Wanneer drake verdwyn
“TOE ek binne ’n meter van hom af was, het die draak se gedrag skielik verander”, vertel David Hall in die tydskrif Ocean Realm. “Hy het opgehou eet en weggedraai, deel geword van die seewier daar naby en op uiters bedrewe wyse voor my oë verdwyn.” Hall het met verwondering gesê: “Hierdie diertjie is ’n meester van kamoeflering.” Hy het die unieke geleentheid gehad om met hierdie onverwagte ontmoeting Australië se blaarseedrakie—een van die natuur se indrukwekkendste voorbeelde van onderwaterkamoeflering—te sien.
Blaarseedrakies beweeg stadig en maak ten volle staat op kamoeflering om nie deur honger roofvisse opgeëet te word nie. Hulle geel-groen liggaamstrepe en buitengewone rangskikking van blaarvormige aanhangsels laat hulle met hulle seewieromgewing saamsmelt sodat hulle feitlik onsigbaar is. Hulle swem selfs met ’n ritmiese, wiegende beweging, wat drywende seegras volmaak naboots.
Hierdie gesofistikeerde kamoeflering stel hulle in staat om hulle gunstelingkos, piepklein garnale (Mysiodopsis bahia), stilletjies te bekruip. “Hulle is so goed gekamoefleer dat die garnale hulle nie as ’n bedreiging beskou nie”, sê een waarnemer. Die seedrakie speel gou klaar met die garnale terwyl hy verbyswem—hy suig hulle vinnig op met sy lang snoet en sluk hulle heel in. Hierdie kort jagekspedisies word afgewissel met lang tydperke—tot drie dae lank—waartydens die seedrakie tevrede is om op dieselfde plek te bly en enige prooi te vang wat verbykom.
Blaarseedrakies kan slegs in die vlak waters langs Australië se suidelike kus gevind word. Hulle slangagtige liggame en blaarvormige aanhangsels lyk soos die drake van Chinese feeste, waarna hulle vernoem is. Hulle word tot 43 sentimeter lank en is groter lede van die visfamilie waartoe seeperdjies behoort.
Wanneer dit kom by geboorte gee, is die rolle van die mannetjie- en wyfieseedrakies omgekeer. Ja, die mannetjie raak swanger en bring die kleintjies in die wêreld! Wanneer lente aanbreek, ontwikkel die toekomstige vader ’n bloedryke broeisak met ongeveer 120 klein eierholtetjies al met sy stert langs. Die wyfieseedrakie plaas haar helderpienk eiers dan in hierdie broeisak en sit elke eier stewig in sy individuele holtetjie. Vier tot ses weke later word die babaseedrakies wat 20 millimeter lank is, gebore, elkeen ’n piepklein replika van hulle ouers.
Hierdie pragtige diertjies is in werklikheid maar net nog ’n voorbeeld van Jehovah God se skeppingsvermoë en kunstalent!—Psalm 104:24, 25.
[Prente op bladsy 25]
’n Dragtige mannetjieblaarseedrakie met eiers; inlas toon ’n nabyfoto van die broeisak
[Prente op bladsy 25]
Gekamoefleerde blaarseedrakie; inlasfoto toon die diertjie
[Foto-erkenning op bladsy 25]
Alle foto’s behalwe broeisak: Michael Morris-Immersedimagery@scubadiving.com