Jongmense vra . . .
Internet-kletskamers—Wat behoort ek daaromtrent te weet?
“Selfs al is ek skaam kan ek in ’n kletskamer op die Internet met mense gesels met wie ek nie gewoonlik sou praat nie. Hulle het geen idee wie ek is nie.”—Peter.a
“In ’n kletskamer kry jy die gevoel dat jy kan sê net wat jy wil.”—Abigail.
KLETSKAMERS is “plekke” op die Internet waar gebruikers deur middel van teksboodskappe direkte gesprekke met mekaar kan voer. In ’n kletskamer kan baie mense mekaar se boodskappe lees en daarop antwoord.
Party kletskamers is besonder aanloklik vir jong Internetgebruikers. Miljoene jongmense uit ’n verskeidenheid kulture ruil daagliks hulle opinies uit oor omtrent enige onderwerp. Party skole benut nou hierdie wêreldwye hulpbron. Leerlinge in die Verenigde State kan byvoorbeeld, onder toesig van hulle onderwyser, maatskaplike geskille met medeleerlinge in Spanje, Engeland of êrens anders bespreek. Leerlinge kan selfs met ’n gekwalifiseerde ingenieur, chemikus of ’n ander deskundige oor hulle klasprojek gesels.
Maar baie mense wat kletskamers besoek, doen dit nie om akademiese onderwerpe te bespreek nie. Van watter gevare moet jy bewus wees as jy tot die Internet toegang het?
Waar seksuele uitbuiters rondsluip
“Ek was besig om met ’n paar mense in ’n kletskamer te gesels”, vertel Abigail, “toe ’n man my vra of ek enige 14-jariges ken. Hy wou met hulle seks hê. Hy het gesê dat hy bereid is om vir hulle geld te gee vir seks.”
Abigail se ondervinding is nie ’n geïsoleerde geval nie. Die probleem van aanlynuitbuiters is so algemeen dat sommige regerings riglyne verskaf het oor hoe jongmense beskerm kan word. ’n Publikasie van die Amerikaanse Federale Speurdiens (FBI) waarsku byvoorbeeld teen mense wat dadelik met seksueel eksplisiete gesprekke begin. Dit waarsku ook teen diegene wat “hulle teikens geleidelik verlei deur aan hulle aandag te skenk, liefde te betoon, met hulle vriendelik te wees en selfs vir hulle geskenke te gee”.
Waar die FBI-gids die spesifieke metodes van sommige van hierdie uitbuiters beskryf, sê dit: “Hulle luister na en toon empatie met kinders se probleme. Hulle sal weet van die nuutste musiek, stokperdjies en belangstellings van kinders. Hierdie persone probeer die kinders se inhibisies geleidelik afbreek deur stadig seksuele woorde, frases en onderwerpe in hulle gesprekke in te voer.”
Dit is nie net perverse volwassenes wat ’n gevaar inhou nie. Jy moet ook oppas vir jongmense wat die Bybel se sedelike standaarde nie ken nie of dit nie respekteer nie. Neem byvoorbeeld die ondervinding van ’n jong man met die naam Cody. Hy was besig om op die Internet met ander jongmense te gesels toe ’n meisie hom na ’n private kletskamer nooi. Sy het hom toe ’n seksueel suggestiewe vraag gevra. Cody het die selfbeheersing gehad om die gesprek onmiddellik te beëindig.
Omdat dit natuurlik is om in seks belang te stel, is dit dalk vir jou uiters moeilik om soos Cody te reageer. Peter, wat vroeër gemeld is, erken: “Ek het gedink dat ek genoeg selfbeheersing het om ’n kletssessie te stop as die gesprek oor seks begin handel. Maar ek het keer op keer gevind dat ek aangebly het en saam oor seksuele onderwerpe gesels het. Ek het later sleg gevoel.” Maar jy wonder dalk: ‘As ek my ware identiteit wegsteek terwyl ek in ’n kletskamer is, sal dit regtig kwaad doen om op die Internet oor seks te praat?’
Is dit skadelik om seks op die Internet te bespreek?
Die Bybel praat openlik oor seks (Spreuke 5:18, 19). En wanneer mense jonk is, stel hulle meer in seks belang. Jy moet dus oor seks praat. Jy het antwoorde nodig op jou vrae oor hierdie belangrike onderwerp.b Maar die manier waarop jy jou nuuskierigheid oor seksuele sake bevredig, sal ’n verreikende uitwerking op jou geluk hê, nou sowel as in die toekoms.
As jy besluit om seks op die Internet te bespreek, al is dit met mense wat sê dat hulle jou vriende is, kan jy heel moontlik dieselfde ondervinding hê as ’n jong man wat in die Bybel beskryf word. Uit nuuskierigheid het hy naby ’n prostituut se huis rondgedwaal. Eers het sy net met hom gepraat. Maar nadat sy begeerte geprikkel is, was dit nie meer genoeg om net te praat nie. “Skielik loop hy agter haar aan, soos ’n bul wat gaan om geslag te word, . . . net soos ’n voël vinnig in die valstrik invlieg.”—Spreuke 7:22, 23.
Net so kan gesprekke oor seks op die Internet jou maklik groter bevrediging laat soek. “Ek het op die Internet met iemand gesels”, vertel ’n tiener genaamd Philip, “toe ’n onsedelike prent skielik op my skerm verskyn. Die persoon met wie ek gesels het, het dit na my rekenaar gestuur.” As jou begeerte om na seksueel eksplisiete materiaal te kyk eers gewek is, kan jy in die versoeking kom om jou belangstelling verder te voer, soos byvoorbeeld in ’n kletskamer vir volwassenes.c Baie wat in die strik trap om na pornografie te kyk, maak hulle later aan onsedelikheid skuldig en dra dan die onvermydelike gevolge.—Galasiërs 6:7, 8.
Mense wat op die Internet met jou oor seks wil praat, dra nie jou belange op die hart nie. Sulke vreemdelinge wil jou in onsedelike gesprekke—en moontlik dade—inlok om hulle eie begeertes te bevredig.d In ’n poging om sy seun teen ’n seksuele uitbuiter te beskerm, het koning Salomo geskryf: “Hou jou weg ver van haar af, en moenie naby die ingang van haar huis kom nie, sodat jy nie jou waardigheid aan ander gee nie, . . . sodat vreemdelinge hulle nie met jou krag versadig nie” (Spreuke 5:8-10). Die beginsel agter hierdie raad kan só toegepas word: Moenie naby kletskamers kom waar seksuele onderwerpe bespreek word nie sodat jy nie jou waardigheid aan vreemdelinge gee wat net hulleself ten koste van jou wil bevredig nie.
“Dié wat verberg wat hulle is”
Maar miskien sê jy dat jy nie op die Internet oor seks wil praat nie. Soos Peter en Abigail, wat vroeër gemeld is, beskou jy ’n kletskamer dalk as ’n plek waar jy jou anoniem kan uitspreek, sonder om bang te wees dat jy in die verleentheid gebring sal word.e Daar is nietemin ’n ander gevaar waarvan jy behoort te weet.
Die anonieme aard van kletskamers kan jou in die versoeking bring om bedrieglik te word. Abigail sê: “Ek het gesprekke met mense begin en dan ’n persoonlikheid aangeneem wat by die gesprek pas.” Soos Abigail, kan jy in die versoeking kom om ’n ander persoonlikheid aan te neem om by ’n sekere kletskamergroep in te pas. Dalk pas jy jou by hulle taalgebruik aan of begin jy in dieselfde dinge as hulle belangstel omdat jy nuwe vriende probeer maak. Aan die ander kant sien jy ’n kletskamer dalk as ’n plek waar jy idees en gevoelens kan uitspreek wat jy dink jou ouers of vriende nie sou goedkeur nie. Hoe dit ook al sy, jy bedrieg uiteindelik óf die een groep óf die ander. As jy op die Internet voorgee dat jy iemand is wat jy nie is nie, bedrieg jy diegene in die kletskamer. As jy daarenteen nie jou ware gevoelens en idees teenoor jou familie en vriende uitspreek nie, bedrieg jy hulle.
Hoewel kletskamers ’n betreklik nuwe verskynsel is, is die menslike neiging om te lieg en te bedrieg so oud soos die mensdom self. Die Bybel openbaar dat hierdie taktiek, wat deur sommige besoekers aan kletskamers gebruik word, by die oorspronklike leuenaar, Satan die Duiwel, ontstaan het. Hy het sy ware identiteit verberg voordat hy sy eerste leuen vertel het (Genesis 3:1-5; Openbaring 12:9, 10). Jy kan voorkom dat jy mislei word deur koning Dawid se voorbeeld te volg. “Ek het nie by mense van onwaarheid gesit nie”, het hy geskryf, “en by dié wat verberg wat hulle is, gaan ek nie in nie.”—Psalm 26:4.
Soos vroeër gemeld is, kan sommige kletskamers nuttig wees. Nietemin moet jongmense wat Jehovah wil behaag, uiters versigtig wees in hulle gebruik van hierdie moderne kommunikasiemiddel. As jy een moet gebruik, soos vir ’n projek, vra jou ouers of miskien ’n ander verantwoordelike volwassene om gedurende die sessie by jou te sit. ’n Toekomstige artikel sal twee bykomende redes beklemtoon waarom jy versigtig moet wees wanneer jy kletskamers besoek. Dit sal ook bespreek hoe jy spesifieke probleme kan hanteer wat kan ontstaan al is jy versigtig hoe jy dit gebruik.
[Voetnote]
a Van die name is verander.
b Die boek Vrae wat jongmense vra—Antwoorde wat werk bevat betroubare, Bybelse raad oor voorhuwelikse seks, masturbasie en ander soortgelyke onderwerpe.
c Party kletskamers wat geklassifiseer word as vir volwassenes, beperk toegang, teoreties gesproke, tot persone oor ’n sekere ouderdom. Dit is gewoonlik omdat die onderwerpe wat bespreek word en die prente wat rondgestuur word, pornografies is. Opnames toon egter dat selfs kinders van nege leuens oor hulle ouderdom vertel sodat hulle toegang tot kletskamers vir volwassenes kan verkry.
d Aangesien jy nie kan bevestig met wie jy in ’n kletskamer gesels nie, kan die persoon met wie jy praat van dieselfde geslag as jy wees, al gee hy voor dat hy van die teenoorgestelde geslag is.
e A Parent’s Guide to Internet Safety raai aan dat gebruikers nooit hulle naam, adres of telefoonnommer bekend maak aan vreemdelinge wat hulle in kletskamers ontmoet nie!
[Prent op bladsy 20, 21]
Gesprekke op die Internet kan gevaarlik wees