Jongmense vra . . .

Moet ons ’n formele troue hê?

“Dit was my verloofde, Cindy, wat die eerste keer gepraat het van die moontlikheid om net weg te glip en iewers tydens ’n privaat seremonie te trou, sonder om al ons vriende en familie daarvan te vertel. Nadat ons dit bespreek het, het ons albei gevoel dat hierdie opsie minder tyd en energie sou verg en minder stresvol sou wees.”—Allen.a

AS JY oud genoeg is om te trou en in ’n romantiese verhouding is met iemand, klink die opsie om net stilletjies weg te glip om te gaan trou dalk aantreklik. In sekere omstandighede kom ’n paartjie dalk in die versoeking om net weg te loop en te trou sonder om eers vir hulle ouers te sê. Watter beginsels kan jou help besluit wat jy moet doen?

Is tradisie die belangrikste oorweging?

Hoewel die huwelik in die meeste kulture gebruiklik is, is daar groot verskille in die gebruike wat met die huwelikseremonie gepaardgaan. Vir ’n Christenpaartjie is die belangrikste oorweging nie of hulle troue aan al die vereistes van plaaslike gebruike sal voldoen nie (Romeine 12:2). Hulle grootste begeerte is eerder dat hulle hofmakery en troue sal plaasvind op ’n manier wat Jehovah God tot eer sal strek.—1 Korintiërs 10:31.

Aangesien die huwelik ’n eerbare reëling is, is dit nie iets wat die meeste paartjies sal wil geheim hou nie. In baie Westerse lande reël paartjies onder Jehovah se Getuies om tydens ’n seremonie by hulle plaaslike Koninkryksaal te trou.b Daarna hou hulle moontlik ’n onthaal waartydens hulle ’n ete en dalk ’n bietjie vermaak saam met familie en vriende geniet. Dit hoef nie ’n uitspattige geleentheid te wees nie. ’n Mens moet egter erken dat dit stresvol is om ’n troue en ’n onthaal te reël en dat dit baie duur kan wees. Byvoorbeeld, in die Verenigde State kos huweliksonthale dikwels duisende dollars.

In ’n poging om stres en onkoste tot ’n minimum te beperk, het party paartjies op ’n eenvoudiger opsie besluit. “Ons het vir ons ouers gesê dat ons nie ’n tradisionele troue gaan hê nie”, sê Cindy, “want ons wou hê dat die geleentheid eenvoudig moes wees en nie te veel moes kos nie. My ouers het ons verseker dat hulle ons situasie verstaan en kon sien waarom ons oor sekere dinge besorg was. Hulle het ons goed ondersteun.” Maar toe Cindy se verloofde, Allen, wat vroeër genoem is, vir sy ouers van hulle trouplanne vertel het, het hulle dit moeilik gevind om die besluit te verstaan. “Hulle het gedink dat dit hulle skuld was”, sê Allen, “dat ons die besluit geneem het oor iets wat hulle gedoen het. Maar dit was beslis nie so nie.”

Jou ouers sal miskien ook teleurgesteld wees as jy besluit om ’n baie eenvoudige troue te hê omdat hulle dalk wil hê dat soveel mense as moontlik in die vreugde van hierdie spesiale dag moet deel. Maar sê nou jy dink daaraan om te trou sonder om eers vir jou ouers te sê omdat jy weet dat jou familie gekant sal wees teen die blote gedagte dat jy trou?

Neem jou familie se gevoelens in ag

Miskien sal jou ouers beswaar maak omdat hulle dink dat jy te jonk is om so ’n belangrike besluit te neem. Hulle is dalk bang dat jou smaak sal verander namate jy meer volwasse word en dat jy gou spyt sal wees oor jou keuse van ’n huweliksmaat. Aan die ander kant dink hulle miskien dat jy oud genoeg is om te trou, maar hulle sien dinge in jou vriend of vriendin se persoonlikheid wat na hulle mening tekortkominge is. Of hulle verbied jou dalk selfs om te trou omdat jou gekose maat nie aan dieselfde geloof as jy behoort nie.

As jou ouers ware Christene is, het hulle heel moontlik Bybelse redes vir hulle besorgdheid. Dit is niks minder as reg dat hulle enige bedenkinge wat hulle het, uitspreek nie. Om die waarheid te sê, Jehovah sou hulle as nalatig en liefdeloos beskou as hulle dit nie doen nie. En dit is in jou belang om te hoor wat hulle beskouing is.—Spreuke 13:1, 24.

Ter toeligting: As jy ’n kledingstuk koop, vra jy moontlik iemand anders of dit jou pas of nie. Jy stem dalk nie altyd met hulle opinie saam nie, maar jy sou nogtans verwag dat goeie vriende vir jou sal sê as hulle dink dat die kledingstuk nie die regte grootte of styl vir jou is nie. Jy waardeer hulle kommentare, aangesien dit kan keer dat jy geld mors. Hoeveel te meer behoort jy dit dan te waardeer om jou familie se opinie oor jou keuse van ’n huweliksmaat te hoor. Jy kan miskien ’n kledingstuk omruil of weggee, maar Jehovah verwag van jou om jou huweliksmaat vir die res van jou lewe te hou (Matteus 19:5, 6). As jy ’n huweliksmaat kies wat nie regtig jou persoonlikheid en geestelikheid aanvul nie, sal die verhouding baie ongemakliker wees as om net ’n kledingstuk te dra wat jou nie goed pas nie (Genesis 2:18; Spreuke 21:9). En as gevolg daarvan verspeel jy moontlik ’n kans om ware geluk te vind.—Spreuke 5:18; 18:22.

Daar is weliswaar party ouers wat moontlik om selfsugtige redes teen ’n huwelik beswaar sal maak—om byvoorbeeld beheer oor hulle kind te behou. Maar voor jy jou ouers se bekommernisse as selfsugtig afmaak en wegglip om te gaan trou, kan jy gerus hulle besware ontleed.

Redes om versigtig te wees

Dit is ’n feit dat jou smaak sal verander namate jy meer volwasse word. “Toe ek ’n klein kindjie was”, skryf die apostel Paulus, “het ek soos ’n klein kindjie gepraat, soos ’n klein kindjie gedink, soos ’n klein kindjie geredeneer; maar noudat ek ’n man geword het, het ek die eienskappe van ’n klein kindjie afgelê” (1 Korintiërs 13:11). Net so kan die eienskappe van iemand wat vir jou as ’n tiener aantreklik is, waarskynlik heeltemal verskil van dié wat vir jou aantreklik sal wees wanneer jy ouer is. Daarom beveel die Bybel aan dat jy wag totdat jy “verby die bloei van die jeug” is—verby die jare wanneer jou seksuele begeerte op sy sterkste is—voordat jy die ernstige stap doen om ’n huweliksmaat te kies.—1 Korintiërs 7:36.

Sê nou jou ouers vind fout met jou vriend of vriendin? As gevolg van jou ouers se ondervinding in die lewe is hulle waarnemingsvermoëns moontlik meer geoefen om tussen reg en verkeerd te onderskei (Hebreërs 5:14). Daarom sien hulle dalk ernstige tekortkominge in jou voorgenome maat se persoonlikheid, al kan jy dit nie sien nie. Dink aan die beginsel wat die wyse man Salomo genoem het: “Wie die eerste in sy regsaak is, is regverdig; sy naaste kom in en deurvors hom beslis” (Spreuke 18:17). Jou vriend of vriendin het jou moontlik ook oortuig dat hy of sy die regte persoon vir jou is. Maar nadat jou ouers hom of haar “deurvors”, of ondersoek, het, vestig hulle dalk jou aandag op sekere feite wat jy gerus kan oorweeg.

Byvoorbeeld, hulle sal jou dalk ferm daaraan herinner dat die Bybel sê dat ware Christene “net in die Here” mag trou (1 Korintiërs 7:39). Jy antwoord dalk daarop dat jy van ander weet wat met iemand getrou het wat nie dieselfde Christelike oortuigings as hulle gehad het nie, maar dat hulle Jehovah nou albei gelukkig dien. Toegegee, dit gebeur soms. Maar sulke gevalle is verreweg in die minderheid. As jy met iemand trou wat nie aan dieselfde geloof as jy behoort nie, ignoreer jy nie alleen Jehovah se standaarde nie, maar jy stel jou ook aan ernstige geestelike gevaar bloot.—2 Korintiërs 6:14.c

’n Onverstandige rede om te trou

Party jongmense het weggeloop en gaan trou omdat hulle hulle aan onsedelike gedrag skuldig gemaak het en dan gevoel het dat dit hulle gewete sou stil as hulle met hulle vriend of vriendin trou. Of hulle het dalk gehoop om die gevolge van hulle sonde, soos ’n onverwagte swangerskap, weg te steek.

As jy trou om ’n sonde weg te steek, is jy waarskynlik besig om een fout te vererger deur nog een te maak. “Hy wat sy oortredings bedek, sal nie sukses behaal nie”, het Salomo gewaarsku, “maar hy wat dit bely en laat staan, sal barmhartigheid bewys word” (Spreuke 28:13). Salomo se pa en ma, Dawid en Batseba, het geleer hoe onverstandig dit is om hulle onsedelike gedrag te probeer wegsteek (2 Samuel 11:2–12:25). Moenie jou sonde probeer wegsteek nie, praat eerder met jou ouers en met die gemeentelike ouer manne. Dit sal moed van jou verg, maar jy kan seker wees dat Jehovah jou sal vergewe as jy berou het (Jesaja 1:18). Wanneer jy weer ’n skoon gewete gekry het, sal jy in ’n beter posisie wees om ’n gebalanseerde besluit oor die huwelik te neem.

Vermy spyt

Wanneer Allen aan sy troue terugdink, sê hy: “Omdat ons besluit het om ’n eenvoudige troue te hê, was die geleentheid redelik vry van stres. Al waaroor ek jammer is, is dat ek nie my familie gehelp het om die redes vir ons besluit beter te verstaan nie.”

Dit is eenvoudig ’n persoonlike besluit of ’n volwasse paartjie ’n tradisionele troue wil hê of nie. Maar wanneer jy enige besluite oor die troue neem, moenie haastig wees nie, kommunikeer met jou familie en ‘gee ag op jou voetstappe’. Jy sal enige rede om spyt te wees, verminder.—Spreuke 14:15.

[Voetnote]

[Prent op bladsy 23]

Kommunikeer met jou familie wanneer jy enige besluite oor die troue neem