Die Bybel se beskouing

Waarom moet jy jou tot die Bybel wend vir leiding?

“Die hele Skrif is deur God geïnspireer en is nuttig om te onderrig, om tereg te wys, om dinge reg te stel.”—2 Timoteus 3:16.

WAAR soek jy na leiding in jou lewe? Vandag is daar ’n oorvloed van raad oor feitlik enige onderwerp beskikbaar. Tog wend baie mense hulle tot die eeue oue woorde in die Bybel vir leiding.

Maar veral in hierdie eeu van inligting en moderne tegnologie heg die meeste mense nie baie waarde aan die Bybel nie. Party hoogaangeskrewe opvoedkundiges en wetenskaplikes is van mening dat die Bybel nie meer relevant is nie. Is hulle reg? Aangesien daar vandag soveel bronne van leiding algemeen beskikbaar is, waarom moet enigiemand hom tot die Bybel wend?

’n Boek van waarheid

By een geleentheid het Jesus Christus by ’n fontein gerus en met ’n Samaritaanse vrou gepraat. Hy het vir haar gesê: “God is ’n Gees, en dié wat hom aanbid, moet met gees en waarheid aanbid” (Johannes 4:24). Hierdie woorde wys daarop dat daar ’n vorm van aanbidding is wat vir God aanneemlik is. Ons aanbidding kan net met waarheid beoefen word as dit ooreenstem met wat God in die Bybel oor homself geopenbaar het. God se Woord bevat die waarheid.—Johannes 17:17.

Daar is egter baie godsdienste wat sê dat hulle in die Bybel glo, en elkeen leer blykbaar iets anders. Gevolglik is daar baie verwarring oor wat die Bybel werklik leer. Is Jesus God, of is hy die Seun van God? Is daar lewe ná die dood of nie? Is die hel ’n werklike plek waar mense gepynig word nadat hulle gesterf het? Is Satan ’n werklike persoon? Wat beteken dit om ’n Christen te wees? Stel God werklik belang in wat ons doen en dink? Regverdig ware liefde voorhuwelikse seks? Is dit verkeerd om alkoholiese drank te drink?a Verskeie godsdienste sê dat hulle die waarheid omtrent hierdie dinge leer. Maar hulle godsdiensleringe is dikwels in stryd met mekaar. Hulle kan nie almal die waarheid wees nie.—Matteus 7:21-23.

Hoe kan jy dan uitvind wat die waarheid is omtrent God, asook die vorm van aanbidding wat vir hom aanneemlik is? Gestel jy vind uit dat jy ’n operasie moet ondergaan omdat jy ’n ernstige mediese probleem het. Wat sal jy doen? Jy sal, indien moontlik, deeglik soek na die beste chirurg wat vir hierdie soort operasie beskikbaar is. Jy sal sy kwalifikasies en ondervinding in ag neem, hom kontak en met hom gesels. Uiteindelik, nadat jy op grond van die feite oortuig is dat hy die beste is, sal jy jou vertroue in hom stel en hom toelaat om op jou te opereer. Ander se mening verskil dalk. Maar jy stel nou jou vaste vertroue in hierdie chirurg.

Op dieselfde manier kan jy geloof, of vertroue, in God en die Bybel opbou as jy die beskikbare bewyse eerlik en deeglik ondersoek (Spreuke 2:1-4). Wanneer jy antwoorde soek op vrae oor die soort aanbidding wat vir God aanneemlik is, het jy ’n keuse. Jy kan jou tot die teenstrydige leringe en menings van mense wend of jy kan ag gee op die Bybel se beskouing.

Akkuraat en prakties

’n Noukeurige ondersoek van die Bybel sal oorgenoeg bewys lewer dat ‘die hele Skrif deur God geïnspireer en nuttig is’ (2 Timoteus 3:16, 17).b Die Bybel is byvoorbeeld vol gedetailleerde profesieë. Hulle vervulling is in die geskiedenis opgeteken (Jesaja 13:19, 20; Daniël 8:3-8, 20-22; Miga 5:2). Hoewel die Bybel nie ’n wetenskaphandboek is nie, is dit wetenskaplik akkuraat. Dit bevat feite oor die natuur en gesondheid wat opgeteken is duisende jare voordat wetenskaplikes soortgelyke gevolgtrekkings kon maak.—Levitikus 11:27, 28, 32, 33; Jesaja 40:22.

Wat meer is, die Bybel help ons om wyse besluite te neem. Dit bevat ’n oorvloed van praktiese raad oor die gesinslewe, fisiese en emosionele gesondheid sowel as sake- en ander alledaagse aangeleenthede. Spreuke 2:6, 7 sê: “Jehovah gee wysheid; uit sy mond kom kennis en onderskeidingsvermoë. En vir die regskapenes sal hy praktiese wysheid as ’n skat bewaar.” As jy jou tot die Bybel wend vir leiding, kan jy jou waarnemingsvermoëns oefen “om te onderskei wat reg sowel as verkeerd is”.—Hebreërs 5:14.

God se Woord help ons om te verstaan wat die doel van die lewe is (Johannes 17:3; Handelinge 17:26, 27). Dit verduidelik wat die betekenis van wêreldtoestande is (Matteus 24:3, 7, 8, 14; 2 Timoteus 3:1-5). Daarin sê God vir ons hoe hy boosheid van die aarde af gaan verwyder en die mensdom in staat gaan stel om volmaakte gesondheid en die ewige lewe te geniet.—Jesaja 33:24; Daniël 2:44; Openbaring 21:3, 4.

Miljoene het al persoonlik ondervind dat die Bybel werklik ’n betroubare en geloofwaardige bron van praktiese wysheid is. Die uitgewers van Ontwaak! nooi jou uit om die reeks artikels met die titel “Die Bybel se beskouing”, wat in elke nommer van hierdie tydskrif verskyn, te ondersoek. Deur dit te doen, sal jy moontlik bykomende bewyse vind wat toon dat die Bybel die beste bron van leiding vir jou lewe is.

[Voetnote]

HET JY AL OOIT GEWONDER?

◼ Watter vorm van aanbidding is vir God aanneemlik?—Johannes 4:24.

◼ Wat moet jy doen om by die wysheid van God baat te vind?—Spreuke 2:1-4.

◼ In watter opsig is die Bybel ’n bron van praktiese leiding?—Hebreërs 5:14.