Jongmense vra . . . 

Hoe moet ek ’n meisie behandel wat in my belangstel?

“Susan het met my kom praat oor ’n verhouding, en dit het my nie gepla nie. Vir my het dit goed uitgewerk.”—James.a

“As ’n man nie eerlik is in sy optrede teenoor vroue nie, kan dit rampspoedige gevolge hê.”— Roberto.

’NMEISIE het ’n rukkie gelede vir jou gesê dat sy jou iets wil vra. Jy het haar al dikwels in ’n groep saam met vriende gesien, jy geniet haar geselskap en hou daarvan om dinge saam met haar te doen. Maar wat sy gesê het, het jou stomgeslaan. Sy stel belang in ’n romantiese verhouding en wil weet of jy dieselfde voel.

Dit verbaas jou dalk, veral as jy dink dat dit die man is wat ’n verhouding moet begin. Hoewel dit dikwels so gebeur, moet jy in gedagte hou dat sy nie Bybelbeginsels oortree het deur die eerste stap te neem nie.b Daardie feit kan jou moontlik help om reg te reageer.

Nadat jy oor die saak gedink het, besluit jy dalk dat jy te jonk is vir ’n verhouding of dat jy nie op dié stadium tot die meisie aangetrokke voel nie. Jy voel moontlik ook skuldig en wonder of jy haar op die een of ander manier die verkeerde indruk gegee het. Wat moet jy doen? Eerstens moet jy haar gevoelens in ag neem.

Neem haar gevoelens in ag

Dink aan wat ’n meisie in so ’n situasie deurgaan. Omdat sy graag ’n goeie indruk wil skep, het sy moontlik haar woorde dae lank geoefen. Nadat sy die regte woorde met net die regte glimlag gekombineer het, was sy dalk bekommerd oor die moontlikheid dat jy nee sal sê. Uiteindelik het sy genoeg moed bymekaargeskraap, haar senuweeagtigheid oorkom en vir jou gesê wat sy op die hart het.

Waarom het sy haar in so ’n moeilike situasie begewe? Miskien is sy verlief op jou. Of sy bewonder dalk jou goeie eienskappe op ’n manier wat min ander mense dit bewonder. Haar woorde het dus moontlik ’n onuitgesproke kompliment ingesluit wat jy nie elke dag kry nie.

Hierdie punte word genoem, nie om jou besluit te beïnvloed nie, maar om jou daaraan te herinner om bedagsaam op te tree. ’n Jong vrou met die naam Julie sê: “Al voel die man nie aangetrokke tot die meisie nie, behoort hy gevlei te voel dat iemand hom raakgesien het. In plaas van net nee te sê, kan hy ten minste vriendelik wees en haar met waardigheid behandel.” Kom ons veronderstel vir ’n oomblik dat jy van plan is om op ’n mooi manier nee te sê.

Gestel jy het al in die verlede vir haar nee gesê. Jy kom dalk in die versoeking om haar dié keer kortaf te behandel. Weerstaan hierdie versoeking. Spreuke 12:18 sê: “Daar is een wat onnadenkend praat soos met swaardsteke, maar die tong van die wyses is genesing.” Hoe kan jy met “die tong van die wyses” praat?

Jy kan haar eenvoudig daarvoor bedank dat sy gesê het hoe sy voel en dat sy soveel van jou dink. Vra verskoning as jy haar selfs onwetend onder die verkeerde indruk gebring het. Sê op ’n mooi maar duidelike manier dat jy nie so oor haar voel nie. As sy nie die punt snap nie en jy meer reguit moet wees, moet jy nog steeds ’n onvriendelike toon en kwetsende woorde vermy. Moenie haar gevoelens seermaak nie; wees geduldig. As die rolle omgekeer was, sou jy dit waardeer het as sy jou vriendelik en met waardigheid behandel het, nie waar nie?

Maar sy hou dalk vol dat jy haar doelbewus mislei het. Sy noem dalk selfs dinge wat jy gedoen het en wat hierdie gevoelens by haar laat ontstaan het. ‘Onthou jy toe jy my daardie blom gegee het?’ vra sy dalk, of: ‘Wat van die dinge wat jy vir my gesê het toe ons verlede maand saam gestap het?’ Nou moet jy ’n ernstige selfondersoek doen.

Wees eerlik met jouself

Ontdekkingsreisigers van die ou tyd het dikwels die lande wat hulle ontdek het, beskou as iets om te verower en uit te buit, en vandag het party mans dieselfde beskouing van vroue. Hulle geniet romantiese verhoudings, maar wil nie die verantwoordelikheid van die huwelik hê nie. Sonder om hulle tot enigiets te verbind, probeer hulle vroue met hulle sjarme beïndruk. So ’n man wen ’n vrou se liefde deur bedrog. ’n Christen- ouer man sê: “Party jong mans gaan van die een meisie na die ander. Dis nie regverdig om so met ’n vrou se gevoelens te speel nie.” Waartoe lei sulke selfsugtigheid?

“Soos ’n kranksinnige wat vuurpyle, pyle en die dood afskiet, so is die man wat sy medemens bedrieg het en gesê het: ‘Het ek nie pret gehad nie?’” (Spreuke 26:18, 19). Wanneer ’n man om selfsugtige redes ’n verhouding met ’n vrou aanknoop, sal sy uiteindelik sy ware kleure sien. Dit kan haar dan diep seermaak, soos die volgende ondervinding toon.

’n Jong man het ’n romantiese verhouding met ’n vrou aangeknoop, maar wou nie regtig met haar trou nie. Hy het haar na deftige restaurante geneem, en hulle het saam na partytjies gegaan. Hy het haar geselskap geniet, en sy het gehou van sy aandag, vas oortuig dat hy met haar wou trou. Toe sy uitvind dat hy net vriende wou wees, was sy diep seergemaak.

Wat moet jy doen, al het jy die meisie wat jou so pas genader het, onwetend onder die verkeerde indruk gebring? As jy jou verdedig en jou optrede probeer regverdig, sal jy haar net verbitterd maak. Dink aan hierdie Bybelbeginsel: “Hy wat sy oortredings bedek, sal nie sukses behaal nie, maar hy wat dit bely en laat staan, sal barmhartigheid bewys word” (Spreuke 28:13). Wees dus eerlik. Erken jou verantwoordelikheid in enige misverstand. En as jy doelbewus misbruik gemaak het van haar gevoelens, moet jy erken dat jy ’n groot fout begaan het. Vra opreg verskoning.

Moet egter nie verwag dat jou verskoning die einde van die saak sal wees nie. Sy sal dalk ’n ruk lank vir jou kwaad wees. Jy sal moontlik jou optrede aan haar ouers moet verduidelik. En jy sal dalk ander gevolge moet dra. Galasiërs 6:7 sê: “Wat ’n mens saai, dit sal hy ook maai.” Maar deur verskoning te vra en te doen wat jy kan om sake reg te stel, sal jy haar help om aan te gaan met haar lewe. En hierdie ondervinding sal jou leer om ‘jou lippe daarvan te bewaar om bedrog te spreek’ in alle fasette van die lewe, insluitende dié waarby lede van die teenoorgestelde geslag betrokke is.—Psalm 34:13.

Dink ernstig na voordat jy antwoord

Maar sê nou jy sal regtig daarvan hou om die meisie beter te leer ken? As dít die geval is, moet jy besef dat hofmakery en romanse nie bloot maniere is om pret te hê nie. Die kragtige gevoelens wat ’n paartjie vir mekaar ontwikkel, lei tot ’n huweliksverbintenis. Ná hulle troue help daardie gevoelens om hulle as man en vrou heg saam te bind. Hoe kan hierdie kennis jou nou raak?

Nadat jy aan hierdie jong dame gedink het, besef jy dalk dat daar ’n aantal dinge omtrent haar is wat jy aantreklik vind. Sy het die geleentheid geskep, en jy sal graag daarvan gebruik wil maak. Maar in plaas van jou oorhaastig in ’n hofmakery te begewe, moet jy nou stappe neem om julle albei later groot pyn te spaar.

Op die een of ander tydstip kan jy die mening kry van ’n paar geestelik ryp persone wat haar ken. Stel voor dat sy mense wat jou ken, se mening vra. Julle albei moet daardie ryp persone vra wat hulle as die ander persoon se goeie eienskappe en swakhede beskou. Julle kan ook Christen- ouer manne vra wat hulle dink. Dit is goed om te weet of die persoon waarin jy belangstel, ’n goeie reputasie in die Christengemeente het.

Maar jy vra dalk: ‘Waarom moet ander mense so betrokke raak in my privaat lewe?’ Die feit is dat dit verstandig is om die mening van ander te kry, selfs in iets so persoonliks soos ’n romanse. Trouens, dit is skriftuurlik, want Spreuke 15:22 sê: “In die veelheid van raadgewers kom iets tot stand.” Die volwassenes met wie jy gesels, sal nie namens jou ’n besluit neem nie. Maar “die raad van die siel” wat hulle jou gee, kan aspekte van die ander persoon, en van jou, aan die lig bring wat jy nie kan sien nie.—Spreuke 27:9.

James, wat aan die begin aangehaal is, het dit gedoen. Hoewel hy op sy eie gewoon het, het hy met sy ouers oor Susan gepraat. Daarna het hulle twee vir mekaar die name gegee van ander ryp persone wat hulle mening kon gee oor hulle vooruitsigte as ’n paartjie. Nadat hulle goeie dinge oor mekaar gehoor het, het James en Susan begin uitgaan om te sien of hulle met mekaar wou trou. As jy soortgelyke stappe neem voordat jy emosioneel te betrokke raak, sal jy baie sekerder voel oor die besluit wat jy uiteindelik neem.

En bid bowenal tot Jehovah. Aangesien hofmakery ’n stap tot die huwelik is, kan jy God se hulp vra om te sien of ’n verhouding met die meisie tot ’n huwelik sal lei. Nog belangriker, vra God om julle albei te help om besluite te neem wat julle nader aan hom sal bring. Dít is wat vir julle albei ware geluk sal bring.

[Voetnote]

[Prente op bladsy 19]

As jy nie regtig belangstel nie, moet jy versigtig wees om nie die verkeerde indruk te skep nie