Pornografie—Botsende beskouings

“Dit wek begeertes wat nie mag bestaan nie, dit stimuleer drange wat nooit bevredig mag word nie.”—Tony Parsons, rubriekskrywer.

JOHN het nooit bedoel om aan ‘Internetseks’ verslaaf te raak nie.a Soos baie ander mense wat toevallig aan pornografie en sekskletskamers blootgestel word, het hy eendag die Internet gebruik en op ’n webwerf afgekom wat hom toegang tot sulke kletskamers gebied het. Kuberseks het kort voor lank ’n obsessie by hom geword. “Ek het gewag totdat my vrou werk toe gaan”, vertel hy, “dan het ek uit die bed gespring en ure lank voor die rekenaar gesit.” Tydens maratonsessies het hy nie eers gestop om iets te eet of te drink nie. “Ek het glad nie honger gevoel nie”, sê hy. Hy het vir sy vrou begin lieg oor sy geheime bedrywighede. Dit het sy konsentrasie by die werk begin aantas, en hy het al hoe meer paranoïes geraak. Sy huwelik het daaronder begin ly, en toe hy uiteindelik ’n ontmoeting met een van sy kuberseksmaats gereël het, het sy vrou daarvan te wete gekom. Vandag word John vir sy verslawing behandel.

Antipornografieaktiviste verwys na sulke gevalle as ’n bewys van die verderflike uitwerking van pornografie. Hulle sê dit vernietig verhoudings, verneder vroue, misbruik kinders en bevorder ’n perverse en skadelike beskouing van seks. Voorstanders van pornografie sê daarenteen dat dit ’n vrye uitdrukkingsvorm is en beskou hulle teenstanders as preuts. “Mense moenie skaam wees oor hulle seksuele oriëntasie of begeertes nie”, skryf een voorstander. “Pornografie kan gebruik word om openhartige gesprekke oor seks te begin en aan te moedig.” ’n Paar meen selfs dat die vinnige toename in pornografie ’n kenmerk van ’n oop, gesonde samelewing is. “’n Samelewing wat volwasse genoeg is om met die grafiese uitbeelding van seks tussen instemmende volwassenes saam te leef, sal waarskynlik ook nie beswaar maak teen seksuele diversiteit en gelyke regte vir vroue nie”, sê die skrywer Brian McNair.

Maak die samelewing se botsende beskouings pornografie aanvaarbaar? Waarom is dit so algemeen? Is pornografie werklik gevaarlik? Die volgende artikels sal hierdie vrae bespreek.

[Voetnoot]