Van ons lesers

Hooggeregshof Dankie vir die voorbladreeks “Die Amerikaanse Hooggeregshof en vryheid van spraak” (8 Januarie 2003). Hierdie artikels het getoon hoe die vooroordele van die meerderheid soms as onbetwisbaar beskou word. Die meeste mense sê dat jy maar kan glo wat jy wil, maar dat jy net nie daaroor mag praat nie. Hierdie artikels het my groter vrymoedigheid gegee om my godsdiensoortuigings met ander te bespreek.

S. O., Japan

Die saak teen Stratton, Ohio, was inderdaad ’n oorwinning vir vryheid van spraak. Die gunstige beslissing kan ’n positiewe invloed in ander wêrelddele hê, soos hier in die Filippyne, waar die werk van Jehovah se Getuies in party plekke gedwarsboom word deur sekulêre owerhede wat vereis dat ’n permit verkry moet word om van huis tot huis te getuig. Ons is dankbaar vir hierdie uiters belangrike oorwinning.

N. E., Filippyne

Haat Ek wil julle uit die diepte van my hart bedank vir die ondervinding van José Gomez in die artikel “Bevry van die kettings van haat” (8 Januarie 2003). Ek is ook baie jare lank wreed behandel. Maar nou haat ek niemand nie. José se woorde: “Waar sou ek vandag sonder Jehovah se barmhartigheid gewees het?” is ook op my van toepassing. Dankie vir hierdie wonderlike ondervinding van hoe hy sy haat oorkom het.

N. T., Japan

Veiliger swangerskappe Ek wil julle bedank vir die artikel “Hoe om ’n veiliger swangerskap te hê” (8 Januarie 2003). Hierdie artikel het my gehelp om duidelik te sien wat swangerskap behels. Ek is 32 jaar oud, en ek het regtig hierdie artikel nodig gehad. Nou verstaan ek wat ek moet doen om swangerskap veiliger te maak en om my waardering vir hierdie wonderlike gawe te toon.

B. C., Italië

Hierdie artikel sê dat ’n vrou tussen die 26ste en 28ste week vir groep B-streptokokkus getoets kan word. Die tyd wat op die oomblik vir die toets aanbeveel word, is tussen die 35ste en 37ste week van swangerskap en nie tussen die 26ste en 28ste week nie. Mense wat hierdie artikel lees, sal hulle dokter heel waarskynlik vra waarom hulle nie tussen die 26ste en 28ste week getoets word nie. Hulle dokter sal moontlik die Ontwaak! as ’n geloofwaardige bron van inligting vir hulle pasiënte verwerp.

L. S., Verenigde State

“Ontwaak!” antwoord: Ons tydskrifte word maande vooruit voorberei om tyd toe te laat vir die vertaling daarvan in meer as 80 tale. Toe die artikel oor veiliger swangerskappe geskryf is, het baie mense aanvaar dat ’n geskikte tyd vir die toets tussen die 26ste en 28ste week is. Maar in Augustus 2002 het die Amerikaanse Akademie vir Kindergeneeskunde nuwer inligting uitgereik wat deur die Amerikaanse Sentrums vir Siektebeheer aan hulle voorsien is. Soos hierdie leser heel tereg sê, is die huidige aanbevole tyd vir die toets tussen die 35ste en 37ste week.

Op bladsy 13 het ’n voetnoot gesê dat lewer en neute yster en foliensuur bevat. Maar lewer bevat baie vitamien A—wat gevaarlik vir die baba kan wees, soos julle artikel sê.

B. J., Brittanje

“Ontwaak!” antwoord: Dankie vir die waarskuwing.

Portuurdruk Ek is ’n 15-jarige meisie wat sukkel om portuurdruk die hoof te bied. Ek was baie bly oor die artikel “Jongmense vra . . . Hoe kan ek portuurdruk die hoof bied?” (22 Desember 2002). Wanneer ek van ander jongmense lees wat probleme gehad het, verseker dit my dat ek nie die enigste een is nie. Ons kan portuurdruk die hoof bied met die hulp van die enigste almagtige God. Baie dankie vir hierdie tydige inligting.

K. R., Australië

[Foto-erkenning op bladsy 30]

Photo by Josh Mathes, Collection of the Supreme Court of the United States