Van ons lesers

Elektroniese speletjies Ek is 13 jaar oud. Toe ek die tydskrif met die voorbladreeks “Elektroniese speletjies—Is daar ’n donker kant?” sien, het ek geweet dat dit vir my is! (22 Desember 2002). Op bladsy 7 is ’n speletjie beskryf waaraan ek ’n tyd lank verslaaf was. Dankie dat julle hierdie artikels in die tydskrif gesit het, want dit het my gehelp om my weë te verander en om liewer vir Jehovah te word.

J. L., Verenigde State

Ek is amper 15 jaar oud, en by die skool moes ons oor ’n aktuele onderwerp van ons keuse praat. Hierdie Ontwaak! het net betyds gekom. Die klas het baie van my praatjie gehou. Ek het ook goeie punte behaal! Hou asseblief aan om sulke artikels te skryf.

J. A., Duitsland

Ek wou nog altyd waardering uitspreek vir die inligting in julle tydskrifte, maar toe ek die artikels oor elektroniese speletjies lees, het ek besluit om dadelik hierdie briefie te skryf. Ek is ’n ma van twee kinders, wat 11 en 3 jaar oud is. Die inligting was dus vir my baie tydig. Deur middel van hierdie publikasies kan ek duidelik sien dat ons Skepper ons liefhet en wil beskerm.

O. V., Verenigde State

Abrolhos Ek is 13 jaar oud. Ek het dit geniet om die artikel “Abrolhos—’n onvergeetlike ondervinding” te lees (22 Desember 2002). Ek het nog altyd in buitengewone voëls belanggestel, maar ek stel veral belang in wat op die seebodem en op die eilande gebeur. Ek hoop regtig dat julle sal aanhou om sulke artikels te druk.

V. J., Serwië en Montenegro

Ek het dit baie geniet om hierdie artikel te lees. Dit is so geskryf dat ek werklik in my verbeelding kon sien hoe die walvisse spring, die kleurryke voëls oor die see vlieg en die verskillende soorte visse tussen die koraalriwwe uit ’n mens se hand eet. Ek is vervul met bewondering vir die Skepper, en ek sal baie graag hierdie pragtige uithoek van die aarde wil sien. Intussen sal ek hierdie artikel gebruik wanneer ek met mense praat wat dink dat dit vervelig sal wees om vir ewig op aarde te lewe.

M. P., Pole

Geloof tydens beproewinge Ek het gehou van die artikel “Geloof tydens beproewinge in Slowakye” (22 Desember 2002). Toe ek dit klaar gelees het, het ek dadelik hierdie brief begin skryf. Net soos Ján Bali sy beproewinge oorkom het, sal ons getrou moet bly. Die mooiste deel van die artikel was waar hy nog duidelik onthou het hoe die boek The Way to Paradise, wat in 1924 uitgegee is, die Paradys beskryf. Ek het van hierdie deel gehou omdat dit van die nuwe wêreld praat. Ek is nege jaar oud.

E. K., Hongarye

Portuurdruk As ’n gesin wou ons nog altyd skryf en dankie sê vir die wonderlike tydskrifte. Ons het eindelik besluit om dit te doen nadat ons die artikel “Jongmense vra . . . Hoe kan ek portuurdruk die hoof bied?” gelees het (22 Desember 2002). Hierdie artikel het ons gehelp om te sien hoe goed die jong Dawid Jehovah geken het en hoeveel hy op Hom vertrou het. Dawid het sukses behaal omdat hy nie op sy eie insig of dié van ander mense vertrou het nie. Ja, waarom moet ons dan ons portuurs vrees as Jehovah aan ons kant is?

F. H., Estland

Ek lees al twee jaar lank die Ontwaak!, en ek was nog nooit so geraak en aangemoedig soos toe ek hierdie artikel gelees het nie. Ek het gevoel dat dit net vir my geskryf is. Baie dankie vir die tydige inligting.

T. C., Verenigde State