Drankmisbruik—’n Maatskaplike ramp

DIE inname van alkohol lei tot een van twee dinge: blydskap of droefheid. Matige drankgebruik kan volgens die Bybel die hart van die mens vrolik maak (Psalm 104:15). Tog waarsku die Bybel ook dat drankmisbruik skadelik of selfs dodelik kan wees, soos die byt van ’n giftige slang (Spreuke 23:31, 32). Kom ons kyk van naderby na die hoë tol wat drankmisbruik eis.

“’n Dronk bestuurder het Saterdag ’n 25-jarige ma en haar tweejarige seuntjie omgery. . . . Die jong vrou, wat ses maande swanger was, is Sondag oorlede. Haar seuntjie, wat kopbeserings opgedoen het, is in ’n kritieke toestand”, het die koerant Le Monde berig. Ongelukkig is sulke berigte allesbehalwe ongewoon. Dalk ken jy iemand wat in ’n alkoholverwante ongeluk was. Duisende mense gaan elke jaar dood of word beseer in padongelukke waarby alkohol betrokke is.

Dodetal

Wêreldwyd is die tol wat drankmisbruik in terme van menselewens eis, onberekenbaar. In Frankryk is drankmisbruik die derde grootste doodsoorsaak, na kanker en koronêre hartsiekte, en dit veroorsaak elke jaar direk of indirek die dood van 50 000 mense. Volgens ’n verslag wat deur die Franse Departement van Gesondheid aangevra is, is dit “die ekwivalent van twee tot drie makrostraler-rampe elke week”.

Veral baie jongmense sterf as gevolg van alkohol. Volgens ’n verslag wat in 2001 deur die Wêreldgesondheidsorganisasie gepubliseer is, is alkohol die vernaamste doodsoorsaak onder Europese mans tussen die ouderdomme van 15 en 29. Daar word voorspel dat 1 uit elke 3 jong mans in sekere Oos-Europese lande kort voor lank weens drankmisbruik sal sterf.

Geweld en seksuele aanranding

Alkohol dra by tot gewelddade. Drank kan daartoe lei dat ’n mens inhibisies en sosiale perke oorboord gooi en dat jy ander se optrede verkeerd verstaan, sodat ’n gewelddadige reaksie meer waarskynlik is.

Alkohol is ’n groot faktor in gesinsgeweld en seksuele aanranding. ’n Franse studie van gevangenes dui daarop dat alkohol moontlik betrokke was by twee derdes van verkragtings en onsedelike aanrandings. Volgens die tydskrif Polityka toon opnames dat 75 persent van alkoholiste se vroue in Pole aan geweld onderwerp is. Die samestellers van een studie het geskat dat “alkoholgebruik geassosieer word met ’n byna tweevoudige toename in die risiko van moord onder alle ouderdomsgroepe en dat [selfs] niedrinkers wat in dieselfde huis as ’n drinker woon, ’n groter risiko loop om vermoor te word”.—Amerikaanse Mediese Vereniging, Raad vir Wetenskaplike Sake.

Maatskaplike koste

Wanneer die koste van gesondheidsorg en versekering sowel as verlore produktiwiteit weens ongelukke, siekte of ontydige dood bereken word, is die finansiële koste vir die samelewing ontsaglik. Drankmisbruik kos Ierland se viermiljoen bewoners na bewering ten minste sesmiljard rand per jaar. ’n Bron wat in The Irish Times aangehaal is, het gesê dat hierdie bedrag gelyk is aan “die prys van ’n nuwe hospitaal, ’n sportstadion en ’n straler vir elke minister”. In 1998 het die Mainichi Daily News berig dat die ekonomiese impak van strawwe drinkery in Japan “meer as 6 biljoen jen [3,5 miljard rand] per jaar” beloop. ’n Verslag aan die Amerikaanse Kongres het gesê: “Die geskatte ekonomiese koste van drankmisbruik was $184,6 miljard [R1,1 biljoen] vir 1998 alleen, of ongeveer $638 [R3 993] vir elke man, vrou en kind wat daardie jaar in die Verenigde State gewoon het.” En wat van die sielkundige koste weens gesinne wat verbrokkel of ’n geliefde aan die dood afstaan, sowel as die koste van belemmerde opvoeding of verwoeste loopbane?

Dit is nie moeilik om te sien watter uitwerking drankmisbruik op die samelewing het nie. Stel jou drinkgewoontes jou gesondheid en dié van ander in gevaar? Hierdie vraag sal in die volgende artikel bespreek word.