Jongmense vra . . .

Kan ’n Internetverhouding regtig gevaarlik wees?

“Op die Internet weet jy dalk nie werklik wie die ander persoon is nie.”—Dan, 17.a

“Mense kan op die Internet leuens vertel. Dis maklik om voor te gee dat jy iets is wat jy nie werklik is nie.”—George, 26.

INTERNETVERHOUDINGS word wêreldwyd al hoe gewilder. Soos die vorige artikel in hierdie reeks bespreek het, kan ’n Internetromanse vinnig blom, maar wanneer die werklikheid intree, verwelk dit dikwels.b Maar behalwe dat ’n mens teleurgestel kan word, is daar ’n ernstiger rede tot kommer. Hierdie tipe verhouding kan jou in groot gevaar stel—hetsy liggaamlik, emosioneel of geestelik.

Hoe kan iets wat so onskuldig en veilig lyk—’n rekenaar in jou eie huis—in werklikheid vir jou ’n gevaar inhou? Van die gevare hou verband met ’n belangrike Bybelbeginsel. Die apostel Paulus het geskryf: “Ons [wil] ons in alles eerlik . . . gedra” (Hebreërs 13:18). Dit beteken nie dat dit oneerlik is om die Internet te gebruik of selfs dat dit jou oneerlik sal maak as jy die Internet gebruik nie. Ons moet egter erken dat ander mense dikwels oneerlik is en dat die Internet, soos die aanhalings aan die begin van hierdie artikel toelig, dit makliker maak om sekere leuens te vertel en dit moeiliker maak om dit agter te kom. En wanneer dit by romantiese verhoudings kom, skep oneerlikheid baie ernstige gevare.

Kyk byvoorbeeld na die soort oneerlikheid wat in hierdie Bybelvers beskryf word: “Ek het nie by mense van onwaarheid gesit nie; en by dié wat verberg wat hulle is, gaan ek nie in nie” (Psalm 26:4). Wat word bedoel met “dié wat verberg wat hulle is”? Sommige Bybelvertalings vertaal dit met “huigelaars”. Volgens een naslaanwerk kan hierdie uitdrukking toegepas word op “dié wat hulle voornemens of planne vir ander verberg of wat hulle ware karakter en bedoelings wegsteek”. Hoe word dit op die Internet gedoen? En watter gevare hou dit in vir diegene wat op soek is na ’n verhouding?

Wolwe in skaapsklere

’n Vader met die naam Michael was geskok toe hy by ’n seminaar hoor dat heelwat kinders hulle nie steur aan hulle ouers se reëls om nie gevaarlike webwerwe te besoek nie. “Wat my selfs meer ontstel het”, sê hy, “was toe ek tot die skokkende besef gekom het dat pedofiele die Internet kan gebruik om minderjariges te verlok om aan verdorwe seksuele bedrywighede deel te neem.” Wanneer jongmense die Internet gebruik om mense te ontmoet, kan hulle in veel groter gevaar verkeer as wat hulle besef.

Trouens, daar was al nuusberigte oor volwasse seksmisdadigers wat voorgee dat hulle jongmense is terwyl hulle die Internet gebruik om jong slagoffers te soek. Volgens een studie is “een uit vyf kinders wat die Internet gebruik, al gevra om seks te hê”. ’n Koerant het ook gesê dat 1 uit 33 kinders tussen die ouderdomme van 10 en 17 “op aggressiewe wyse lastig geval” is deur middel van rekenaargesprekke.

Sommige jongmense het tot hulle verbasing uitgevind dat die “jong persoon” met wie hulle ’n ontluikende romanse op die Internet gehad het, in werklikheid ’n volwasse gevangene is. Ander jongmense het onwetend by seksmisdadigers betrokke geraak. Hierdie walglike mense stel ’n potensiële slagoffer eers gerus en wen sy vertroue deur vriendelike aanlyn-gesprekke. Mettertyd probeer hulle egter ’n persoonlike afspraak reël om hulle verdorwe begeertes te bevredig. Dit is tragies dat jongmense al aangerand, verkrag en selfs vermoor is as gevolg hiervan.

Ja, goddelose mense “verberg wat hulle is” sodat hulle slagoffers op die Internet kan vind. Sulke seksmisdadigers herinner jou dalk aan Jesus se illustrasie oor valse profete wat “in skaapsklere na julle toe kom”, maar in werklikheid soos “roofsugtige wolwe” is (Matteus 7:15). Kommunikasie met vreemdelinge op die Internet kan dit amper onmoontlik maak om sulke oneerlikheid te identifiseer. “Wanneer jy van aangesig tot aangesig met iemand praat”, sê George, wat vroeër aangehaal is, “kan jy dinge uit sy gesigsuitdrukkings en sy stemtoon aflei. Maar op die Internet kan daardie dinge jou nie help nie. Jy kan maklik om die bos gelei word.”

Die Bybel gee beslis wyse raad: “Skerpsinnig is die een wat die rampspoed gesien en hom verberg het, maar die onervarenes het verder gegaan en moet die straf ondergaan” (Spreuke 22:3). Toegegee, nie almal wat jy op die Internet ontmoet, is gevaarlik nie. Daar is egter ander maniere waarop mense “verberg wat hulle is”.

Die gevare van bedrog en geheimhouding

Dit is nie verbasend nie dat diegene wat op soek is na ’n Internetromanse, dikwels goeie eienskappe oordryf of versin en ernstige foute verklein of verberg. Volgens The Washington Post het ’n skrywer ook gesê: “’n Internetverhouding kan gevaarlik wees, want mense word bedrieg.” Verder sê dit: “Mense is dikwels oneerlik oor watter geslag hulle is. . . . Hulle inkomste, . . . ras, kriminele rekord, geestesgesondheidsgeskiedenis en huwelikstaat bly dikwels ’n geheim tot veel later in die verhouding.” Om ander te waarsku, het baie mense vertel van die pynlike ervaring wat hulle deurgemaak het toe hulle bedrieg is deur iemand met wie hulle ’n Internetverhouding gehad het.

Sal mense oneerlik wees oor iets wat so belangrik is soos hulle geestelikheid? Ja, ongelukkig sal hulle—party beweer dat hulle ware Christene is terwyl hulle nie is nie. Waarom is hulle so bedrieglik? Een rede is weer eens dat die Internet dit maklik maak. Sean, ’n jong man van Ierland, erken: “Wanneer jy iets op ’n rekenaar tik, is dit baie maklik om voor te gee dat jy iets is wat jy nie werklik is nie.”

Baie mense neem al hierdie bedrog ligtelik op en redeneer dat dit net natuurlik is om in die beginstadium van ’n romanse die waarheid so bietjie te verdraai. Onthou egter dat God leuens haat (Spreuke 6:16-19). En heel tereg. Baie van die pyn en lyding in hierdie wêreld spruit voort uit leuens (Johannes 8:44). Oneerlikheid is die slegste grondslag vir enige verhouding, veral een wat bedoel is om lewenslank te duur. Nog erger, oneerlikheid hou ’n geestelike gevaar in; dit skaad die leuenaar se verhouding met Jehovah God.

Ongelukkig het sommige jongmense voor ’n ander soort oneerlikheid geswig. Hulle het verhoudings deur middel van die Internet aangeknoop en dit vir hulle ouers weggesteek. ’n Tienerseun se ouers was byvoorbeeld uit die veld geslaan toe ’n jong vrou wat nie dieselfde Christelike oortuigings as hulle gesin het nie, op ’n dag onverwags by hulle huis opgedaag het nadat sy meer as 1 500 kilometer ver gereis het. Hulle seun het al ses maande lank ’n Internetverhouding met haar gehad, maar tot op daardie oomblik was hulle salig onbewus van haar bestaan!

“Hoe kon dit gebeur het?” het die ouers gevra. Hulle het gedink: ‘Ons seun kon tog sekerlik nie verlief geraak het op iemand wat hy nog nooit persoonlik ontmoet het nie.’ Hulle seun het hulle in werklikheid mislei—hy het as ’t ware verberg wat hy werklik is. Stem jy nie saam dat sulke bedrog ’n slegte grondslag vir ’n hofmakery is nie?

Kies die werklike bo die virtuele

Internetverhoudings kan ander gevare inhou. In sommige gevalle kan ’n Internetvriend vir jou werkliker word as die mense wat jy elke dag sien. Jou gesin, vriende en verantwoordelikhede kan die tweede plek begin inneem. Monika, ’n jong vrou in Oostenryk, sê: “Ek het belangrike verhoudings begin afskeep omdat ek soveel tyd met mense op die Internet deurgebring het.” Dit het haar gepla, en sy het besluit om nie meer die Internet op hierdie manier te gebruik nie.

Baie weet natuurlik hoe om die Internet op ’n gebalanseerde manier te gebruik. Kommunikasie deur middel van e-pos kan ’n baie nuttige manier wees om in aanraking te bly met vriende en geliefdes. Maar jy sal beslis saamstem dat om van aangesig tot aangesig met iemand te gesels die beste manier is om te kommunikeer. As jy “verby die bloei van die jeug” is—die tyd wanneer seksuele begeertes op hulle sterkste is—en graag wil trou, het jy voor een van die heel belangrikste besluite in jou lewe te staan gekom (1 Korintiërs 7:36). Neem dus ’n verantwoordelike besluit.

Die Bybel vermaan: “Iemand wat onervare is, glo elke woord, maar die skerpsinnige gee ag op sy voetstappe” (Spreuke 14:15). Tree verstandig op en moenie alles glo wat iemand vir jou skryf as jy hom nog nooit ontmoet het nie. Dit is baie verstandiger om iemand persoonlik te ontmoet en ’n vriendskap aan te knoop. Vind uit of julle werklik by mekaar pas, veral wanneer dit by jou geestelike doelwitte en waardes kom. So ’n hofmakery kan tot ’n waarlik gelukkige huwelik lei.

[Voetnote]

[Prente op bladsy 12]

Weet jy werklik wie dit is wat boodskappe op die Internet tik?

[Prent op bladsy 14]

Wanneer dit by hofmakery kom, is daar geen plaasvervanger vir ’n persoonlike ontmoeting nie