Voeding en versorging in die dierewêreld
Deur Ontwaak!-medewerker in Spanje
MENSEOUERS wy dikwels sowat twee dekades aan die grootmaak van hulle kinders. Daarenteen moet baie diere binne ’n kort tydjie gedurende die somermaande hulle kleintjies van ’n volledige voedings- en opleidingsprogram voorsien. ’n Paar voorbeelde sal die moeilike taak toelig waarvoor party diereouers elke jaar te staan kom.
1. Witooievaar In die somer het die ooievaar in die bygaande foto nie tyd vir ’n blaaskans nie. Met honger jong voëls wat gevoer moet word, moet die ooievaar herhaaldelik in die nabygeleë meer na paddas, klein vissies, akkedisse of sprinkane gaan soek, en boonop moet die nes ook van tyd tot tyd herstel word. Albei ouers kom en gaan die hele dag. Die jong voëls eet ontsaglik baie kos. Dink net, gedurende die eerste paar weke kan hulle elke dag die helfte van hulle liggaamsgewig verorber! Selfs nadat hulle leer vlieg het, is jong ooievare etlike weke lank nog steeds van hulle ouers afhanklik.
2. Jagluiperd Jagluiperds is so te sê altyd enkelouergesinne, en dit is die moeder wat na die welpies omsien. Sy moet amper elke dag iets vang sodat sy genoeg te ete kry wanneer sy haar kleintjies—gewoonlik drie tot vyf welpies—soog. Dit op sigself is geensins ’n maklike taak nie, aangesien die meeste jagtogte misluk. Boonop moet sy haar gesin elke paar dae na ’n ander lêplek verskuif omdat leeus altyd op die uitkyk is na weerlose welpies. Sodra die welpies sewe maande oud is, begin sy hulle leer om self te jag; ’n tydsame proses wat nog ’n jaar of wat kan duur. Die welpies bly gewoonlik ’n jaar tot ’n jaar en ’n half saam met hulle moeder.
3. Kleindobbertjie Dobbertjies en hulle kleintjies is feitlik onafskeidbaar. Sodra die kuikens uitbroei, verlaat hulle hulle drywende nes vir die gemak van hulle ouers se rug. Die kuikens klim op die ouers se rug, en sit tussen die vlerk en dorsale vere. Daar word die kuikens warm gehou en beskerm terwyl ma of pa rondswem. Die ouers maak beurte om vir kos te duik en die kleintjies te dra. Hoewel die kuikens gou leer om te duik en self kos te vind, bly hulle nog ’n geruime tyd by die ouers.
4. Kameelperd Kameelperde het selde meer as een kalfie op ’n keer, en dit is nie moeilik om te verstaan waarom nie. ’n Pasgebore kameelperd, soos die een op die bygaande foto, kan tot 60 kilogram weeg en twee meter lank wees! ’n Uur ná die geboorte is die jong kameelperd op die been en drink hy weldra sy moeder se melk. Hy sal nege maande lank soog, hoewel hy reeds kort ná sy geboorte begin wei. Wanneer daar gevaar is, gaan staan die jong kameelperd tussen sy moeder se bene, aangesien haar kragtige skoppe uitstekende beskerming bied teen die meeste roofdiere.
5. Gewone visvanger Visvangers moet vinnig sowel as selektief wees wanneer hulle vis vir hulle jong kuikens vang. Voëlkundiges het ontdek dat albei ouers die pas uitgebroeide kuikens met klein vissies voer wat tussen een en twee sentimeter lank is. Die ouer dra die vissies versigtig in sy snawel met die kopgedeelte wat by sy bek uitsteek. Dit maak dit makliker vir die honger kuikens om hulle kos in te sluk as die kop eerste ingaan. Namate die kuikens groter word, bring die ouers effens groter visse nes toe. Die ouers vermeerder ook geleidelik die aantal maaltye. In die begin word elke kuiken omtrent elke 45 minute gevoer. Maar wanneer die kuikens omtrent 18 dae oud is, het hulle ’n ontsaglike eetlus en kry hulle elke 15 minute ’n vis om te eet! Die jong voël in die foto het reeds die nes verlaat en sal binnekort sy eie vis vang. Jy dink dalk dat die ouers op hierdie stadium ’n welkome blaaskans sal neem. Maar nie die visvanger nie! Gedurende dieselfde somer begin hulle dikwels die hele proses van voor af met ’n tweede broeisel.
Baie besonderhede oor hoe verskillende diere vir hulle kleintjies sorg, is natuurlik nog onbekend. Maar hoe meer natuurkenners ontdek, hoe duideliker word dit dat ouerinstink ’n sterk krag in die dierewêreld is. As God sy diereskepping met hierdie gawe toegerus het, wil hy ongetwyfeld ook hê dat menseouers hulle kinders die voeding en versorging gee wat hulle toekom.