Van ons lesers

Vetsug Ek wil julle graag bedank vir julle reeks “Vetsug—Wat is die oplossing?” (8 November 2004). Ek het 50 kilogram verloor deur ’n gesonder eetprogram te volg en elke dag te oefen. Sedertdien het ek meer uithouvermoë, en ek kan nou langer in die bediening bly sonder om uitgeput te raak.

M. E., Verenigde State

Ek is in my laat veertigerjare en ek het meer aandag aan my gesondheid begin gee, maar ek was nie baie besorg oor die feit dat ek oorgewig is nie. Ek het nou besluit om gewig te verloor. Ek het sommer dadelik begin. Hierdie reeks verseker my dat Jehovah na elkeen van ons omsien.

H. S., Japan

Dankie vir die feitelike inligting oor vetsug. Ek het vandag met my oefenprogram begin, sowel as om gesonder te eet. Ek lees julle tydskrif al meer as 30 jaar, en dit het my werklik al baie in my lewe gehelp!

N. J., Verenigde State

Ek weeg 160 kilogram. Volgens die tabel op bladsy 5 moet ek 76 kilogram weeg. Ek sal hard moet werk om al hierdie gewig te verloor. Ek weet dat hierdie artikel en die ondervindinge daarin my sal help.

W. O., Verenigde State

Ek is bly om te weet dat Jehovah en sy organisasie oor ons gesondheid besorg is. Wat my egter bekommer het, was die tabel op bladsy 5. Party dokters gebruik ’n tabel wat die minimum tot maksimum gewig vir ’n persoon se liggaamsbou toon. Ek het ’n groot liggaamsbou, en my gewig sal dus verskil van iemand van dieselfde lengte maar met ’n klein liggaamsbou.

C. S., Verenigde State

“Ontwaak!” antwoord: Dankie vir hierdie inligting. Wat op bladsy 5 verskyn, is bloot een soort tabel wat iemand kan help om te bepaal hoeveel hy of sy veronderstel is om te weeg. Ons het nie bedoel om te impliseer dat ander benaderings minder geldig is nie.

Die reeks het die algemene siening weerspieël dat iemand wat maer is, suksesvol is, terwyl die teenoorgestelde geld vir iemand wat oorgewig is. Beteken die feit dat ek oorgewig is dat ek lui, ongemotiveerd en nutteloos is?

I. J., Duitsland

Dit lyk vir my of julle die sielkundige aspek van hierdie probleem buite rekening gelaat het. Ek stem saam dat dit belangrik is om teen vetsug te stry, maar gestel iemand is onsuksesvol. Hoe sal hy of sy voel?

J. Z., Rusland

Party lesers sal dalk die indruk kry dat Jehovah net maer mense liefhet of dat net mense met ’n “normale” gewig Jehovah se Getuies mag wees.

R. B., Duitsland

“Ontwaak!” antwoord: Die bogenoemde drie lesers het punte geopper wat nie in ons reeks bespreek is nie. Vetsug het wel verskeie oorsake wat dalk nie met oormatige etery verband hou nie. Party soorte medikasie kan byvoorbeeld veroorsaak dat ’n persoon gewig aansit. Genetiese faktore kan dit ook moeiliker maak vir party om gewig te verloor. Wat ook al die oorsaak is, ons het nie bedoel om te impliseer dat slegs mans en vroue met die ideale gewig vir God aanneemlik is nie. Hopelik het ons reeks elkeen wat graag ’n gesonde eetprogram en oefenrooster wil volg, aangespoor en van praktiese wenke voorsien sodat hulle oortollige gewig kan afskud. Sulke programme red lewens. Ons is jammer oor enige misverstand in hierdie verband.