Kom luister na die openbare toespraak “Aan wie behoort ons gehoorsaamheid?”
Die blote gedagte om aan iemand gehoorsaam te wees, is vir baie mense iets onaangenaams. ‘Ek wil vry wees om te doen wat ek wil’, is ’n algemene siening. Die feit is egter dat almal van ons in ons daaglikse lewe waarde heg aan gehoorsaamheid. Elke keer as jy op ’n waarskuwingsteken ag slaan of instruksies volg, toon jy ’n mate van gehoorsaamheid. En wie van ons kan werklik ontken dat dit nodig is om die wette van sekulêre owerhede te gehoorsaam om orde en vrede in die mensegemeenskap te handhaaf? Dink net wat sou gebeur as alle mense geweier het om die verkeerswette te gehoorsaam!
Maar wanneer mense gesag uitoefen oor ander mense, is die resultate nie altyd goed nie. Lank gelede het die Bybel gesê dat “die mens oor die mens geheers het tot sy nadeel” (Prediker 8:9). Is daar ’n heerser wat ons vertroue en gehoorsaamheid waardig is? Indien wel, hoe kan ons hom identifiseer? En wat kan ons onder sy heerskappy verwag? Hierdie vrae sal beantwoord word in die besielende toespraak “Aan wie behoort ons gehoorsaamheid?” Hierdie openbare toespraak sal later vanjaar by die streekbyeenkomste van Jehovah se Getuies gehou word. Daar sal honderde van hierdie byeenkomste regoor die wêreld wees. As jy wil uitvind waar die byeenkoms naaste aan jou gehou sal word, kan jy gerus met Jehovah se Getuies in jou omgewing in verbinding tree of aan die uitgewers van hierdie tydskrif skryf by die gepaste adres op bladsy 5.