Van ons lesers

Privaatheid Die voorbladtitel “Word jou privaatheid bedreig?” (22 Januarie 2003) het my aandag getrek, want ek is die skrywer van ’n suksesboek oor die onderwerp. Julle skrywer het hom baie goed van sy taak gekwyt. Hier is nog ’n wenk: As jy vir ’n identifikasiedokument gevra word, sal jy dalk ’n paspoort wil gebruik wat nie jou huisadres of bestaansbeveiligingsnommer (social security number) bevat nie.

J. L., Spanje

Juwele Dankie vir die artikel “Juwele op die strand” (22 Januarie 2003). Ons het net so opgewonde soos die skrywer gevoel toe ons die skulpe van slakke en mossels bymekaargemaak het. Van ons aangenaamste herinneringe is van die tyd toe ons skulpe op die strand opgetel het. Elke keer wanneer ons na ons versameling kyk, bewonder ons die Skepper se onoortreflike kunsvernuf.

W. en M. P., Duitsland

Sedert ek 12 jaar oud was, het skulpe my gefassineer. Ek versamel dit al 20 jaar lank, en ek was tevrede met my versameling. Maar noudat ek hierdie artikel gelees en uitgevind het dat daar ongeveer 50 000 weekdierspesies is, besef ek dat ek baie min versamel het en verwonder ek my selfs meer oor Jehovah se skepping.

M. S., Paraguay

Rietbote Die artikel “’n Boot vir die oop see—van riete!” (22 Januarie 2003) het my gefassineer. In my persoonlike Bybellees het ek Job 9:26 teëgekom. Met verwysing na die mens se kort lewensduur, sê dit: “Hulle het voortbeweeg soos rietbote.” Ek en ’n vriendin het gewonder waarom Job ’n kortstondige lewensduur met ’n rietboot sou vergelyk. Toe het my vriendin gesê dat Job miskien dieselfde punt gemaak het wat in julle artikel genoem word—dat “riete geleidelik water absorbeer” en om dié rede onbruikbaar word.

N. D., Verenigde State

“Ontwaak!” antwoord: Volgens een naslaanwerk verwys Job se woorde na hoe vinnig sulke ligte vaartuie kon beweeg. As dit die geval is, sou dieselfde punt gemaak word—naamlik dat die mens se lewensduur kort is.

Flaminke Toe ons deur hierdie Ontwaak! blaai, het ek en my man die artikel “Dansers met vlamkleurige vere” (22 Januarie 2003) gesien. My man het gesê: “Hierdie een is vir jou.” Hy weet goed dat ek Jehovah se skepping, en veral die elegante pienk flaminke, bewonder. Ek sal hierdie pragtige diere baie graag met my eie oë wil sien. Dankie vir die artikel. Dit het my in baie opsigte verryk.

M. N., Tsjeggiese Republiek

Afkykery Ek is 11 jaar oud. Ek het die artikel “Jongmense vra . . . Wat is daarmee verkeerd om af te kyk?” (22 Januarie 2003) geniet. Al kry ek nie altyd goeie punte nie, weet ek dat ek my punte eerlik verdien het. Eintlik kry van my klasmaats wat afkyk, swakker punte as ek! Buitendien is my gewete skoon, en dit is die heel belangrikste.

Z. T., Oostenryk

Ek het ook in hierdie strik getrap, waarskynlik omdat ek nie die erns van afkykery besef het nie. Hierdie artikel sal my help om tekste te onthou soos Hebreërs 13:18, wat my weer sal help wanneer ek voor die versoeking te staan kom om in die toekoms af te kyk.

N. I., Italië

Ek is in graad tien. Ek het partykeer gedurende my eksamens probeer afkyk en nooit besef dat ek eintlik besig was om te steel nie! Maar danksy hierdie artikel sal ek nou probeer om my gewete skoon te hou.

K. G., Estland