Ons beskou die wêreld
’n Bul in ’n glaskas
Het jy al ooit gewonder wat sou gebeur as die spreekwoordelike bul regtig in ’n glaskas beland? Wel, BBC News berig dat iets soortgelyks werklik gebeur het. Die bul het by ’n diereveiling in Lancashire, Engeland, ontsnap en by ’n antiekwinkel ingehardloop. “Die winkel spesialiseer in ou porselein en, soos verwag kan word, is verskeie waardevolle stukke gebreek”, sê een koerant wat ’n berig hieroor bevat het. Ná konsultasie met die bul se eienaar en oorweging van die risiko’s daaraan verbonde om die dier te probeer vang, het die polisie besluit dat dit die beste sou wees om die bul van kant te maak. Die polisie het dus ’n kordon om die gebied opgestel en die vasgekeerde bul in die winkel geskiet.
Die wêreldleier in weerlig
Navorsers wat satellietdata ontleed, het vasgestel dat “Brasilië die hoogste voorkomssyfer van weerlig in die wêreld het”, berig die koerant O Globo. “Tussen twee en drie elektriese ontladings vind elke sekonde [in Brasilië] plaas, altesaam 70 miljoen elke jaar.” Waardeur word dit veroorsaak? Welige reënwoude tesame met ’n warm klimaat. Dit skep die ideale toestande vir gereelde elektriese storms. Buiten dat weerlig jaarliks die lewe van sowat 100 Brasiliane eis, veroorsaak dit skade van ongeveer R1,4 miljard aan telefoonlyne en kragdrade sowel as aan nywerhede en ander fasiliteite. En in teenstelling met wat algemeen geglo word, “kan weerlig drie, vyf of selfs tien keer op dieselfde plek slaan”, sê die wetenskaplike Osmar Pinto jr. van die Nasionale Instituut vir Ruimtenavorsing.
Selfoonspioenasie
Selfone met ingeboude kameras stel vertroulike sakeaangeleenthede in gevaar, berig die koerant Frankfurter Allgemeine Zeitung. Hoewel daar eers gedink is dat die kameras net nog ’n reklamefoefie is, het die digitale foto’s wat deur hierdie nuwe generasie van selfone geneem word, ’n baie beter resolusie as vroeër en beskou die sekuriteitsbeamptes van baie maatskappye dit as ’n toenemende probleem. Die kamerafone is nie alleen onopsigtelik nie, maar kan, in teenstelling met gewone kameras, ’n foto dadelik versend, wat dit ideaal vir bedryfspioenasie maak. Selfs al word die indringer vasgetrek, is die skade klaar aangerig. Om hierdie redes het ’n hele paar maatskappye reeds die gebruik van selfone met ingeboude kameras verbied in sekuriteitsgebiede, soos ontwerpafdelings en plekke waar nuwe modelle van produkte getoets word.
Tragiese tol van verkeersongelukke
“Verkeersongelukke eis elke jaar duisende meer lewens as geweldsmisdade”, berig die Spaanse koerant El País. Die tragiese jaarlikse padongeluksyfer in Europa staan op 55 000 sterfgevalle en 3,5 miljoen beserings. In Spanje is 35 persent van alle padsterftes mense tussen die ouderdomme van 15 en 29, wat verkeersongelukke die vernaamste doodsoorsaak onder hierdie groep maak. “Dit is die ernstigste openbare gesondheidsprobleem wat daar is”, sê Jeanne Picard Mahaut, ’n woordvoerder vir La Ligue, ’n nieregeringsorganisasie wat hom toespits op die verbetering van padveiligheid. “As jy my nie glo nie”, voeg sy by, “vra die dokters wat elke naweek met ongevalle werk.” Van die maatreëls waarop La Ligue en twee ander Europese groepe aandring, is dat daar by die fabriek reeds toestelle in voertuie geïnstalleer moet word wat die spoed beperk en dat motors met ’n ‘foutopnemer’ toegerus moet word wat die moontlike oorsaak van ’n ongeluk kan vasstel.
Slegte jaar vir Alpynse gletsers
Die snikhete somer van 2003 was vir Alpynse gletsers “die slegste seisoen in menseheugenis”, het die Italiaanse koerant Corriere della Sera gesê. Omdat die somers warmer geword en die gemiddelde temperature gestyg het, het opgehoopte sneeu en ys op die berge van Noord-Italië teen “’n ongeëwenaarde tempo” gesmelt. Een van die verrassings wat onlangs uit die smeltende ys te voorskyn gekom het, was ’n kanon van 3 300 kilogram wat in Oostenryk vervaardig is en op ’n hoogte van 3 178 meter bo seespieël gevind is. Die kanon is tydens die Eerste Wêreldoorlog gebruik om Italiaanse posisies aan te val. “Oor die afgelope 20 jaar het vondste soos dié al hoe algemener geword”, sê die artikel. “Die warmer somers het ons gletsers soos vrieskaste laat word waarvan die deure oopstaan.”
Suid-Korea se selfmoordprobleem
Sedert 1999 het die aantal selfmoorde in Suid-Korea elke jaar toegeneem, berig The Korea Times. “In onlangse maande”, sê die koerant, “is daar feitlik elke dag tragiese berigte van mense wat hulleself om die lewe bring, hoofsaaklik as gevolg van ekonomiese probleme, soos kredietkaartskuld, maar ook weens persoonlike wanhoop. Volgens statistieke wat deur die Nasionale Polisieagentskap saamgestel is, het altesaam 13 055 mense [in 2002] selfmoord gepleeg, wat ’n toename van 6,3 persent is wanneer dit met die 12 277 van die vorige jaar vergelyk word. Dit kom daarop neer dat 36 mense elke dag en 1,5 mense elke uur selfmoord pleeg.” Maar daar is iets wat selfs meer kommerwekkend is. Die Times sê: “Wanhopige ouers besluit om hulle kinders saam met hulle om die lewe te bring.” ’n Voorbeeld hiervan is ’n 37-jarige vrou wat selfmoord gepleeg het nadat sy uitgevind het dat haar man die ekwivalent van R970 000 op die aandelemark verloor het. Albei haar kinders—’n 14-jarige seun en ’n 12-jarige dogter—is ook dood gekry. “Sielkundiges sê dat al hoe meer mense tot selfmoord gedryf word omdat die samelewing hulle geen hoop bied dat hulle hulle probleme kan oorkom nie”, sluit die artikel af.
Reisigers vatbaar vir siektes
“Wêreldwyd ontwikkel meer as een uit nege reisigers asemhalingskwale”, sê The Medical Post van Kanada. Die bevinding het gekom ná ’n studie deur GeoSentinel—’n vennootskap tussen die Internasionale Genootskap van Reisgeneeskunde en die Amerikaanse Sentrums vir Siektebeheer en -voorkoming. Dit bekom gesondheidsinligting deur middel van ’n wêreldwye kommunikasie- en dataversamelingsnetwerk wat uit 25 reisgeneeskundeklinieke bestaan. Van Januarie 1997 tot Desember 2002 het 18 817 reisigers die klinieke besoek, en 2 173 is met kwale gediagnoseer wat gewissel het van ’n seer keel en oor- en sinusinfeksie tot longontsteking, brongitis en mikobakteriële infeksie. Reisigers wat ’n hoërisikoland gaan besoek, word aangeraai om seker te maak dat hulle inentings op datum is en moet dit oorweeg om ’n griepinspuiting te kry, ongeag die tyd van die jaar. Volgens dr. Isabelle Nuttall, ’n spesialis op die gebied van aansteeklike siektes by die Wêreldgesondheidsorganisasie, is goeie higiëne die eerste lyn van verdediging teen ’n bakterie- of virussiekte. Sy het gesê: “As daar een boodskap is wat ons oor en oor wil beklemtoon, is dit: ‘Was jou hande.’”