Drankmisbruik—Hoe om die kettings te verbreek

“My pa was ’n alkoholis, en ek het in sy voetstappe gevolg. Toe ek 12 was, het ek reeds gedrink. Teen die tyd dat ek getrou het, het ek elke dag dronk geword. Ek het gewelddadig geraak; dikwels moes die polisie my gesin te hulp kom. My gesondheid het agteruitgegaan. Alkohol het maagbloeding veroorsaak, wat ek skaars oorleef het. Toe het ek sirrose en bloedarmoede ontwikkel. Ek het tevergeefs by selfhelpgroepe aangesluit in ’n poging om op te hou. Dit het gevoel asof ek in ’n web vasgevang is en nie kon losbreek nie.”—VÍCTOR,a ARGENTINIË.

KEER op keer word sulke ondervindinge vertel deur mense wat in die strik van drankmisbruik getrap het. Soos Víctor, voel hulle vasgevang met geen uitkomkans nie. Kan alkoholverwante probleme oorkom of selfs vermy word? Indien wel, hoe?

Erken die probleem

Eerstens is dit noodsaaklik dat die persoon wat alkohol drink en diegene wat na aan hom of haar is, erken dat daar ’n probleem bestaan. Afhanklikheid is net die puntjie van die ysberg. Dit het oor ’n lang tydperk ontwikkel en het voortgespruit uit ’n drinkpatroon wat dalk vroeër matig was. Verbasend genoeg, die meeste alkoholverwante ongelukke, geweld en maatskaplike probleme word nie veroorsaak deur mense wat kompulsiewe drinkers is nie. Let op wat die Wêreldgesondheidsorganisasie (WGO) sê: “Die beste manier om al die alkoholverwante probleme in ’n gemeenskap te verminder, is om daarop te fokus om matige eerder as strawwe drinkers te kry om minder te drink.” (Ons kursiveer.) Drink jy meer as wat gesondheidsowerhede aanbeveel? Drink jy in situasies wat jou volle aandag en vinnige reflekse vereis? Veroorsaak jou drinkgewoontes probleme in jou gesin of by die werk? As jy erken dat jou vlak van alkoholinname moontlik gevaarlik is en dit dan dienooreenkomstig verminder, is dit inderdaad “die beste manier” om ernstige probleme in die toekoms te vermy. Wanneer ’n mens eers afhanklik is, is dit baie moeiliker om veranderinge te maak.

’n Algemene reaksie onder diegene wat drank misbruik, is ontkenning. “Ek drink nie meer as enigiemand anders nie” of “Ek kan enige tyd ophou”, beweer hulle. “Al het alkohol amper my dood beteken, het ek myself nooit as ’n verslaafde beskou nie, en ek het dus nooit stappe gedoen om op te hou nie”, sê Konstantin, van Rusland. “Ek het baie keer met die gewoonte probeer breek”, sê Marek, van Pole, “maar ek het nie werklik aan myself erken dat ek ’n alkoholis is nie. Ek het alkoholverwante probleme gekleineer.”

Hoe kan iemand gehelp word om te besef dat hy ’n drankprobleem het en dan tot positiewe optrede oor te gaan? Eerstens moet hy erken dat sy probleme uit die misbruik van alkohol voortspruit en dat onthouding sy lewensgehalte sal verbeter. Volgens La Revue du Praticien—Médecine Générale moet sy beskouing verander van: “Ek drink omdat my vrou my verlaat het en ek my werk verloor het” na “My vrou het my verlaat en ek het my werk verloor omdat ek drink.”

As jy iemand wat van alkohol afhanklik is, wil help om hierdie verandering in sy denke te maak, sal jy dalk hierdie wenke wil gebruik: Luister aandagtig, vra direkte vrae wat die persoon toelaat om sy emosies en gevoelens vryelik uit te spreek, toon ’n empatieke gesindheid wat hom sal help om te voel dat hy verstaan word, prys hom vir selfs net ’n bietjie vordering, moenie veroordelend wees nie en vermy ’n gesindheid wat hom dalk sal verhinder om openlik te kommunikeer en hulp te soek. Dit sal dalk ook nuttig wees om hom twee lyste te laat maak wat gebaseer is op die vrae: Wat sal gebeur as ek aanhou drink? en Wat sal gebeur as ek ophou?

Soek hulp

Wanneer iemand alkohol begin misbruik, beteken dit nie dat hy niks werd is of dat daar geen hoop vir hom is nie. Party kry dit selfs reg om op hulle eie los te breek. Maar diegene wat van alkohol afhanklik is, het moontlik professionele hulp nodig om van alkohol af weg te bly.b Vir party werk behandeling as ’n buitepasiënt, maar wanneer onttrekkingsimptome erg is, is hospitalisasie dalk nodig. Wanneer die aanvanklike fisiese onttrekkingsimptome eers verby is—ná twee tot vyf dae—kan medisyne voorgeskryf word wat die lus vir alkohol laat afneem en onthouding bevorder.

Detoksifikasieprogramme waarborg egter nie sukses nie. Medisyne is slegs ’n tydelike hulpmiddel, nie ’n geneesmiddel nie. Alain, van Frankryk, het etlike detoksifikasiebehandelings ondergaan. “Onmiddellik nadat ek uit die hospitaal gekom het, het ek weer begin drink, want ek het met dieselfde drinkmaats omgegaan. Ek het eenvoudig nie die regte motivering gehad om op te hou nie”, sê hy.

Vul die leemte

In werklikheid misluk baie mense omdat die afwesigheid van alkohol ’n leemte laat, amper soos om die geselskap van ’n hegte vriend te verloor. “Ek het gedurig aan drank gedink”, sê Vasilii, van Rusland. “’n Dag sonder ’n drankie was sinloos.” Vir iemand wat van alkohol afhanklik is, is niks so belangrik soos om sy begeerte na drank te bevredig nie. “My enigste doel in die lewe was om te drink en om geld in die hande te kry om te drink”, sê Jerzy, van Pole. Klaarblyklik is dit noodsaaklik vir die herstellende alkoholis om ’n nuwe doel in die lewe te vind as hy van alkohol af wil wegbly.

’n Handleiding wat deur die WGO gepubliseer is en raad bevat vir diegene wat hulle drinkgewoontes probeer verander, beklemtoon die belangrikheid van doelgerigte bedrywighede om ’n terugslag te voorkom. Een voorbeeld wat gemeld is, is deelname aan godsdiensbedrywighede.

As iemand hom besig hou met geestelike bedrywighede, kan dit hom help om uit alkohol se greep los te breek. Nadat Alain byvoorbeeld drie keer in die tronk beland het weens alkoholverwante redes, het hy die Bybel saam met Jehovah se Getuies begin studeer. Hy sê: “Die studie van die Bybel het vir my ’n doel in die lewe gegee en het my in staat gestel om deur te druk. My motivering was nie net om op te hou drink nie, maar ook om Jehovah te behaag.”

Hoe om ’n terugslag te hanteer

Raadgewers oor drankmisbruik wys op die belangrikheid van ondersteuning en aanmoediging vir die herstellende alkoholis. Baie mense het familielede en vriende verloor weens hulle ellendige toestand. Die afsondering wat dit tot gevolg het, kan tot depressie en selfs tot selfmoord lei. Die handleiding wat hierbo genoem is, gee die volgende raad aan diegene wat iemand met ’n drankprobleem help: “Probeer om die persoon wat jy help, nie te kritiseer nie, selfs wanneer sy of haar gedrag jou irriteer en frustreer. Onthou dat dit nooit maklik is om gewoontes te verander nie. Daar gaan goeie sowel as slegte weke wees. Jou aanmoediging, ondersteuning van laerisiko-drinkery of onthouding en kreatiewe idees is nodig.”

“Wat my gehelp het”, sê Hilario, wat amper 30 jaar lank gedrink het, “was die liefde en besorgdheid van my vriende in die plaaslike gemeente van Jehovah se Getuies. Ek het baie terugslae gehad, maar hulle was altyd daar om my aan te moedig en tydige Bybelraad te gee.”

As jy sukkel om los te breek van alkohol, moet jy onthou dat jy waarskynlik terugslae gaan hê en dat jy dit as deel van die herstelproses moet beskou. Moenie tou opgooi nie! Ontleed wat tot die terugslag gelei het, en gebruik daardie kennis om dit in die toekoms te verhoed. Identifiseer spesifieke situasies wat die begeerte by jou wek om te drink. Is dit dalk verveeldheid, depressie, eensaamheid, argumente, stres of geleenthede of plekke waar ander drink? Vermy dit dan! “Ek het geleer om die emosies wat tot drinkery kan lei, te verstaan en te identifiseer”, sê Jerzy, wat twee jaar geneem het voordat hy heeltemal opgehou het om alkohol te drink. “Nou vermy ek sulke situasies. Ek bly weg van plekke waar mense alkohol drink. Ek eet niks met alkohol in nie, en ek vermy selfs liggaamsorgprodukte of medisyne wat alkohol bevat. Ek kyk ook nie na enige drankadvertensies nie.” Baie het gevind dat gebed tot God vir “krag wat bo die normale is”, onontbeerlik is om die begeerte om te drink, onder beheer te bring.—2 Korintiërs 4:7; Filippense 4:6, 7.

Vryheid!

Hoewel dit ’n voortgesette uitdaging kan wees, is dit moontlik om die kettings van alkoholafhanklikheid te verbreek. Almal wat in hierdie artikel genoem is, was suksesvol. Hulle is gesonder en geniet die voordele op gesins- en professionele vlak. Alain sê: “Ek het nou die vryheid om nie te drink nie.” Konstantin sê: “Omdat ek Jehovah leer ken het, is my gesin nog bymekaar. Ek het nou ’n doel in die lewe. My geluk hang nie van alkohol af nie.” Víctor sê: “Ek voel vry. Ek het my waardigheid en my identiteit teruggekry.”

’n Persoon kan veranderinge maak, hetsy hy die gevaar loop van ’n alkoholverwante ongeluk, probleme ondervind weens drankmisbruik of van alkohol afhanklik is. As jou drinkery jou welsyn in gevaar stel, moet jy nie huiwer om die nodige veranderinge te maak nie. Dit kan tot jou voordeel wees, sowel as tot voordeel van dié wat jou liefhet.

[Voetnote]

[Prent op bladsy 10]

Die eerste stap is om die probleem te erken

[Prent op bladsy 11]

Baie het professionele hulp nodig om los te breek

[Prent op bladsy 12]

Gebed kan help

[Prent op bladsy 12]

Jy kan die krag vind om van alkohol af weg te bly!