Energie—Waarom noodsaaklik vir lewe?

BABA Micah is in Augustus 2003 gebore. ’n Petrolaangedrewe motor het met sy moeder na die kraamsaal gejaag. ’n Steenkoolkragsentrale het die hospitaal waar hy in die wêreld gekom het, van lig voorsien. ’n Sentraleverwarmingstelsel wat van aardgas gebruik maak, het die kamer verhit waar hy sy eerste lewensasem ingetrek het. As iets verkeerd geloop het met enigeen van hierdie konvensionele kragbronne, kon dit klein Micah se lewe in gevaar gestel het.

Die moderne beskawing waarin Micah gebore is, is afhanklik van verskillende energiebronne om te kan voortbestaan. Ons maak elke dag op die een of ander manier staat op fossielbrandstowwe—vir vervoer werk toe, om ons kos te kook of om ons huise te verlig, te verhit of te verkoel. Die Wêreldhulpbroninstituut sê dat fossielbrandstowwe gebruik word vir “ongeveer 90 persent van die wêreld se vraag na kommersiële energie”. ’n Verslag wat in 2000 deur dié instituut uitgegee is, sê: “Wat energie betref, lewer olie die grootste enkele bydrae tot die wêreld se energievoorraad, naamlik 40 persent, gevolg deur steenkool wat 26 persent en aardgas wat sowat 24 persent lewer.”a

Die tydskrif Bioscience sê: “Jaarliks verbruik elke Amerikaner gemiddeld sowat 93 000 kilowatt-uur [se krag], wat gelykstaande is aan 8 000 liter olie, vir allerhande doeleindes, waaronder vervoer, verhitting en verkoeling.” Meer as 75 persent van Australië, China, Pole en Suid-Afrika se elektrisiteit kom van kragopwekkers wat steenkool gebruik. Indië maak staat op steenkool vir 60 persent van sy elektriese krag, terwyl die Verenigde State en Duitsland steenkool verbrand vir meer as die helfte van hulle elektrisiteit.

“Min mense besef dat die wêreld se voedsel tans met behulp van olie geproduseer word”, sê die joernalis Jeremiah Creedon in ’n artikel met die titel “Life After Oil”. “Petroleum en aardgas is onontbeerlik vir elke stadium van die moderne landbou, van die vervaardiging van kunsmis tot die vervoer van produkte” (Die tydskrif Utne Reader). Maar hoe betroubaar is hierdie energiebronne waarvan die moderne samelewing se lewe en bestaan so afhanklik is? Is daar enige skoner alternatiewe beskikbaar?

[Voetnoot]