Jongmense vra . . . 

Internet-kletskamers—Hoe kan ek die gevare vermy?

“Ek het gereeld drie of vier uur per dag op die Internet geklets. Partykeer het ek ses of sewe uur aaneen geklets.”—José.a

KLETSKAMERS hou—net soos enige ander plek waar vreemdelinge met mekaar te doen kry—gevare in waarvan jy behoort te weet. Ons kan dit só toelig: As jy ’n groot stad besoek, sou dit logies wees dat jy enige bedreiging vir jou veiligheid probeer verminder deur gevaarlike plekke te identifiseer en dan te vermy.

Dieselfde logika geld wanneer jy ’n kletskamer moet besoek. In die Ontwaak! van 22 September is twee gevare bespreek wat met baie kletskamers gepaardgaan, naamlik die moontlikheid dat jy met seksuele uitbuiters in aanraking kan kom en die versoeking om ’n bedrieër te word. Daar is ander gevare wat die moeite werd is om te bespreek. Maar om mee te begin, hoe word kletskamers georganiseer?

Georganiseer vir ’n doel

Kletskamers word gewoonlik georganiseer volgens onderwerpe wat sekere groepe mense aantrek. Party word dalk vir die entoesiaste van ’n sekere sport of stokperdjie geskep. Ander word dalk gebruik om ’n televisiereeks te bespreek. Nog ander is vir mense wat sê dat hulle aan ’n sekere geloof behoort.

As jy een van Jehovah se Getuies is, sal jy dalk uit nuuskierigheid ’n kletskamer besoek wat skynbaar ’n plek is waar jong Getuies uit allerhande wêrelddele nuwe vriende kan maak. Dit is goed om vriende te soek onder jongmense wat aan dieselfde geloof as jy behoort. Maar in sulke kletskamers is daar verskuilde gevare vir Christene. Watter soort gevare?

Hoe sedelike verdorwenheid ingebring word

“Ek was in ’n kletskamer saam met ’n groep mense wat ek gedink het almal Jehovah se Getuies is”, sê Tyler, ’n jong man. “Maar na ’n ruk het party van hierdie mense ons geloof begin kritiseer. Dit was sommer gou duidelik dat hulle eintlik afvalliges is.” Hulle was persone wat opsetlik probeer het om die sedes te ondermyn van mense wat hulle gesê het hulle medegelowiges is.

God se Seun, Jesus Christus, het gewaarsku dat party wat hom gevolg het, teen hulle metgeselle sou draai (Matteus 24:48-51; Handelinge 20:29, 30). Die apostel Paulus het hierdie persone valse broers genoem en sê dat hulle “ingesluip het” om kwaad te doen aan diegene in die Christengemeente (Galasiërs 2:4). Die Bybelskrywer Judas sê dat hulle “ingeglip het” met die doel om “die onverdiende goedhartigheid van ons God in ’n verskoning vir losbandige gedrag [te] verander” (Judas 4). Hy beskryf hulle ook as “rotse wat onder die water verborge is”.—Judas 12.

Let op dat Paulus sowel as Judas die skelm metodes uitgewys het waarvan afvalliges dikwels gebruik maak. Hierdie Bybelskrywers het opgemerk dat die afvalliges “ingesluip het” of “ingeglip het” met die doel om diegene in die Christengemeente sedelik te verderf. Vandag gee kletskamers sulke verdorwe mense die volmaakte dekmantel vir hulle slinkse pogings. Net soos rotse wat onder die water lê, steek hierdie valse Christene hulle ware voornemens weg agter ’n geveinsde besorgdheid oor jong Getuies. Maar hulle doel is om persone wat nie versigtig is nie, se geloof te laat skipbreuk ly.—1 Timoteus 1:19, 20.

Hierdie tydskrif, sowel as ander materiaal wat deur Jehovah se Getuies uitgegee word, het al herhaaldelik teen hierdie einste gevaar gewaarsku.b Daarom is enigiemand wat jy in ’n kletskamer ontmoet wat oënskynlik vir Jehovah se Getuies geskep is, op sy beste iemand wat sulke raad verontagsaam. Wil jy regtig vriende hê wat verkies om Bybelse riglyne as onbelangrik te beskou?—Spreuke 3:5, 6; 15:5.

Die strik van afsondering

Iets anders waaroor jy gerus kan dink, is die hoeveelheid tyd wat kletskamers in beslag neem. José, wat aan die begin van hierdie artikel gemeld is, sê: “Ek het partykeer so betrokke geraak by kletskamerbesprekings dat ek etes gemis het.”

Dalk raak jy nie só verdiep in kletskamers soos José nie. Maar om tyd te hê om op die Internet te klets, moet jy tyd uit ’n ander bedrywigheid uitkoop. Die bedrywigheid wat heel waarskynlik dadelik daaronder sal ly, is dalk nie jou huiswerk of jou huishoudelike takies nie. Kommunikasie met jou gesin sal heel moontlik eerste in die slag bly. Adrian, wat in Spanje woon, sê: “Ná ete het ek die tafel dadelik verlaat en op die Internet gaan klets. Ek het so verslaaf geraak aan kletskamers dat ek amper heeltemal opgehou het om met my gesin te praat.”

As jy waardevolle tyd in kletskamers deurbring, sonder jy jou dalk ook af van die mense wat vir jou die meeste beteken. Die Bybel gee hierdie gepaste waarskuwing: “Wie hom afsonder, sal sy eie selfsugtige verlange soek; teen alle praktiese wysheid sal hy losbreek” (Spreuke 18:1). Dit is onwaarskynlik dat die vreemdelinge wat jy in kletskamers ontmoet, jou sal aanmoedig om te lewe volgens die praktiese wysheid wat in die Bybel gevind word. Daar is ’n groter kans dat hulle jou sal aanmoedig om selfsugtige belange eerste te stel en jou in die versoeking sal bring om van die sedelike standaarde vir Christene af te wyk.

Dit is moontlik so dat kletskamers vir jou aanloklik is omdat dit dalk vir jou makliker is om op die Internet te gesels as om met gesinslede te kommunikeer. Dit lyk dalk asof die persone met wie jy in kletskamers assosieer, gretig is om jou opinie oor sake te hoor, en miskien spreek hulle hulle gevoelens openlik uit. Aan die ander kant lyk dit dalk asof jou gesinslede te besig is om na jou bekommernisse te luister en vind hulle dit dalk moeilik om hulle gevoelens vryelik uit te spreek.

Maar vra jou af: ‘Weet die mense met wie ek op die Internet gesels, wie ek werklik is? Stel hulle werklik belang in my geluk op die lange duur?’ Daar is ’n baie beter kans dat jou gesinslede vir jou emosionele en geestelike gesondheid sal omgee. As jou ouers volgens Bybelstandaarde probeer lewe, stel hulle opreg daarin belang om met jou te kommunikeer (Efesiërs 6:4). As jy jou gedagtes en gevoelens op ’n respekvolle wyse teenoor hulle uitspreek, verras hulle jou dalk met ’n meer goedhartige antwoord as wat jy verwag.—Lukas 11:11-13.

Vermy die gevare

Dalk het jy ’n goeie rede om ’n kletskamer te besoek—byvoorbeeld as deel van ’n noodsaaklike skooltaak.c In daardie geval kan jy sorg dat kletskamers nie vir jou ’n strik word nie deur die volgende eenvoudige voorsorgmaatreëls te tref.

Eerstens, moenie ’n rekenaar wat aan die Internet gekoppel is, in die privaatheid van jou eie kamer gebruik nie. As jy dit doen, is dit soos om alleen in ’n donker straat van ’n vreemde stad te stap—jy soek moeilikheid. Hou die rekenaar eerder in ’n deel van die huis waar ander maklik kan sien hoe dit gebruik word.

Tweedens, moedig beter kommunikasie met jou ouers aan deur vir hulle te wys watter plekke jy op die Internet besoek en aan hulle te verduidelik waarom jy ’n sekere kletskamer moet besoek. Stel ook ’n beperking op hoe lank jy by die rekenaar gaan wees, en bly dan daarby.

Derdens, installeer rekenaarprogramme wat sal help om jou teen seksuele teistering te beskerm deurdat dit die inhoud van inkomende boodskappe filter. As jy wel seksuele versoeke ontvang terwyl jy op die Internet is, moet jy jou ouers of onderwyser dadelik daarvan vertel. In party lande is dit ’n misdaad as volwassenes wat weet dat jy ’n minderjarige is, jou nogtans deur middel van seksueel suggestiewe teksboodskappe of ander pornografiese materiaal probeer uitlok. Sulke mense moet aan die polisie gerapporteer word.

Jy moet ook nooit jou naam, jou adres, jou skool se naam of jou telefoonnommer aan iemand gee wat jy in ’n kletskamer ontmoet nie. En moet nooit ’n uitnodiging aanvaar om iemand persoonlik te ontmoet wat jy op die Internet teëgekom het nie!

Al het koning Salomo sy woorde duisende jare gelede geskryf, is dit gepas vir die gevare wat kletskamers inhou: “Skerpsinnig is die een wat die rampspoed gesien en hom verberg het, maar die onervarenes het verder gegaan en moet die straf ondergaan.”—Spreuke 22:3.

[Voetnote]

[Prent op bladsy 18]

Dit is verstandig om jou ouers te wys watter plekke jy op die Internet besoek