Tambili—Die “koning” van die kokosneute

DEUR ONTWAAK!-MEDEWERKER IN SRI LANKA

TAMBILI, wat dikwels die koningskokosneut genoem word, is die Singalese naam vir die vrug van die aurantiaca-kokospalm. Die aurantiaca is ’n pragtige palm wat ná ses tot agt jaar regdeur die jaar groot, helderoranje neute in trosse dra. Die tambili-neut is sowat 30 sentimeter lank en weeg ongeveer 1,5 kilogram. Dit kom in groot getalle oral op die tropiese eiland Sri Lanka voor. Trouens, in Singala verwys die woord tambili nie net na die neut nie, maar ook na sy kenmerkende helderoranje kleur.

Maar hoe kry ’n mens ’n drankie uit ’n tambili? Die tambili word as ’n jong vrug gepluk. Die bokant van die neutdop word dan afgesny, en ’n gaatjie word in die neut gemaak. Daar kan tot ’n liter byna helder tambili-water in die neut wees. Dit is heerlik, soet en voedsaam. Sri Lankane toon dikwels gasvryheid deur tambili-water aan ’n moeë en dors besoeker te bedien.

Wanneer jy op die eiland Sri Lanka reis, sal jy oral padstalletjies vind wat tambili verkoop, en dit is nogal goedkoop. Die verkoper sal knaphandig die bokant van die neut afsny, ’n strooitjie insteek, en siedaar, jy het ’n skoon, verfrissende, gesonde drankie. As jy ’n avontuurlustige besoeker is, wil jy dalk soos die plaaslike inwoners uit ’n tambili probeer drink deur jou kop agteroor te gooi en die water direk uit die neut te drink, maar as jy nie weet wat jy doen nie, kan jy meer mors as wat jy drink!

In Sri Lanka weet almal van die gesondheidsvoordele van die tambili. Daar word gesê dat tambili-water die liggaam laat afkoel en strelend vir die spysverteringstelsel is. Die water bevat heelwat minerale, ’n paar koolhidrate, vette, kalsium, vitamien C, fosfor, yster en ’n bietjie proteïen. Die elektrolitiese balans van die mengsel maak dit ’n ideale rehidrasiedrankie vir diegene wat aan hitte-uitputting, maagongesteldheid of cholera ly. Hoewel ’n mens nie altyd met sekerheid kan sê dat waterbronne skoon is nie, bevat die tambili ’n natuurlike, lugdig verseëlde, suiwer drankie wat ook goed vir jou is.

As jy die welige strande van tropiese Sri Lanka besoek, is ons seker dat jy nie net die helder kleure van die tambili-palm sal geniet wat verskeie tropiese tuine en goue strande versier nie, maar ook sy verfrissende drankie.