’n Ongewone paar
Seekundiges wat in die aand in diep water naby Australië se Groot Barrière-rif geduik het, het onlangs vir die heel eerste keer ’n lewende kombersseekatmannetjie teëgekom. Wat was so ongewoon hieromtrent?
Die kombersseekat word tereg beskryf as “die groot dier met die opmerklikste grootteverskil ter wêreld tussen die geslagte”. Die wyfie word tot twee meter lank en weeg tot tien kilogram. Maar die mannetjie is net drie sentimeter lank en weeg 0,3 gram! Trouens, die mannetjie is omtrent so groot soos die pupil van die wyfie se oog. Dit beteken dat die wyfie tot 40 000 keer swaarder as die mannetjie kan wees, en dit is blykbaar die opmerklikste grootteverskil onder niemikroskopiese diere. Hierdie seekatte is pelagies, dit wil sê, hulle lewe in die diep see, en tot nou toe is net wyfies en dooie mannetjies wat in visnette gevang is, al gesien.
Hoe plant hierdie twee diere voort as die een soveel groter as die ander is? Een van die mannetjie se agt arms is hol. Nadat die mannetjie ’n wyfie opgespoor het, word die arm met sperm gevul. Dit breek dan af en dring die wyfie se mantelholte, die groot holte in haar liggaam, binne. Dit bly daar totdat sy haar eiers bevrug deur die sperm daaroor uit te druk.
Die mannetjie vergoed vir sy grootte deur hom te verdedig met tentakels wat hy vermoedelik van die bloublasie steel en in die suiers van sy boarms vashou. Maar selfs hierdie tentakels red hom nie, want wanneer hy sy plig teenoor sy maat gedoen het, gaan hy dood. Dit is geen wonder dat die wetenskaplikes verbaas was oor hulle ontdekking nie!
Wat die rede vir die ontsaglike verskil in grootte tussen hierdie ongewone seekatte ook al is, die woorde van die Bybel is beslis waar: “Wat hierdie see betref, so groot en wyd, daarin is bewegende dinge sonder tal, diere, klein sowel as groot.”—Psalm 104:25.
[Prente op bladsy 31]
Wyfie: tot twee meter lank; weeg tien kilogram
Mannetjie: drie sentimeter lank; weeg 0,3 gram
Werklike grootte in vergelyking met die wyfie
[Erkennings]
Wyfie: Photo P. Wirtz; mannetjie: Photo: D. Paul