene mense regoor die wêreld ken dit of het al daarvan gehoor. Maar het jy al goed nagedink oor wat daardie woorde eintlik beteken? Let op dat die Koninkryk verband hou met God se wil wat op die aarde gaan geskied. Wat is God se Koninkryk dan? En wat is God se wil vir ons aarde?
Wat God se Koninkryk is
Een definisie van ’n koninkryk is ’n regering met ’n koning as heerser. Die Koninkryk van God is die middel waardeur Jehovah God sy universele soewereiniteit uitoefen. Dit is ’n koninklike regering met sy Seun, Jesus Christus, as heerser. Psalm 37:10, 11 gee ’n eenvoudige en duidelike beskrywing van God se wil vir die aarde: “Nog net ’n klein rukkie en die goddelose sal daar nie meer wees nie; en jy sal beslis ag gee op sy plek, en hy sal daar nie wees nie. Maar die sagmoediges sal die aarde besit, en hulle sal hulle inderdaad verlustig in die oorvloed van vrede.”
As jy dus weens die agteruitgang van die wêreld se waardes wanhopig voel, kan jy moed skep. Die Bybel belowe dat die toestande en waardes van die wêreld binnekort heeltemal sal verander. Die belofte dat God se Koninkryk eersdaags oor die aarde gaan heers om seker te maak dat God se waardes gehandhaaf word, is ’n ware grondslag vir hoop.
As ons leer om ons vertroue in God se Koninkryksbeloftes te stel, kan dit ons veiliger laat voel. Kyk byvoorbeeld na die waardes wat met die heerskappy van daardie Koninkryk verbind word: “Kom, aanskou die dade van Jehovah, hoe hy verbasende dinge op die aarde tot stand gebring het. Hy laat oorloë ophou tot aan die einde van die aarde” (Psalm 46:8, 9). Wat ’n wonderlike belofte van vrede en veiligheid is dit tog!
In ’n profesie oor die Koning van God se Koninkryk, Jesus Christus, sê Psalm 72:12-14: “Hy sal die arme verlos wat om hulp roep, ook die geteisterde en elkeen wat geen helper het nie. Hy sal jammer voel vir die geringe en die arme, en die siel van die armes sal hy red. Van onderdrukking en van geweld sal hy hulle siel verlos, en hulle bloed sal kosbaar wees in sy oë.”
Bybelwaardes
Kyk na party van die waardes wat die Bybel voorstaan: “Gelukkig is dié wat bewus is van hulle geestelike behoefte” (Matteus 5:3). Ook: “Vertrou op Jehovah met jou hele hart en moenie op jou eie begrip steun nie. Slaan ag op hom in al jou weë, en hy sal jou paaie reguit maak.”—Spreuke 3:5, 6.
Die Bybel leer ook dat ons almal aanspreeklik is vir die waardes waarvolgens ons kies om te lewe. Dink byvoorbeeld aan Prediker 11:9: “Verbly jou, jong man, in jou jeug, en laat jou hart aan jou goed doen in die dae van jou jonkheid, en wandel in die weë van jou hart en in die dinge wat jou oë sien. Maar weet dat die ware God jou op grond van al hierdie dinge sal oordeel.” Spreuke 2:21, 22 toon duidelik dat ons vir ons dade verantwoordelik is: “Die regskapenes sal op die aarde woon, en die onberispelikes sal daarop oorbly. Wat die goddeloses betref, hulle sal van die aarde af uitgeroei word; en die verraderlikes sal daarvan weggeruk word.”
Aangesien ons hierdie vaste hoop op ’n regverdige regering het, is dit beslis voordelig om ’n hegte vriendskap met God op te bou! As ons met ander omgaan wat ook onderdane van God se Koninkryk wil wees, sal dit ons help om in aanmerking te kom vir die lewe onder sy glorieryke Koninkryksheerskappy en die voordele van die wonderlike waardes wat dit voorstaan.
[Prent op bladsy 10]
Die sagmoediges “sal die aarde besit” en hulle “verlustig in die oorvloed van vrede”.—PSALM 37:11.