Soek God se leiding in alles
“Hierdie God is ons God tot onbepaalde tyd, ja, vir ewig. Hy sal ons lei totdat ons sterf.”—PS. 48:14.
1, 2. Waarom moet ons eerder Jehovah se leiding volg as om op ons eie wysheid te vertrou, en watter vrae ontstaan?
WANNEER dit kom by waardelose of skadelike dinge, is dit maklik om onsself te bedrieg (Spr. 12:11). As ons werklik iets wil doen wat vir ’n Christen onvanpas is, sal ons hart dikwels vorendag kom met oortuigende redes om dit te doen (Jer. 17:5, 9). Die psalmis het dus wysheid aan die dag gelê toe hy tot Jehovah gebid het: “Stuur u lig en u waarheid uit. Laat dié my lei” (Ps. 43:3). Hy het op Jehovah vertrou, nie op sy eie beperkte wysheid nie, en hy kon nie op ’n beter bron van leiding staatgemaak het nie. Dit sal verstandig van ons wees om, soos die psalmis, op God staat te maak vir leiding.
2 Maar waarom moet ons Jehovah se leiding bo enige ander leiding vertrou? Wanneer moet ons dit soek? Watter gesindhede moet ons aankweek om daarby baat te vind, en hoe lei Jehovah ons vandag? Dié belangrike vrae sal in hierdie artikel bespreek word.
Waarom moet ons Jehovah se leiding vertrou?
3-5. Waarom kan ons volle vertroue in Jehovah se leiding hê?
3 Jehovah is ons hemelse Vader (1 Kor. 8:6). Hy ken elkeen van ons deur en deur en kan selfs ons hart lees (1 Sam. 16:7; Spr. 21:2). Koning Dawid het vir God gesê: “U het my sit en my opstaan te wete gekom. U het van ver af op my gedagte gelet. Want daar is nog geen woord op my tong nie, maar kyk! o Jehovah, u weet dit reeds alles” (Ps. 139:2, 4). As Jehovah ons so goed ken, hoe kan ons dan twyfel dat hy weet wat die beste vir ons is? Boonop is Jehovah alwys. Hy sien alles, kyk dieper as enige mens en weet van die begin af wat die uiteinde van dinge sal wees (Jes. 46:9-11; Rom. 11:33). Hy is “God, alleen wys”.—Rom. 16:27.
4 Daarbenewens het Jehovah ons lief en wil hy altyd die beste vir ons hê (Joh. 3:16; 1 Joh. 4:8). As ’n liefdevolle God is hy vrygewig teenoor ons. Die dissipel Jakobus het geskryf: “Elke goeie gawe en elke volmaakte geskenk kom van bo, want dit daal neer van die Vader van die hemelse ligte” (Jak. 1:17). Diegene wat hulle deur God laat lei, vind grootliks baat by sy vrygewigheid.
5 Laastens, Jehovah is almagtig. Die psalmis het in verband hiermee gesê: “Elkeen wat in die skuilplek van die Allerhoogste woon, sal vir hom verblyf kry in die skaduwee van die Almagtige. Ek sal vir Jehovah sê: ‘U is my toevlug en my vesting, my God, op wie ek sal vertrou’” (Ps. 91:1, 2). Wanneer ons Jehovah se leiding volg, soek ons toevlug by die God wat nie kan faal nie. Selfs al kom ons voor teenstand te staan, onderskraag Jehovah ons. Hy sal ons nie in die steek laat nie. (Ps. 71:4, 5; lees Spreuke 3:19-26.) Ja, Jehovah weet wat die beste vir ons is, wil die beste vir ons hê en het die krag om die beste vir ons te gee. Hoe dwaas sal dit tog van ons wees om sy leiding te ignoreer! Maar wanneer het ons hierdie leiding nodig?
Wanneer het ons leiding nodig?
6, 7. Wanneer het ons Jehovah se leiding nodig?
6 Ons het in werklikheid God se leiding dwarsdeur ons lewe nodig, vandat ons jonk is totdat ons oud is. Die psalmis het gesê: “Hierdie God is ons God tot onbepaalde tyd, ja, vir ewig. Hy sal ons lei totdat ons sterf” (Ps. 48:14). Soos die psalmis, hou wyse Christene nooit op om op God staat te maak vir leiding nie.
7 Daar is natuurlik tye wanneer ons hulp dringend nodig het. Ons bevind ons soms in “groot nood”, miskien as gevolg van vervolging, ’n ernstige siekte of skielike werkloosheid (Ps. 69:16, 17). Gedurende sulke tye is dit vertroostend om ons tot Jehovah te wend, in die vertroue dat hy ons sal versterk om te volhard en ons sal lei om goeie besluite te neem. (Lees Psalm 102:17.) Maar ons het ook by ander geleenthede sy hulp nodig. Byvoorbeeld, wanneer ons met ons bure oor die goeie nuus van die Koninkryk gaan praat, het ons Jehovah se leiding nodig sodat ons getuieniswerk doeltreffend sal wees. En wanneer ons ’n besluit moet neem—hetsy oor ontspanning, kleredrag en persoonsversorging, vriende, sekulêre werk, geleerdheid of enigiets anders—tree ons slegs verstandig op as ons Jehovah se riglyne volg. Daar is in werklikheid geen einde aan die situasies waarin ons leiding nodig het nie.
Die gevare wanneer God se leiding nie gesoek word nie
8. Wat het die feit dat Eva die verbode vrug geëet het, geïmpliseer?
8 Onthou egter dat ons bereid moet wees om Jehovah se leiding te volg. God sal ons nie dwing om dit te doen as ons nie wil nie. Die eerste mens wat gekies het om nie Jehovah se leiding te volg nie, was Eva, en haar voorbeeld toon hoe ernstig so ’n slegte besluit kan wees. Dink ook aan wat dit geïmpliseer het. Eva het van die verbode vrug geëet omdat sy “soos God [wou wees] deur goed en kwaad te ken” (Gen. 3:5). Sodoende het sy haar in God se plek gestel en self besluit oor wat goed en kwaad is in plaas van Jehovah se riglyne te volg. Sy het dus Jehovah se soewereiniteit die rug toegekeer. Sy wou haar eie baas wees. Haar man, Adam, het dieselfde opstandige weg gevolg.—Rom. 5:12.
9. Wat doen ons in werklikheid as ons Jehovah se leiding verwerp, en waarom is dit baie onverstandig?
9 As ons vandag nie Jehovah se leiding volg nie, erken ons eweneens nie sy soewereiniteit nie. Dink byvoorbeeld aan iemand wat in die gewoonte verval om na pornografie te kyk. As hy met die Christengemeente omgaan, weet hy wat Jehovah se riglyne hieroor is. Onrein dinge moenie eens genoem word nie, wat nog te sê na gekyk word met wellustige genot (Ef. 5:3). Deur Jehovah se riglyne te verwerp, verloën so iemand Jehovah se soewereiniteit en verwerp hy Sy hoofskap (1 Kor. 11:3). Dit is baie onverstandig, want, soos Jeremia gesê het, “dit behoort nie aan die mens wat loop om sy voetstappe te rig nie”.—Jer. 10:23.
10. Waarom moet ons ons wilsvryheid op ’n verantwoordelike wyse gebruik?
10 Party trek dalk Jeremia se woorde in twyfel, want hulle meen dat Jehovah ons nouliks kan kritiseer omdat ons ons wilsvryheid gebruik, aangesien hy dit aan ons gegee het. Maar moenie vergeet dat wilsvryheid ’n verantwoordelikheid sowel as ’n gawe is nie. Ons is aanspreeklik vir die dinge wat ons besluit om te sê en te doen (Rom. 14:10). Jesus het gesê: “Uit die oorvloed van die hart spreek die mond.” Hy het ook gesê: “Uit die hart kom daar . . . goddelose redenasies, moorde, egbreuk, hoererye, diefstalle, valse getuienisse, lasteringe” (Matt. 12:34; 15:19). Ons woorde en dade openbaar dus ons hartstoestand. Dit toon wat ons werklik is. Daarom soek ’n wyse Christen Jehovah se leiding in alles. Jehovah bevind hom gevolglik ‘opreg in sy hart’ en sal aan hom ‘goed doen’.—Ps. 125:4.
11. Wat leer ons uit Israel se geskiedenis?
11 Dink aan Israel se geskiedenis. Wanneer die nasie goeie keuses gemaak het en Jehovah se gebooie gehoorsaam het, het Jehovah hulle beskerm (Jos. 24:15, 21, 31). Maar hulle het dikwels hulle wilsvryheid misbruik. In Jeremia se dag het Jehovah van hulle gesê: “Hulle het nie geluister nie, en ook het hulle nie gehoor gegee nie, maar hulle het in die planne, in die wederstrewigheid van hulle slegte hart gewandel, sodat hulle agteruitgegaan het en nie vooruit nie” (Jer. 7:24-26). Hoe jammer tog! Mag ons nooit weens wederstrewigheid of selfbevrediging Jehovah se leiding verwerp en in ons eie planne wandel en sodoende ‘agteruitgaan en nie vooruit nie’!
Wat is nodig om God se raad te volg?
12, 13. (a) Watter eienskap maak dat ons Jehovah se leiding wil volg? (b) Waarom is geloof noodsaaklik?
12 Ons liefde vir Jehovah maak dat ons sy leiding wil volg (1 Joh. 5:3). Maar Paulus het op iets anders gewys wat ons nodig het toe hy gesê het: “Ons wandel deur geloof, nie deur aanskouing nie” (2 Kor. 5:6, 7). Waarom is geloof belangrik? Wel, Jehovah lei ons in “die spore van regverdigheid”, maar hierdie spore lei nie tot rykdom of voorregte in hierdie wêreld nie (Ps. 23:3). Daarom moet ons oog van geloof gevestig bly op die onvergelyklike geestelike belonings wat voortspruit uit diens aan Jehovah. (Lees 2 Korintiërs 4:17, 18.) En geloof help ons om tevrede te wees met die basiese materiële dinge.—1 Tim. 6:8.
13 Jesus het getoon dat ware aanbidding selfopoffering behels, iets wat ook geloof verg (Luk. 9:23, 24). Party getroue aanbidders het groot opofferings gemaak en armoede, onderdrukking, vooroordeel en selfs hewige vervolging verduur (2 Kor. 11:23-27; Op. 3:8-10). Net sterk geloof het hulle in staat gestel om dit met vreugde te doen (Jak. 1:2, 3). Sterk geloof gee ons die absolute vertroue dat dit altyd die beste is om Jehovah se leiding te volg. Dit is altyd vir ons uiteindelike beswil. Daar bestaan hoegenaamd geen twyfel by ons nie dat die beloning vir dié wat lojaal volhard, baie groter is as enige tydelike lyding.—Heb. 11:6.
14. Waarom moes Hagar nederigheid aan die dag lê?
14 Dink ook aan die rol wat nederigheid daarin speel om Jehovah se leiding te volg. Die voorbeeld van Hagar, Sara se diensmeisie, lig dit toe. Toe Sara kinderloos gebly het, het sy Hagar vir Abraham gegee, en Hagar het swanger geword met Abraham se kind. Toe het Hagar verwaand geword teenoor haar onvrugbare meesteres. Gevolglik het Sara “haar begin verneder”, en Hagar het gevlug. ’n Engel van Jehovah het Hagar teëgekom en vir haar gesê: “Keer terug na jou meesteres en verneder jou onder haar hand” (Gen. 16:2, 6, 8, 9). Hagar sou moontlik ander raad verkies het. As sy die engel se leiding wou volg, sou sy haar verwaande gesindheid moes laat vaar. Hagar het nietemin nederig gedoen soos die engel gesê het, en haar seun, Ismael, is in die veiligheid van sy vader se kamp gebore.
15. Meld ’n paar situasies waarin dit vandag nederigheid van ons kan verg om Jehovah se leiding te volg.
15 Om Jehovah se leiding te volg, beteken dalk dat ons ons ook moet verneder. Party moet moontlik die beskouing aanvaar dat ’n vorm van ontspanning wat hulle geniet, Jehovah mishaag. ’n Christen het iemand dalk aanstoot gegee en moet om verskoning vra. Of hy het miskien ’n fout gemaak en moet dit erken. Sê nou iemand begaan ’n ernstige sonde? Hy moet hom verneder en die sonde aan die ouer manne bely. Iemand word moontlik selfs uitgesit. Om in die gemeente teruggeneem te word, moet hy nederig berou toon en hom bekeer. In hierdie en soortgelyke situasies is die woorde van Spreuke 29:23 vertroostend: “Die hoogmoed van die mens sal hom verneder, maar hy wat nederig van gees is, sal heerlikheid aangryp.”
Hoe lei Jehovah ons?
16, 17. Hoe kan ons die meeste voordeel trek uit die Bybel as ’n bron van goddelike leiding?
16 Die vernaamste bron van goddelike leiding is die Bybel, God se geïnspireerde Woord. (Lees 2 Timoteus 3:16, 17.) Om die meeste voordeel uit hierdie Woord te trek, is dit verstandig van ons om nie te wag totdat ’n moeilike situasie ontstaan voordat ons nuttige woorde in die Skrif soek nie. Ons sal eerder ’n gewoonte daarvan maak om die Bybel daagliks te lees (Ps. 1:1-3). So raak ons vertroud met die geïnspireerde woorde. God se gedagtes word ons gedagtes, en ons is gereed om selfs onverwagte probleme die hoof te bied.
17 Daarbenewens is dit belangrik om te peins oor wat ons in die Skrif lees en daaroor te bid. Wanneer ons oor Bybelverse peins, dink ons aan hoe dit in sekere situasies van toepassing kan wees (1 Tim. 4:15). Wanneer ons voor ernstige probleme te staan kom, bid ons tot Jehovah om ons te help om die leiding te vind wat ons nodig het. Jehovah se gees sal ons help om nuttige skriftuurlike beginsels te onthou wat ons in die Bybel of in Bybelpublikasies gelees het.—Lees Psalm 25:4, 5.
18. Hoe gebruik Jehovah die Christenbroederskap om ons te lei?
18 Ons Christenbroederskap is nog ’n waardevolle hulpbron wanneer ons Jehovah se leiding soek. ’n Noodsaaklike deel van hierdie broederskap is “die getroue en verstandige slaaf” met sy verteenwoordigende Bestuursliggaam, wat ’n voortdurende voorraad geestelike voedsel voorsien in die vorm van gedrukte materiaal en programme vir vergaderinge en byeenkomste. (Matt. 24:45-47; vergelyk Handelinge 15:6, 22-31.) Verder is daar in die Christenbroederskap geestelik volwasse persone, veral die ouer manne, wat bekwaam is om persoonlike hulp en skriftuurlike raad te gee (Jes. 32:1). Jongmense in Christengesinne het nog ’n waardevolle hulpbron. Hulle gelowige ouers, wat godgegewe gesag oor hulle het en tot wie hulle altyd aangespoor word om hulle vir leiding te wend.—Ef. 6:1-3.
19. Watter seëninge geniet ons omdat ons voortdurend Jehovah se leiding soek?
19 Ja, Jehovah bied leiding op ’n aantal maniere, en dit is verstandig van ons om ten volle hiervan gebruik te maak. Met verwysing na ’n tyd toe Israel getrou was, het koning Dawid gesê: “Op u het ons vaders vertrou; hulle het vertrou, en u het voortdurend aan hulle ontkoming verskaf. Tot u het hulle geroep, en hulle het veilig weggekom; op u het hulle vertrou, en hulle het nie beskaamd gestaan nie” (Ps. 22:3-5). As ons Jehovah se leiding met vertroue volg, sal ons ook ‘nie beskaamd staan nie’. Ons hoop sal ons nie teleurstel nie. As ons ‘ons weg aan Jehovah oorlaat’ en nie op ons eie wysheid vertrou nie, sal dit selfs nóú ryk seëninge meebring (Ps. 37:5). En as ons lojaal in hierdie weg volhard, sal hierdie seëninge vir ewig duur. Koning Dawid het geskryf: “Jehovah het geregtigheid lief, en hy sal sy lojales nie verlaat nie. Tot onbepaalde tyd sal hulle beslis bewaar word . . . Die regverdiges sal die aarde besit, en hulle sal vir ewig daarop woon.”—Ps. 37:28, 29.
Kan jy verduidelik?
• Waarom vertrou ons Jehovah se leiding?
• Wat impliseer dit as ons Jehovah se leiding verwerp?
• Wat is ’n paar situasies waarin ’n Christen nederigheid nodig het?
• Hoe lei Jehovah ons vandag?
[Prente op bladsy 8]
Vertrou jy in alle aspekte van jou lewe op Jehovah?
[Prent op bladsy 9]
Eva het Jehovah se soewereiniteit die rug toegekeer
[Prent op bladsy 10]
Watter eienskap moes Hagar aan die dag lê om die engel se leiding te volg?