Die toekoms van toerisme
“Daar is voorbeelde uit amper elke land in die wêreld waar toerismeontwikkeling as die vernaamste oorsaak van omgewingsagteruitgang geïdentifiseer is.”—An Introduction to Tourism, deur Leonard J. Lickorish en Carson L. Jenkins.
DIE uitbreiding van die toeristebedryf is dalk nie net ’n bedreiging vir die omgewing nie, maar kan ook tot ander probleme bydra. Kom ons kyk kortliks na van hierdie probleme. Daarna sal ons bespreek watter toekomstige moontlikhede daar is om ons wonderlike aarde te verken en vertroud te raak met sy wonders, in die besonder sy lieflike mense.
Omgewingsprobleme
Daar is vandag soveel toeriste dat dit tot probleme lei. “In Indië gaan die Taj Mahal agteruit weens al die besoekers”, skryf die navorsers Lickorish en Jenkins, en hulle voeg by: “In Egipte word die piramides ook deur groot getalle besoekers bedreig.”
Verder waarsku hierdie skrywers dat onbeheerde toerisme plante kan vernietig of hulle groei kan belemmer wanneer hordes besoekers deur bewaringsgebiede stroom. Daarbenewens kan dit spesies bedreig wanneer toeriste seldsame seeskulpe, koraal, ensovoorts versamel of wanneer plaaslike inwoners dit versamel om aan toeriste te verkoop.
Toeriste produseer besoedeling—elke dag gemiddeld een kilogram vaste afval en rommel per toeris, volgens skattings deur die VN se Omgewingsprogram. Selfs die mees afgeleë plekke word blykbaar hierdeur geraak. ’n Onlangse verslag deur die Reënwoud-aksienetwerk sê: “Op gewilde Himalaja-toeristeroetes is rommel langs die voetpaadjies gestrooi en [is] die hoogliggende woude vernietig deur reisigers wat op soek was na hout om kos en badwater warm te maak.”
Daarbenewens gebruik toeriste dikwels ’n buitensporige deel van die hulpbronne ten koste van die plaaslike inwoners. James Mak skryf byvoorbeeld in sy boek Tourism and the Economy: “Toeriste in Grenada gebruik sewe keer meer water as die plaaslike mense.” Hy voeg by: “Veertig persent van Hawaii se energieverbruik kan direk of indirek aan toerisme toegeskryf word, hoewel gemiddeld slegs een uit elke agt mense in Hawaii ’n toeris is.”
Al gee toeriste dalk baie geld uit om ontwikkelende lande te besoek, bevoordeel die meeste daarvan nie die plaaslike bevolking nie. Die Wêreldbank skat dat slegs 45 persent van die inkomste uit toerisme die gasheerland bereik—die meeste van die geld keer terug na ontwikkelde lande deur middel van buitelandse toerorganiseerders en akkommodasiegeriewe wat aan buitelanders behoort.
Nadelige maatskaplike impak
Redelik welgestelde Westerse toeriste wat ontwikkelende lande besoek, kan plaaslike kulture op ander subtiele—en soms minder subtiele—maniere nadelig beïnvloed. Toeriste bring byvoorbeeld dikwels hulle materiële geriewe saam met hulle. Vir die plaaslike mense is sulke weelde dalk iets ongekends. Baie van die plaaslike mense begin sulke luukshede begeer, maar kan nie daarvoor betaal sonder om groot veranderinge in hulle lewenswyse aan te bring nie—veranderinge wat dalk skadelike sosiale gedrag behels.
Mak het probleme genoem wat kan ontstaan en gesê dat die toename in toerisme “tot die verlies van kulturele en gemeenskapsidentiteit kan lei, konflik in tradisionele gemeenskappe oor die gebruik van die gemeenskap se land en natuurlike hulpbronne kan laat ontstaan en ’n toename in antisosiale bedrywighede, soos misdaad en prostitusie, kan veroorsaak”.
Deesdae voel toeriste dikwels dat hulle kan maak soos hulle wil, en daarom doen hulle dinge wat hulle nie by die huis saam met familie en vriende sou gedoen het nie. Die onsedelikheid van toeriste het gevolglik ’n ernstige probleem geword. Mak het na ’n bekende voorbeeld verwys en gesê: “Wêreldwyd is daar toenemende kommer oor die uitwerking wat toerisme op kinderprostitusie het.” In 2004 het die CNN-nuusagentskap berig: “‘Volgens betroubare skattings is daar 16 000-20 000’ slagoffers van kinderseks in Mexiko, ‘meestal in grens-, stads- en toeristegebiede’.”
Die voordele daarvan om te reis
Ons aarde is ’n merkwaardige tuiste met eindelose wonders—kleurvolle sonsondergange, die glinsterende sterrehemel en ’n verskeidenheid plant- en diersoorte. Ongeag waar ons woon, ons geniet sommige van hierdie en ander wonders van ons aardse tuiste. Maar wat ’n genot is dit tog as ons die geleentheid kry om te reis en ander voorbeelde van die aarde se wonders te sien!
Hoewel toeriste beïndruk is deur die aarde se fisiese wonders, sê baie van hulle dat dit vir hulle die hoogtepunt van hulle reis was om mense van ander kulture te ontmoet. Reisigers besef dikwels dat negatiewe beskouings oor ander mense ongegrond is. Hulle reise help hulle om mense van ander rasse en kulture te verstaan en om kosbare vriendskappe te sluit.
’n Les wat baie toeriste leer, is dat besittings mense nie noodwendig gelukkig maak nie. Van groter belang is ’n mens se verhouding met ander—om gevestigde vriendskappe te geniet en nuwes aan te knoop. ’n Verslag in die Bybel vertel hoe eerste-eeuse reisigers wat skipbreukelinge was, baat gevind het by die “mensliewendheid” van die “andertalige mense” van Malta (Handelinge 28:1, 2). Besoeke aan ander lande en volke in ons tyd het baie al gehelp om te besef dat ons waarlik een mensegesin is en dat ons die potensiaal het om in vrede op die aarde saam te lewe.
Betreklik min mense het vandag die geleentheid om verskillende wêrelddele te besoek. Maar wat van die toekoms? Is dit moontlik dat die meeste, indien nie almal nie, die geleentheid sal hê om te reis?
Toekomsvooruitsigte
Die feit is dat ons almal aan mekaar verwant is, lede van die mensegesin. Die eerste mensepaar het wel gesterf, soos God hulle gewaarsku het sou gebeur as hulle ongehoorsaam aan hom sou wees (Genesis 1:28; 2:17; 3:19). Al hulle nakomelinge, insluitende almal van ons wat vandag lewe, word dus ook oud en sterf (Romeine 5:12). Maar God belowe dat sy oorspronklike voorneme dat die aarde bewoon moet word deur mense wat hom liefhet, vervul sal word. “Ek het dit gespreek”, sê sy Woord, “ek sal dit ook doen”.—Jesaja 45:18; 46:11; 55:11.
Dink net wat dit sal beteken! Die Bybel belowe dat, onder die heerskappy van God se Koninkryk, ‘die regverdiges die aarde sal besit en vir ewig daarop sal woon’ (Psalm 37:29; Matteus 6:9, 10). Waar dit die toekomstige situasie van mense op aarde beskryf, sê die Bybel: “God self sal by hulle wees. En hy sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie.”—Openbaring 21:3, 4.
Dink aan die wonderlike geleenthede wat daar dan sal wees om te reis en vertroud te raak met die aarde se wonders, veral sy lieflike mense. In daardie tyd sal ons ons glad nie oor ons veiligheid hoef te bekommer nie! Almal op aarde sal dan ons vriende wees—trouens, die Bybel praat van ’n ‘hele gemeenskap van broers in die wêreld’.—1 Petrus 5:9.
[Prente op bladsy 8, 9]
Om met mense van ’n ander kultuur vriende te maak, kan ’n hoogtepunt van ’n reis wees
In die toekoms sal daar onbeperkte moontlikhede wees om mense en plekke te besoek