Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g04 10/22 bl. 20-22
  • Hoe kan ek vir hom sê hoe ek voel?

Video nie beskikbaar nie.

Jammer, die video kon nie laai nie.

  • Hoe kan ek vir hom sê hoe ek voel?
  • Ontwaak!—2004
  • Onderhofies
  • Soortgelyke materiaal
  • Wees skerpsinnig
  • Die indruk wat jy skep
  • As daar geen reaksie is nie
  • Hoe kan ek vir hom nee sê?
    Ontwaak!—2001
  • Sê nou hy sê nee?
    Ontwaak!—2004
  • Hoe moet ek ’n meisie behandel wat in my belangstel?
    Ontwaak!—2005
  • Sê nou hy beantwoord nie my liefde nie?
    Ontwaak!—1998
Sien nog
Ontwaak!—2004
g04 10/22 bl. 20-22

Jongmense vra . . .

Hoe kan ek vir hom sê hoe ek voel?

“Ek wil graag ’n antwoord hê op die vraag: Wie behoort die een te wees wat sê dat hy of sy verlief is—die man of die vrou?”—Laura.a

HY IS iemand wat jy onlangs ontmoet het of moontlik iemand wat jy al ’n tyd lank ken—en jy sou graag wou hê dat hy meer as ’n vriend moet wees. Jy is daarvan oortuig dat hy dieselfde voel en dat hy net te bang of skaam is om enigiets te sê. Jy wonder dus of dit dalk ’n goeie idee sal wees om die inisiatief te neem en met hom daaroor te praat.b

Voordat ons verder gaan, kom ons dink eers aan die gevoelens van die mense om jou—diegene in jou gesin en jou gemeenskap. Byvoorbeeld, is dit volgens die plaaslike gebruik jou ouers se plig om ’n maat vir jou te vind?c Jy voel dalk dat dit ’n persoonlike saak is om te besluit of jy iemand die hof wil maak en wil trou. Nogtans probeer Christene ander nie onnodig aanstoot gee nie. Ook wil hulle die gevoelens van gesinslede en geliefdes in ag neem.

Vandag is dit egter in baie lande heeltemal normaal dat paartjies self besluit wie hulle die hof wil maak voordat hulle besluit om te trou. Sal dit verkeerd van die vrou wees om die inisiatief te neem en die man te vertel van haar romantiese gevoelens vir hom? Weer eens sal die gevoelens van jou gesin en die gemeenskap ’n rol speel. Sal so ’n handelswyse baie mense skok of aanstoot gee?

Watter verdere leiding gee die Bybel in verband met die vraag of dit gepas sou wees vir ’n vrou om die inisiatief te neem? In Bybeltye het ’n godvresende vrou, Rut, ’n man met die naam Boas genader oor die moontlikheid om met hom te trou. En Jehovah God het haar pogings geseën! (Rut 3:1-13). Rut was natuurlik nie ’n kind nie; sy was ’n weduwee, klaarblyklik oud genoeg om te trou. Sy was ook nie ligsinnig nie en het nie met Boas geflankeer nie. Sy het eerder God se wette oor die huwelik noukeurig nagekom.—Deuteronomium 25:5-10.

Dalk is jy oud genoeg om aan trou te dink en is daar ’n sekere jong man in wie jy belangstel. Maar om jou hart uit te stort teenoor iemand wat dalk nie dieselfde oor jou voel nie, is ’n delikate saak, en jy waag ’n kans. Dit is asof jy jou hart neem en dit in iemand anders se hande plaas. Sal hy dit met teerheid hanteer of dit op die grond laat val? Die beste manier om onnodige verleentheid te vermy en om te voorkom dat jy emosioneel verpletter word, is om Bybelbeginsels te volg.

Wees skerpsinnig

Dit is maklik om in romantiese dagdrome verdiep te raak. Jy stel jou moontlik selfs jou troudag en die tyd daarna voor. Hoewel sulke dagdrome aangenaam kan wees, is dit nogtans ’n illusie. Dit kan oorweldigende begeertes wek wat jy op geen manier kan bevredig nie. Soos die Bybel sê: “’n Uitgestelde verwagting maak die hart siek” (Spreuke 13:12). Dagdrome kan ook jou oordeel vertroebel. Spreuke 14:15 sê egter: “Die skerpsinnige gee ag op sy voetstappe.” Om skerpsinnig te wees, beteken om gesonde verstand en goeie oordeel aan die dag te lê. Hoe kan jy skerpsinnig wees wanneer dit by romanse kom?

Eerstens, probeer “met kennis optree” (Spreuke 13:16). Soos een jong vrou dit gestel het: “Jy kan nie werklik vir iemand lief word totdat jy hom leer ken nie.” Voordat jy jou hart aan iemand gee, moet jy aandag skenk aan wat hy doen en hoe hy praat. Let op hoe hy mense behandel. “Vra sy vriende oor hom, volwassenes wat hom goed ken”, stel een jong man voor. Word hy “gunstig vermeld” deur diegene in sy Christengemeente? (Handelinge 16:2) ’n Jong vrou met die naam Isabel stel ook voor: “Dit kan baie voordelig wees om in groepe uit te gaan en sy gesin te leer ken.” Wanneer julle in ’n groep uitgaan, kan jy hom waarneem sonder dat daar baie druk op jou geplaas word.

Dit verg tyd en geduld om iemand op hierdie manier te leer ken. Maar dit sal jou in staat stel om gesindhede, karaktertrekke en eienskappe te sien wat óf jou gevoelens teenoor hom sal bevestig óf sal maak dat jou gevoelens verander. Spreuke 20:11 sê: “Deur sy handelinge laat ’n seun [of jong man] hom tog ken, of sy optrede suiwer en reg is.” Ja, vroeër of later sal sy dade toon watter soort persoon hy is.

Dit sal dus verstandig wees om die versoeking te weerstaan om jou gevoelens te gou bekend te maak. As jy haastig is en hy gunstig reageer, sal jy dalk later uitvind dat hy nie ’n geskikte huweliksmaat is nie.d As jy jou reeds tot hom verbind het, sal jy die jong man moontlik baie diep seermaak as jy die verhouding beëindig.

Die indruk wat jy skep

Hierdie jong man neem jou waarskynlik ook waar! Gedra jy jou op ’n manier wat jou godvrugtige eienskappe laat skitter? “Ek het opgelet dat baie meisies nie betaamlik aantrek nie”, sê Isabel. “As jy wil hê dat ’n geestelikgesinde persoon jou moet opmerk, moet jy beskeie aantrek.” Ongeag wat die modewêreld voorskryf, jy sal vir ’n godvrugtige man aantrekliker wees as jy jou “met goed versorgde kleredrag . . . met beskeidenheid en gesonde verstand” versier.—1 Timoteus 2:9.

Die Bybel moedig jong Christene ook aan om “’n voorbeeld . . . in woord” te wees (1 Timoteus 4:12). Die manier waarop jy praat, spreek boekdele oor jou. Wat moet jy doen as jy geleenthede kry om met die jong man te gesels? As hy skaam is, sal hy dalk ongemaklik en senuweeagtig wees. ’n Jong vrou met die naam Abbie sê: “Dalk sal jy die gesprek moet aanknoop om te sien hoe hy reageer.”

Hoe? As jy sonder ophou oor jouself praat, kan hy heel moontlik tot die slotsom kom dat jy egosentries en oppervlakkig is. Die Bybel beveel aan dat ’n mens “nie uit persoonlike belangstelling ’n oog op net [jou] eie sake hou nie, maar ook uit persoonlike belangstelling op dié van die ander” (Filippense 2:4). As jy ’n paar gepaste vrae oor hom of sy belangstellings vra, kan dit hom help om ’n bietjie vrymoediger te wees.

Dit is beslis nie die tyd om van ’n “bedrieglike tong” of “valse lippe” in die vorm van vleitaal gebruik te maak nie (Psalm 120:2). ’n Man met onderskeidingsvermoë sal besef dat jy nie opreg is nie. Terselfdertyd moet jy nie dinge sê net omdat jy dink dat hy dit wil hoor nie. Dit is veral die geval as julle gesprekke ernstiger begin raak en julle onderwerpe soos julle persoonlike geestelike doelwitte begin bespreek. Wees altyd jouself deur opreg, eerlik en ongeveins te wees. Eers dan kan jy sien of julle dieselfde lewensdoelwitte het.

As daar geen reaksie is nie

Maar gestel dat hy, ten spyte van sulke beskeie pogings, geen romantiese gevoelens begin toon nie. Dalk het ’n hele paar weke—of maande—verbygegaan en toon hy nog steeds geen belangstelling in jou nie. Moet jy dit eenvoudig aan skaamheid toeskryf? Jy kan jou afvra: ‘As hy werklik so skaam is, is hy reg vir die huwelik? As ek met hom sou trou, sal hy die leiding as die gesinshoof kan neem, of sal hy verwag dat ek dit doen?’ (1 Korintiërs 11:3). Nog ’n vraag om te oorweeg: ‘Is hy werklik skaam of het hy eenvoudig nie ’n romantiese belangstelling in my nie?’ Dit sal ’n pynlike gevolgtrekking wees om te maak. Maar as jy dit aanvaar, kan dit jou die verleentheid spaar om romantiese gevoelens bekend te maak aan iemand wat eenvoudig nie jou gevoelens deel nie.

Jy dink dalk dat jy tekens van romantiese belangstelling gesien het. Jy voel dat hy eenvoudig talm om iets daaroor te sê en dat hy gunstig op ’n bietjie aanmoediging sal reageer. Moontlik sal hy. Maar as jy besluit om die inisiatief te neem, moet jy besef dat jy ’n kans waag. Behalwe dat jy mooi sal moet dink aan wat jy gaan sê, moet jy ook dink aan wanneer die regte tyd sal wees om dit te sê.

Jy kan byvoorbeeld besluit dat dit beter sal wees om vir hom ’n aanduiding te gee dat jy sy aandag verwelkom as om uit te blaker dat jy “verlief” is. By ’n ontspanne en gepaste geleentheid kan jy eenvoudig sê dat jy hom beter wil leer ken. Moenie bekommerd wees as jy jou ’n bietjie lomp uitdruk nie. Die opregte gevoelens waaruit jou woorde voortspruit, kan baie meer sê as die woorde self. Onthou ook dat jy bloot die begeerte uitdruk om met hom uit te gaan, jy vra hom nie om met jou te trou nie. Nogtans kan dit hom onkant vang; gee hom dus tyd om te verwerk wat jy gesê het.

As jy hierdie jong man werklik leer ken het en self gesien het dat hy gaaf en bedagsaam is, hoef jy nie bang te wees dat hy gemeen sal wees of jou sal verneder nie. Maar hoe moet jy reageer as sy antwoord ’n vriendelike maar besliste ‘Nee’ is? En hoe moet ’n jong man in so ’n situasie optree? ’n Toekomstige artikel sal hierdie vrae bespreek.

[Voetnote]

a Van die name is verander.

b Hoewel hierdie artikel op jong vroue gerig is, sal jong mans en ander wat dit oorweeg om iemand die hof te maak, ook die skriftuurlike raad nuttig vind.

c Gereëlde huwelike veroorsaak nie noodwendig ongelukkigheid nie. Byvoorbeeld, in Bybeltye was Isak en Rebekka se huwelik ’n gereëlde huwelik, tog het Isak “haar liefgekry” (Genesis 24:67). Die les? Solank plaaslike gebruike nie strydig is met God se wette nie, moet jy dit nie sommer verwerp nie.—Handelinge 5:29.

d Hoofstukke 28 tot 31 van die boek Vrae wat jongmense vra—Antwoorde wat werk, wat deur Jehovah se Getuies uitgegee word, kan jou help om vas te stel of iemand moontlik ’n gepaste huweliksmaat sal wees.

[Prent op bladsy 22]

As jy sien hoe hy optree, kan dit jou gevoelens teenoor hom verander

[Prent op bladsy 22]

As jy ’n romantiese belangstelling in iemand het, kan jy met verantwoordelike volwassenes praat wat hom ken

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel