Jongmense in ’n krisis
◼ In die Verenigde State brand ’n 15-jarige leerling op sy klasmaats los, 2 sterf en 13 word gewond.
◼ In Rusland vermoor ’n groep dronk tieners ’n negejarige meisie op wreedaardige wyse en rand haar vader en neef aan.
◼ In Brittanje slaan en steek ’n 17-jarige seun ’n jonger tiener met ’n mes. “Ek wou hom aanvanklik nie doodmaak nie”, sê hy vir die polisie, “maar toe ek die bloed sien, kon ek nie ophou nie.”
SKOKKENDE gebeure soos dié is nie geïsoleerde gevalle nie. Dit kan nie afgemaak word as blote uitsonderings nie. “Jeuggeweld is ’n groot probleem in ons samelewing”, sê ’n artikel in Professional School Counseling. Statistieke steun hierdie bewering.
Die Amerikaanse Nasionale Sentrum vir Opvoedkundige Statistiek sê dat, hoewel daar ’n afname in aangemelde skoolgeweld in die Verenigde State was, “leerlinge tussen die ouderdomme van 12 en 18 in 2001 die slagoffers was van sowat 2 miljoen nienoodlottige geweldsmisdade of diefstalle by die skool”. Daar was ook ’n toename in aangemelde gevalle van afknouery by skole.
Medeleerlinge is egter nie die enigste slagoffers van jeuggeweld in die Verenigde State nie. Dieselfde bron sê: “In die 5 jaar tussen 1997 en 2001 was onderwysers die slagoffers van ongeveer 1,3 miljoen nienoodlottige misdade by die skool, insluitende 817 000 diefstalle en 473 000 geweldsmisdade.” Daarbenewens “het leerlinge 9 persent van alle laer- en hoërskoolonderwysers met geweld gedreig, en 4 persent van hulle is deur ’n leerling aangerand”.
Wat is die situasie in ander lande? “In 2003 is daar 69 780 jeugmisdadigers in China gearresteer”, berig een nuusagentskap, “wat 12,7 persent meer is as in 2002.” Die berig sê dat “70 persent van alle jeugmisdade deur bendes gepleeg word”. In 2003 het ’n verslag uit Japan ook gesê dat jongmense verantwoordelik was vir die helfte van die misdade wat in die vorige tien jaar gepleeg is.
Dwelms—die vernietiging van jong liggame
’n Verdere bewys van die krisis hou verband met wat talle jongmense aan hulle eie liggaam doen. ’n Verslag deur die Amerikaanse Nasionale Instituut vir Dwelmmisbruik sê dat sowat die helfte van alle tieners in daardie land al met onwettige dwelmmiddels geëksperimenteer het voordat hulle hoërskool klaargemaak het. Die verslag voeg by: “Alkoholgebruik is nog steeds baie algemeen onder vandag se tieners. Amper vier uit vyf leerlinge (77%) het teen die einde van hulle hoërskoolloopbaan alkohol gedrink (meer as net ’n paar slukkies); en bykans die helfte (46%) het dit al in graad agt gedoen.”
Promiskue seks
In hierdie eeu van vigs is promiskue seks ongetwyfeld gevaarlik. Tog lyk dit of seks vir baie jongmense niks meer as ’n onskadelike speletjie is nie. Party jongmense sê byvoorbeeld ongeërg dat hulle “bymekaarkom”—’n eufemisme wat losse seks onskuldig laat klink. Hulle praat van “’n vriend met byvoordele”—’n seksmaat wat geen emosionele eise stel nie.
Die skrywer Scott Walter beskryf die losbandige partytjies wat sommige voorstedelike jongmense hou terwyl hulle ouers by die werk is. By so ’n partytjie het ’n jong meisie aangekondig dat “sy seks gaan hê met al die seuns wat daar was. . . . Kinders van net 12 jaar was by die partytjies betrokke.”
Is dit skokkend? Nie vir kenners wat seksuele gedrag onder tieners bestudeer nie. “Oor die afgelope 20 jaar”, skryf dr. Andrea Pennington, “het ons gesien dat die gemiddelde ouderdom van tieners wat seksueel aktief is, al hoe laer word. Dit is nie meer iets vreemds dat seuns en meisies begin om seks te hê wanneer hulle net 12 jaar oud is nie.”
’n Berig in die koerant USA Today was veral onrusbarend: “Al hoe meer van die land se jongste tieners . . . het orale seks. . . . Jongmense het hulleself oortuig dat ‘dit nie werklik seks is nie’.” Volgens een opname van 10 000 meisies het “tagtig persent gesê dat hulle maagde is, maar 25% het al orale seks gehad. En 27% het dit beskryf as ‘iets wat jy saam met ’n seun doen vir die pret’.”
Sulke beskouings van seks het ook op ander plekke kop uitgesteek. “Asië se jongmense word weens heteroseksuele verhoudings al hoe vatbaarder vir MIV, en baie raak op ’n jonger ouderdom seksueel aktief”, berig UNESCO, en voeg by: “Tieners verwerp al hoe meer hulle ouers se ‘Asiatiese waardes’ deur voorhuwelikse seks te hê, en dikwels met baie seksmaats.”
Is daar verdere tekens van die krisis onder jongmense? Kanada se Women’s Health Weekly berig: “Vyf-en-twintig persent van vroue tussen die ouderdomme van 16 en 19 sal ’n episode van major depressie ondervind.” Depressie is egter ’n siekte wat albei geslagte aantas. Volgens U.S.News & World Report pleeg sowat vyfduisend jongmense elke jaar selfmoord. Om die een of ander rede, sê die berig, “is daar ses keer meer seuns as meisies wat selfmoord pleeg”.
Daar bestaan geen twyfel dat vandag se jongmense baie probleme het nie. Wat sit agter hierdie krisis?
[Foto-erkenning op bladsy 3]
STR/AFP/Getty Images